ലണ്ടൻ: ലണ്ടനിലെ ഹൈക്കമ്മീഷൻ ഓഫ് ഇന്ത്യയുമായി സഹകരിച്ച് കേംബ്രിഡ്ജിൽ ആദ്യമായി ഇന്ത്യൻ കോൺസുലാർ ക്യാമ്പ് സംഘടിപ്പിക്കുന്നു. സൗത്ത് കേംബ്രിഡ്ജ്ഷയർ ഡിസ്ട്രിക്റ്റ് കൗൺസിലറായ ജിയോ സെബാസ്റ്റ്യന്റെ നേതൃത്വത്തിലാണ് പ്രവാസികൾക്ക് ഏറെ ഉപകാരപ്രദമാകുന്ന ഈ ക്യാമ്പ് ഒരുങ്ങുന്നത്. 2026 ഓഗസ്റ്റ് 29 ശനിയാഴ്ച രാവിലെ 10 മണി മുതൽ വൈകുന്നേരം 3 മണി വരെ കേംബ്രിഡ്ജ് കാംപ്കിൻ റോഡിലുള്ള ആർബറി കമ്മ്യൂണിറ്റി സെന്ററിലാണ് ക്യാമ്പ് നടക്കുക.
പ്രവാസികൾക്ക് വലിയ ആശ്വാസം
കേംബ്രിഡ്ജ്ഷയറിലെ മലയാളി സമൂഹത്തിനും മറ്റ് ഇന്ത്യൻ വംശജർക്കും ഏറെ ആശ്വാസകരമാകുന്നതാണ് ഈ പുതിയ നീക്കം. പാസ്പോർട്ട് ഉൾപ്പെടെയുള്ള വിവിധ കോൺസുലാർ സേനങ്ങൾക്കായി ലണ്ടനിലെ ഓഫീസിലേക്ക് നേരിട്ട് യാത്ര ചെയ്യേണ്ടിവരുന്ന ബുദ്ധിമുട്ടുകൾ ഇതോടെ ഒഴിവാകും. ഹിസ്റ്റൺ, ഇംപിംഗ്ടൺ, ഓർച്ചാർഡ് പാർക്ക് എന്നീ വാർഡുകളെ പ്രതിനിധീകരിക്കുന്ന കൗൺസിലർ ജിയോ സെബാസ്റ്റ്യനൊപ്പം ടോം, വിൽസൺ, ജോസ്, ബിജു എന്നിവരടങ്ങുന്ന സംഘാടക സമിതിയാണ് ക്യാമ്പിന്റെ പ്രവർത്തനങ്ങൾക്ക് ചുക്കാൻ പിടിക്കുന്നത്.
ലഭ്യമാകുന്ന പ്രധാന സേവനങ്ങൾ
പാസ്പോർട്ട് സേവനങ്ങൾ, ഒസിഐ (OCI) അപേക്ഷകൾ, ഇന്ത്യൻ വിസ, ജനന രജിസ്ട്രേഷൻ, അറ്റസ്റ്റേഷൻ, പവർ ഓഫ് അറ്റോർണി തുടങ്ങിയ നിരവധി സേവനങ്ങൾ ക്യാമ്പിൽ പൊതുജനങ്ങൾക്ക് ലഭ്യമാകും. ക്യാമ്പിൽ പങ്കെടുക്കാൻ മുൻകൂർ അപ്പോയിന്റ്മെന്റിന്റെ ആവശ്യമില്ലെന്നും, ആദ്യം എത്തുന്നവർക്ക് ആദ്യം എന്ന മുൻഗണനാ ക്രമത്തിലായിരിക്കും സേവനങ്ങൾ നൽകുകയെന്നും സംഘാടകർ വ്യക്തമാക്കിയിട്ടുണ്ട്.
Also Read : ഒമ്പത് ജുഡീഷ്യൽ നോമിനികളെ പ്രഖ്യാപിച്ച് ട്രംപ്; നവംബറിലെ മിഡ്ടേം തിരഞ്ഞെടുപ്പ് നിർണായകം
സേവനങ്ങൾ ഇനി വിരൽത്തുമ്പിൽ
കേംബ്രിഡ്ജിൽ ആദ്യമായി സംഘടിപ്പിക്കുന്ന ഇത്തരം ഒരു ക്യാമ്പ് ഈസ്റ്റ് ആംഗ്ലിയയിലുടനീളം താമസിക്കുന്ന ആയിരക്കണക്കിന് പ്രവാസികൾക്ക് പ്രയോജനപ്പെടുമെന്ന് കൗൺസിലർ ജിയോ സെബാസ്റ്റ്യൻ പറഞ്ഞു. പദ്ധതി യാഥാർത്ഥ്യമാക്കാൻ സഹായിച്ച ലണ്ടനിലെ ഇന്ത്യൻ ഹൈക്കമ്മീഷന് അദ്ദേഹം നന്ദി അറിയിച്ചു. ക്യാമ്പിൽ ഹാജരാക്കേണ്ട രേഖകളെക്കുറിച്ചുള്ള കൂടുതൽ വിവരങ്ങൾ ഇന്ത്യൻ ഹൈക്കമ്മീഷന്റെ ഔദ്യോഗിക വെബ്സൈറ്റിൽ ലഭ്യമാണ്. സംശയനിവാരണങ്ങൾക്കായി കൗൺസിലർ ജിയോ സെബാസ്റ്റ്യനെ Cllr.Sebastian@scambs.gov.uk എന്ന ഇമെയിലിൽ ബന്ധപ്പെടാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
