കാഠ്മണ്ഡു: നേപ്പാൾ-ടിബറ്റ് അതിർത്തിയിലെ ഭോട്ടെകോഷി നദീതടത്തിലുണ്ടായ അതിശക്തമായ പ്രളയത്തിൽ വ്യാപക നാശനഷ്ടം. ഹിമാലയൻ പർവ്വതനിരകളിലുണ്ടായ അപ്രതീക്ഷിത ഹിമപാതത്തെ തുടർന്ന് പെട്ടെന്നുണ്ടായ വെള്ളപ്പൊക്കത്തിൽ നൂറുകണക്കിന് ആളുകളെയാണ് കാണാതായിരിക്കുന്നത്. ദുരന്തത്തിൽപ്പെട്ടവരിൽ 24 കനേഡിയൻ പൗരന്മാരും ഉൾപ്പെടുന്നുണ്ടെന്ന് നേപ്പാൾ ടൂറിസം ബോർഡ് സ്ഥിരീകരിച്ചു. അമേരിക്ക, ഓസ്ട്രേലിയ, ബ്രിട്ടൻ തുടങ്ങിയ രാജ്യങ്ങളിൽ നിന്നുള്ള നിരവധി വിനോദസഞ്ചാരികളും പ്രളയത്തിൽ കുടുങ്ങിയിട്ടുണ്ട്.
ഉയർന്ന മലനിരകളിലെ കൂറ്റൻ മഞ്ഞുപാളിയുടെ ഒരു ഭാഗം തകർന്ന് ഏകദേശം 1,300 മീറ്ററോളം താഴേക്ക് പതിച്ചതാണ് ദുരന്തത്തിന് കാരണമായതെന്ന് ഭൗമശാസ്ത്രജ്ഞർ വ്യക്തമാക്കുന്നു. പ്രളയത്തിൽ പ്രദേശത്തെ 19 പാലങ്ങളും 40 കിലോമീറ്ററോളം റോഡുകളും പൂർണ്ണമായും ഒലിച്ചുപോയി. മൂന്ന് പ്രധാന ട്രെക്കിംഗ് റൂട്ടുകൾ ആരംഭിക്കുന്നത് ഈ പ്രദേശത്തു നിന്നായതുകൊണ്ട് വിദേശികളടക്കം ധാരാളം ആളുകൾ ഇവിടെ തങ്ങിയിരുന്നു. കാഠ്മണ്ഡുവിൽ നിന്ന് ഏഴ് മണിക്കൂറോളം ദൂരമുള്ള ദുർഘടമായ മലയോര മേഖലയായതിനാൽ ദുരന്തനിവാരണ സേനയ്ക്ക് സംഭവസ്ഥലത്തേക്ക് എത്തുന്നതിന് വലിയ പ്രയാസം നേരിടുന്നുണ്ട്.
ALSO READ ഭാഷാ-സാംസ്കാരിക അവകാശങ്ങൾ തൊടില്ലെന്ന് അമേരിക്ക; വ്യാപാര ചർച്ചകളിലെ കൂടുതൽ വിവരങ്ങൾ പുറത്ത്
ദുരന്തത്തിൽ പ്രധാനമന്ത്രി മാർക്ക് കാർണി ദുഃഖം രേഖപ്പെടുത്തി. കാണാതായ പൗരന്മാർക്കായി കനേഡിയൻ ഗ്ലോബൽ അഫയേഴ്സ് പ്രാദേശിക ഭരണകൂടവുമായി ചേർന്ന് അന്വേഷണം ഊർജ്ജിതമാക്കിയിട്ടുണ്ട്. 2000-ത്തിന് ശേഷം മേഖലയിലെ മഞ്ഞുരുകലിന്റെ തോത് ഇരട്ടിയായതായും, ആഗോളതാപനം മൂലം ഭാവിയിലും ഇത്തരം ദുരന്തങ്ങൾ ഉണ്ടാകാൻ സാധ്യതയേറെയാണെന്നും കാലാവസ്ഥാ വിദഗ്ധർ മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
