എഡ്മിന്റൻ: കാനഡയിലെ മലയാളികളുടെ ഏറ്റവും വലിയ ക്രിക്കറ്റ് ആഘോഷങ്ങളിലൊന്നായ എഡ്മിന്റൻ മലയാളി പ്രീമിയർ ലീഗിന്റെ (EMPL) മൂന്നാം സീസണിന് തുടക്കമാകുന്നു. ഓഗസ്റ്റ് 22, 23 തീയതികളിൽ എഡ്മിന്റണിലെ കൊറോണേഷൻ ക്രിക്കറ്റ് ഗ്രൗണ്ടിലാണ് ഈ ക്രിക്കറ്റ് മാമാങ്കം നടക്കുന്നത്. കിരീടത്തിനായി Thrissur Tuskers, Southern Masters Calgary, Chasers Edmonton Cricket Club, Cleaningly Cosmos Champs, Kottayam Club, Kairali United, CKCAA Keralites, Euro Motors, Mystica Warriors എന്നിങ്ങനെ ഒൻപത് കരുത്തുറ്റ മലയാളി ടീമുകൾ കളത്തിലിറങ്ങുന്നുണ്ട്. കളിയാവേശത്തിന് മാറ്റ് കൂട്ടാനായി 50-50 ഓവർ ഫോർമാറ്റാണ് ടൂർണമെന്റിൽ പുനരവതരിപ്പിക്കുന്നത്.
‘Savoy’s South Indian Kitchen’ ആണ് പരിപാടിയുടെ പ്രധാന സ്പോൺസർ. കേവലം ഒരു ക്രിക്കറ്റ് ടൂർണമെന്റ് എന്നതിലുപരി കുടുംബങ്ങൾക്കായി ആഘോഷിക്കാനുള്ള ഒരു വലിയ മേളയായാണ് പരിപാടി സംഘടിപ്പിക്കുന്നത്. കാണികൾക്കായി രുചികരമായ ഭക്ഷണങ്ങൾ വിളമ്പുന്ന സവോയ്സിന്റെ ഫുഡ് ട്രക്കുകളും സ്റ്റാളുകളും ഗ്രൗണ്ടിന്റെ പരിസരത്തുണ്ടാകും. കുട്ടികൾക്കായി സുരക്ഷിതവും ആവേശകരവുമായ ‘കിഡ്സ് ഗെയിം കോർണറും’ ലക്കി ഡ്രോയിലൂടെ വിജയികൾക്ക് സ്മാർട്ട് ടിവി സ്വന്തമാക്കാനുള്ള അവസരവും ടൂർണമെന്റിന്റെ ഭാഗമായി ഒരുക്കിയിട്ടുണ്ട്.
ക്രിക്കറ്റിലെ ആവേശം നേരിട്ടറിയാനും പ്രിയപ്പെട്ട ടീമുകളെ പിന്തുണയ്ക്കാനുമായി കാനഡയിലെ എല്ലാ മലയാളികളെയും ഈ കായിക മാമാങ്കത്തിലേക്ക് സ്വാഗതം ചെയ്യുന്നതായി സംഘാടകർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
