ഒട്ടാവ: ചെറിയ സ്ഥാപനങ്ങൾ നടത്തുന്നവർക്ക് കൂടുതൽ വിദേശ തൊഴിലാളികളെ നിയമിക്കാൻ അനുമതി നൽകി കാനഡ സർക്കാർ. പത്തിൽ താഴെ ജീവനക്കാരുള്ള ബിസിനസ് ശാഖകളിൽ ഇനി മുതൽ ഒന്നു മുതൽ രണ്ട് വരെ വിദേശ തൊഴിലാളികളെ നിയമിക്കാം. നിർമ്മാണം, ആരോഗ്യം, ഭക്ഷ്യോത്പാദനം എന്നീ മേഖലകളിലെ സ്ഥാപനങ്ങൾക്കാണ് രണ്ട് പേരെ വരെ നിയമിക്കാൻ കൂടുതൽ മുൻഗണന ലഭിക്കുക.
നേരത്തെ ഒരു കമ്പനിയുടെ കാനഡയിലുള്ള മൊത്തം ജീവനക്കാരുടെ എണ്ണം നോക്കിയാണ് വിസ അനുമതി നൽകിയിരുന്നതെങ്കിൽ, ഇനി മുതൽ ഓരോ കടയിലെയും അല്ലെങ്കിൽ ശാഖയിലെയും ആളുകളുടെ എണ്ണം മാത്രമായിരിക്കും കണക്കിലെടുക്കുക. ഇത് ചെറിയ കടകൾക്കും ബിസിനസുകൾക്കും വലിയ ആശ്വാസമാകും.
ഈ വിഭാഗത്തിൽ വരുന്ന ജോലികൾക്ക് പ്രദേശത്തെ ശരാശരി വേതനത്തിന്റെ 120 ശതമാനത്തിൽ താഴെയായിരിക്കും ശമ്പളം. ഉദാഹരണത്തിന് ഒന്റാരിയോയിൽ മണിക്കൂറിന് 36.92 ഡോളറിൽ താഴെ ശമ്പളമുള്ള തസ്തികകളാണിത്. എന്നാൽ, വിദേശ തൊഴിലാളികളെ നിയമിക്കുന്നതിന് മുൻപ് യോഗ്യരായ കനേഡിയൻ പൗരന്മാരെയോ സ്ഥിരതാമസക്കാരെയോ കിട്ടാനില്ലെന്ന് തെളിയിക്കുന്ന എൽ.എം.ഐ.എ (LMIA) അനുമതി നിർബന്ധമാണ്.
READ MORE: ഇനിയും സമയം വൈകരുത്; കാനഡ ഫാമിലി സ്പോൺസർഷിപ്പിലെ ഇളവ് ഇനി മൂന്ന് ആഴ്ച മാത്രം
തൊഴിലാളികളുടെ യാത്രാച്ചെലവ്, കുറഞ്ഞ ചെലവിലുള്ള താമസസൗകര്യം, ഹെൽത്ത് ഇൻഷുറൻസ് എന്നിവ തൊഴിലുടമ തന്നെ നൽകേണ്ടതുണ്ട്. അതേസമയം, തൊഴില്ലായ്മ നിരക്ക് 6 ശതമാനത്തിൽ കൂടുതലുള്ള വലിയ നഗരങ്ങളിൽ ഈ ഇളവ് ബാധകമായിരിക്കില്ലെന്നും സർക്കാർ വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
