മോൺട്രിയൽ: ഒക്ടോബർ 5-ന് നടക്കുന്ന പ്രവിശ്യാ തിരഞ്ഞെടുപ്പിന് മുന്നോടിയായി അയക്കുന്ന വോട്ടർ സ്ലിപ്പുകൾ ഫ്രഞ്ച് ഭാഷയിൽ മാത്രം തുടരാനുള്ള തീരുമാനവുമായി ക്യുബെക് സർക്കാർ മുന്നോട്ട്. പൊതുസ്ഥാപനങ്ങളിലെ ആശയവിനിമയം ഫ്രഞ്ചിലാക്കുന്ന ‘ബിൽ 96’ ചാർട്ടർ പാലിക്കാനായാണ് തീരുമാനമെന്നും, ഇംഗ്ലീഷ് സംസാരിക്കുന്നവരുടെ വിവര ലഭ്യതയ്ക്കായി ഇംഗ്ലീഷിലുള്ള വിവരങ്ങൾ ഓൺലൈനിലും ക്യു.ആർ കോഡ് വഴിയും ലഭ്യമാക്കിയിട്ടുണ്ടെന്നും പ്രീമിയർ ക്രിസ്റ്റീൻ ഫ്രെഷെറ്റ് വ്യക്തമാക്കി. ചരിത്രത്തിലാദ്യമായാണ് പ്രവിശ്യാ തിരഞ്ഞെടുപ്പിൽ ഫ്രഞ്ച് ഭാഷയിൽ മാത്രം സ്ലിപ്പുകൾ അയക്കുന്നത്.
ഇംഗ്ലീഷ് സമൂഹത്തിന്റെ അവകാശങ്ങൾ മാനിക്കപ്പെടും
തീരുമാനം ഇംഗ്ലീഷ് സംസാരിക്കുന്ന വോട്ടർമാരുടെ അവകാശങ്ങൾ തടയുന്നില്ലെന്ന് സർക്കാർ വൃത്തങ്ങൾ വ്യക്തമാക്കി. വോട്ട് ചെയ്യാനുള്ള വോട്ടർമാരുടെ അവകാശത്തെ ഇത് ബാധിക്കില്ലെന്നും തിരഞ്ഞെടുപ്പിൽ ഉപയോഗിക്കുന്ന വോട്ടിംഗ് ബാലറ്റുകൾ രണ്ട് ഭാഷകളിലും (ഫ്രഞ്ച്, ഇംഗ്ലീഷ്) ലഭ്യമായിരിക്കുമെന്നും പ്രീമിയർ പറഞ്ഞു. എല്ലാ വോട്ടർമാർക്കും തുല്യ അവസരമാണുള്ളതെന്നും നിയമപരമായ നിയന്ത്രണങ്ങൾ പാലിച്ചു കൊണ്ടാണ് ഈ നടപടിയെന്നും വാർത്താസമ്മേളനത്തിൽ അവർ കൂട്ടിച്ചേർത്തു.
തീരുമാനത്തിനെതിരെ ശക്തമായ പ്രതിഷേധവും നിയമപോരാട്ടവും
എന്നാൽ സർക്കാരിന്റെ ഈ നിലപാടിനെതിരെ വിവിധ പ്രതിപക്ഷ പാർട്ടികളും മനുഷ്യാവകാശ സംഘടനകളും രംഗത്തെത്തിയിട്ടുണ്ട്. ഓൺലൈനായി വിവരങ്ങൾ തിരയേണ്ടി വരുന്നത് പ്രായമായവർക്കും മറ്റും തടസ്സമാകുമെന്നും, ഇത് തുല്യ വോട്ടവകാശത്തിന് വിരുദ്ധമാണെന്നും ചൂണ്ടിക്കാട്ടി അഭിഭാഷകൻ എറിക് മാൾഡോഫിന്റെ നേതൃത്വത്തിൽ നിയമനടപടികൾക്ക് ഒരുക്കങ്ങൾ ആരംഭിച്ചു. എന്നാൽ പ്രിന്റിംഗ് പൂർത്തിയായതിനാലും തിരഞ്ഞെടുപ്പ് അടുത്തതിനാലും ഇനി കത്തുകളുടെ ഭാഷ മാറ്റാൻ സാധിക്കില്ലെന്ന് തിരഞ്ഞെടുപ്പ് കമ്മീഷൻ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
