വാഷിങ്ടൺ: അമേരിക്കയുമായി ശരിയായൊരു കരാറിലെത്താൻ ഇറാൻ ഇതുവരെ സജ്ജമായിട്ടില്ലെന്ന് പ്രസിഡൻ്റ് ഡൊണാൾഡ് ട്രംപ്. ഇറാൻ യുദ്ധത്തിൽ ഇനി എന്താണ് സംഭവിക്കാൻ പോകുന്നതെന്ന് വാഷിങ്ടൺ ഉറ്റുനോക്കുകയാണെന്ന് വ്യക്തമാക്കിയ ട്രംപ്, ഇറാൻ ഭരണകൂടത്തെ താഴെയിറക്കുകയെന്ന ലക്ഷ്യത്തോടെ ചരിത്രത്തിലെ ഏറ്റവും ശക്തമായ സാമ്പത്തിക ഉപരോധം ഏർപ്പെടുത്തുമെന്നും പ്രഖ്യാപിച്ചു.
ഇറാനുമായി വ്യാപാരബന്ധം പുലർത്തുകയോ സഹായങ്ങൾ നൽകുകയോ ചെയ്യുന്ന രാജ്യങ്ങൾക്കെതിരെ കടുത്ത സാമ്പത്തിക നടപടികൾ സ്വീകരിക്കുമെന്നാണ് യുഎസ് നൽകുന്ന മുന്നറിയിപ്പ്. ഇതിൻ്റെ ഭാഗമായി നടപ്പിലാക്കുന്ന പുതിയ ഉപരോധങ്ങളുടെ വിശദാംശങ്ങൾ തിങ്കളാഴ്ച ട്രെഷറി സെക്രട്ടറി സ്കോട്ട് ബെസൻ്റ് പുറത്തുവിടും. ഹോർമുസ് കടലിടുക്കും സമീപ പ്രദേശങ്ങളും പൂർണ്ണമായും തങ്ങളുടെ നിയന്ത്രണത്തിലാണെന്നും, കരാറിലെത്താൻ ഇറാൻ ആഗ്രഹിക്കുന്നുണ്ടെങ്കിലും കൃത്യമായ വ്യവസ്ഥകൾ അംഗീകരിക്കാൻ തയ്യാറായിട്ടില്ലെന്നും ട്രംപ് കൂട്ടിച്ചേർത്തു.
ഫെബ്രുവരി 28-ന് അമേരിക്കയും ഇസ്രായേലും ആക്രമണം ആരംഭിക്കുന്നതിന് മുമ്പ് ആഗോള എണ്ണ, എൽ.എൻ.ജി വിതരണത്തിൻ്റെ അഞ്ചിലൊന്നും നടന്നിരുന്നത് ഹോർമുസ് കടലിടുക്ക് വഴിയായിരുന്നു. യുദ്ധം ആറുമാസത്തോടടുക്കുമ്പോഴും, കൈവശമുള്ള മിസൈലുകളും ഡ്രോണുകളും ഉപയോഗിച്ച് എണ്ണക്കപ്പലുകളുടെ ഗതാഗതം തടസ്സപ്പെടുത്താൻ ഇറാന് സാധിക്കുന്നുണ്ട്.
പ്രാരംഭ ആക്രമണങ്ങൾക്ക് മറുപടിയായി ഇസ്രായേലിലെയും യുഎസ് സൈനിക താവളങ്ങളുള്ള ഗൾഫ് രാജ്യങ്ങളിലെയും കേന്ദ്രങ്ങളിലേക്ക് ഇറാനും തിരിച്ചടിച്ചിരുന്നു. യുഎസ്-ഇസ്രായേൽ സഖ്യം ഇറാനിലും ഇസ്രായേൽ ലെബനനിലും നടത്തിയ ആക്രമണങ്ങളിൽ ഇതുവരെ ആയിരക്കണക്കിന് ആളുകൾ കൊല്ലപ്പെടുകയും ദശലക്ഷക്കണക്കിന് പേർ ഭവനരഹിതരാവുകയും ചെയ്തിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
