ടൊറന്റോ: ടൊറന്റോയിയെ പ്രശസ്തമായ സാൻസിബാർ ടാവേൺ (Zanzibar Tavern) അഡൽറ്റ് എന്റർടൈൻമെന്റ് കോംപ്ലക്സിലെ വൻ തീപിടിത്തത്തിന്റെ ദൃശ്യങ്ങൾ പുറത്ത്. ഞായറാഴ്ച പുലർച്ചെയുണ്ടായ തീപിടിത്തത്തിന്റെ തത്സമയ ദൃശ്യങ്ങൾ റെഡ്ഡിറ്റിൽ പ്രചരിച്ചതോടെയാണ് സംഭവം പുറംലോകമറിയുന്നത്.
പുലർച്ചെ 5:50 ഓടെയാണ് കോംപ്ലക്സിൽ ആദ്യമായി തീജ്വാലകൾ പ്രത്യക്ഷപ്പെട്ടത്. നിമിഷങ്ങൾക്കകം തീ പടർന്നുപിടിക്കുകയും കെട്ടിടത്തിന് മുകളിൽ കറുത്ത പുകയുയരുകയും ചെയ്തു. വിവരമറിഞ്ഞ് മിനിറ്റുകൾക്കുള്ളിൽ തന്നെ ടൊറന്റോ ഫയർഫോഴ്സ് സംഘം സ്ഥലത്തെത്തി രക്ഷാപ്രവർത്തനം ആരംഭിച്ചു. അപകടത്തിൽ ആർക്കും പരിക്കേറ്റതായി റിപ്പോർട്ടുകളില്ല.
കെട്ടിടത്തിന് ഗുരുതരമായ കേടുപാടുകൾ
തീപിടിത്തത്തെ തുടർന്ന് സാൻസിബാർ സ്ഥിതി ചെയ്യുന്ന കെട്ടിടത്തിന്റെ ഘടനയ്ക്ക് ഗുരുതരമായ തകരാർ സംഭവിച്ചിട്ടുണ്ടെന്നും വലിയ തോതിലുള്ള നാശനഷ്ടങ്ങൾ ഉണ്ടായിട്ടുണ്ടെന്നും ടൊറന്റോ ഫയർ ചീഫ് ജിം ജെസ്സോപ് അറിയിച്ചു. ഫയർഫോഴ്സ് ഉദ്യോഗസ്ഥരുടെ ദ്രുതഗതിയിലുള്ള ഇടപെടൽ മൂലമാണ് സമീപത്തെ മറ്റ് കെട്ടിടങ്ങളിലേക്ക് തീ പടരാതെ വലിയൊരു ദുരന്തം ഒഴിവാക്കാനായത്.
തീപിടിത്തത്തെ തുടർന്ന് നഗരസഭാധികാരികൾ കെട്ടിടം ഉപയോഗശൂന്യവും അപകടകരവുമാണെന്ന് കാണിച്ച് ‘അൺസേഫ് ബിൽഡിംഗ് ഓർഡർ’ പുറപ്പെടുവിച്ചു. കെട്ടിടത്തിന്റെ ഘടനാപരമായ സുരക്ഷിതത്വം വിലയിരുത്തുന്നതിനായി ഉടൻ തന്നെ ഒരു പ്രൊഫഷണൽ എൻജിനീയറുടെ സേവനം ഉറപ്പാക്കണമെന്ന് കെട്ടിട ഉടമകളോട് നിർദ്ദേശിച്ചിട്ടുണ്ട്.
1960 മുതൽ പ്രവർത്തിച്ചു വരുന്ന ഈ സ്ഥാപനത്തിന്റെ മുകൾനില പൂർണ്ണമായും നശിച്ചതായാണ് വിവരമെന്ന് ഉടമ അല്ലെൻ കൂപ്പർ പ്രതികരിച്ചു. കൂടുതൽ കരുത്തോടെയും മികച്ച രീതിയിലും സ്ഥാപനം പുനർനിർമ്മിക്കുമെന്നും അദ്ദേഹം കൂട്ടിച്ചേർത്തു. അതേസമയം തീപിടിത്തത്തിന്റെ യഥാർത്ഥ കാരണത്തെക്കുറിച്ചുള്ള അന്വേഷണം പുരോഗമിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
