മലയാളികളുടെ എക്കാലത്തെയും പ്രിയപ്പെട്ട ഹാസ്യ താരങ്ങളായ ജഗദീഷ്, മുകേഷ്, സിദ്ദിഖ്, അശോകൻ എന്നിവർ പതിനാറ് വർഷങ്ങൾക്ക് ശേഷം വീണ്ടും ഒരു ചിത്രത്തിനായി കൈകോർക്കുന്നു. കോമഡി ഫാമിലി എന്റർടെയ്നറായി ഒരുങ്ങുന്ന ‘പാതിരാക്കുറുക്കൻ’ എന്ന പുതിയ ചിത്രത്തിലൂടെയാണ് ഈ ക്ലാസിക് കൂട്ടുകെട്ട് വീണ്ടും ഒത്തുകൂടുന്നത്. പ്രേക്ഷകരെ ഏറെ ചിരിപ്പിച്ച ഈ താരനിര വീണ്ടും ഒന്നിക്കുന്നത് സിനിമ ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്.
ഈ ചിത്രത്തിന്റെ ഏറ്റവും വലിയ കൗതുകമുണർത്തുന്ന സവിശേഷത, ജഗദീഷ്, മുകേഷ്, സിദ്ദിഖ്, അശോകൻ എന്നിവർ ആദ്യമായി ഒരുമിച്ച് ഒരു ഗാനം ആലപിക്കുന്നു എന്നതാണ്. അഭിനയത്തിന് പുറമെ പാട്ടിലൂടെയും പ്രേക്ഷകരെ വിസ്മയിപ്പിക്കാൻ ഒരുങ്ങുകയാണ് ഈ എവർഗ്രീൻ ഗ്യാങ്. പ്രശസ്ത താരങ്ങളായ മോഹൻലാൽ, മഞ്ജു വാര്യർ എന്നിവരുടെ സോഷ്യൽ മീഡിയ പേജുകളിലൂടെ പുറത്തുവിട്ട ചിത്രത്തിന്റെ ഫസ്റ്റ് ലുക്ക് പോസ്റ്റർ ഇതിനോടകം തന്നെ സമൂഹമാധ്യമങ്ങളിൽ വലിയ രീതിയിൽ ട്രെൻഡിങ്ങായിക്കഴിഞ്ഞു.
അപ്പായ് സിനിമാസിന്റെ ബാനറിൽ സിജോ ജോർജ്ജ് നിർമ്മിക്കുന്ന ‘പാതിരാക്കുറുക്കൻ’ സംവിധാനം ചെയ്യുന്നത് നവാഗതനായ ജയേഷ് വേണുഗോപാലാണ്. തികച്ചും ചിരിയുടെ പശ്ചാത്തലത്തിൽ ഒരു കോമഡി ത്രില്ലറായാണ് ഈ സിനിമ അണിയിച്ചൊരുക്കിയിരിക്കുന്നത്. വരുന്ന ഒക്ടോബർ മാസത്തിൽ ചിത്രം തിയേറ്ററുകളിലെത്തുമെന്നാണ് അണിയറപ്രവർത്തകർ ഔദ്യോഗികമായി അറിയിച്ചിട്ടുള്ളത്.
പ്രധാന നാല് നടന്മാർക്ക് പുറമെ ഇന്ദ്രൻസ്, നിർമൽ പാലാഴി, വിനീത് തട്ടിൽ, റിയാസ് നർമ്മകല, സുധീർ പറവൂർ, ടെസ്സ ജോസഫ് തുടങ്ങി വലിയൊരു താരനിര തന്നെ ചിത്രത്തിലുണ്ട്. സോഷ്യൽ മീഡിയ ഇൻഫ്ലുവൻസർമാരായ അശ്വിത – അശ്വിജ എന്നിവരും ചിത്രത്തിൽ അഭിനയിക്കുന്നുണ്ട്. സുനിൽ കർമ്മ, നിഖിൽ ജിനൻ എന്നിവരുടെ തിരക്കഥയിൽ ഗോപി സുന്ദറാണ് ചിത്രത്തിന് സംഗീതം ഒരുക്കിയിരിക്കുന്നത്. സെൽവകുമാർ എസ് ക്യാമറയും അതുൽ വിജയ് എഡിറ്റിംഗും നിർവ്വഹിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
