ഷാർലറ്റ്ടൗൺ: പ്രിൻസ് എഡ്വേർഡ് ഐലൻഡിൽ ഓൺലൈൻ വഴി നടക്കുന്ന കുട്ടികൾക്കെതിരായ ലൈംഗിക ചൂഷണ കേസുകളിൽ ആർട്ടിഫിഷ്യൽ ഇന്റലിജൻസ് നിർമ്മിത ദൃശ്യങ്ങളുടെ സാന്നിധ്യം വ്യാപകമാകുന്നതായി റിപ്പോർട്ട്. റോയൽ കനേഡിയൻ മൗണ്ടഡ് പോലീസ് അന്വേഷിക്കുന്ന 33 ശതമാനം കേസുകളും എഐ ഉപയോഗിച്ച് നിർമ്മിച്ചതോ എഡിറ്റ് ചെയ്തതോ ആയ ദൃശ്യങ്ങളാണെന്ന് മുതിർന്ന കമ്മ്യൂണിക്കേഷൻസ് അഡ്വൈസർ സ്കോട്ട് ഫെറിസ് വ്യക്തമാക്കി.
ഷാർലറ്റ്ടൗൺ, സമ്മർസൈഡ്, കെൻസിംഗ്ടൺ തുടങ്ങിയ പ്രദേശങ്ങൾ ഒഴികെയുള്ള ആർ.സി.എം.പിയുടെ പരിധിയിലാണ് ഈ വർദ്ധനവ്. എഐ ഉപയോഗിച്ച് നിർമ്മിക്കുന്ന ചിത്രങ്ങൾ യഥാർത്ഥ ചിത്രങ്ങളോട് ഏറെ സാദൃശ്യമുള്ളതിനാൽ ഇവ വേർതിരിച്ചറിയാൻ അന്വേഷണസംഘം ബുദ്ധിമുട്ടുന്നുണ്ട്.
കുട്ടികളുടെ ചിത്രങ്ങൾ വ്യാജമായി നിർമ്മിക്കുന്നതിനും നിലവിലുള്ള ചിത്രങ്ങളിൽ മാറ്റങ്ങൾ വരുത്തുന്നതിനും കുറ്റവാളികൾ എഐ സാങ്കേതികവിദ്യ ദുരുപയോഗം ചെയ്യുന്നതായി പോലീസുകാർ വ്യക്തമാക്കുന്നു. ഇതിൽ യഥാർത്ഥ കുട്ടികളുടെ മുഖം മാറ്റി വ്യാജ ദൃശ്യങ്ങൾ നിർമ്മിക്കുന്ന ‘ഡിപ്ഫേക്ക്’ സാങ്കേതികവിദ്യ വഴി ഭീഷണിപ്പെടുത്തി പണം തട്ടുന്ന സെക്സ്റ്റോർഷൻ കേസുകളും വർദ്ധിച്ചിട്ടുണ്ട്.
കനേഡിയൻ ക്രിമിനൽ കോഡിലെ വകുപ്പ് 163.1 പ്രകാരം എഐ ഉപയോഗിച്ച് നിർമ്മിച്ചതായാലും അല്ലെങ്കിലും കുട്ടികൾക്കെതിരായ ലൈംഗിക അതിക്രമ ദൃശ്യങ്ങൾ കൈവശം വെക്കുന്നതും പ്രചരിപ്പിക്കുന്നതും നിർമ്മിക്കുന്നതും ഒരേപോലെ വലിയ കുറ്റകൃത്യമാണ്. കുട്ടികളുടെ സുരക്ഷ ഉറപ്പാക്കാൻ സോഷ്യൽ മീഡിയകളിൽ ചിത്രങ്ങൾ പങ്കുവെക്കുമ്പോൾ രക്ഷിതാക്കളും കുട്ടികളും കൂടുതൽ ജാഗ്രത പാലിക്കണമെന്ന് ക്വീൻസ് ഡിസ്ട്രിക്റ്റ് ആർ.സി.എം.പി കോൺസ്റ്റബിൾ ടിം കീസർ ഓർമ്മിപ്പിക്കുന്നു.
വ്യാജ ചിത്രങ്ങളാണെങ്കിൽ പോലും ഇവ വരുത്തുന്ന ആഘാതം വളരെ വലുതാണെന്ന് കനേഡിയൻ സെന്റർ ഫോർ ചൈൽഡ് പ്രൊട്ടക്ഷൻ റിസർച്ച് ഡയറക്ടർ ഷാക് മാർക്കോ പറഞ്ഞു. ഇന്റർനെറ്റിലുള്ള സാധാരണ കുട്ടികളുടെ ചിത്രങ്ങൾ വരെ എഐ മോഡലുകൾ ശേഖരിച്ച് ഇത്തരം ദൃശ്യങ്ങൾ നിർമ്മിക്കാൻ ഉപയോഗിക്കുന്നുണ്ട്.
മാസം ശരാശരി രണ്ട് കേസുകളിൽ ആർ.സി.എം.പി കുറ്റപത്രം സമർപ്പിക്കുന്നുണ്ടെങ്കിലും തെളിവുകളുടെ അഭാവം മൂലം പകുതിയിലേറെ സംഭവങ്ങളും റിപ്പോർട്ട് ചെയ്യപ്പെടാതെ പോകുന്നുണ്ടെന്നാണ് സൂചന. മേഖലയിലെ സമ്മർസൈഡ്, ഷാർലറ്റ്ടൗൺ പോലീസും എഐ നിർമ്മിത ദൃശ്യങ്ങളുമായി ബന്ധപ്പെട്ട അന്വേഷണങ്ങളിലാണ്. ഈ ഗുരുതരമായ പ്രതിസന്ധി നേരിടാൻ പോലീസും ഇൻവെസ്റ്റിഗേറ്റർമാരും നിരീക്ഷണം കൂടുതൽ ശക്തമാക്കിയിട്ടുണ്ട്.
AI becomes villain in child sexual abuse cases; Cases are rising sharply in PEI, report says
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
