ബ്രിട്ടീഷ് കൊളംബിയ; ബ്രിട്ടീഷ് കൊളംബിയയിലെ സമ്മർലാൻഡിന് സമീപം ഒരാഴ്ചയ്ക്കുമേറെയായി തുടരുന്ന ബാൽഡ് റേഞ്ച് കാട്ടുതീ നിയന്ത്രണവിധേയമാക്കാനുള്ള ശ്രമങ്ങൾ ശക്തമായി തുടരുന്നു. തീ ഇപ്പോഴും നിയന്ത്രണാതീതമാണെങ്കിലും അഗ്നിശമന പ്രവർത്തനങ്ങളിൽ കാര്യമായ പുരോഗതിയുണ്ടെന്ന് BC Wildfire Service അറിയിച്ചു.
നിലവിൽ 376 അഗ്നിശമന സേനാംഗങ്ങളാണ് പകലും രാത്രിയുമായി തീ നിയന്ത്രിക്കാൻ പ്രവർത്തിക്കുന്നത്. ഇവർക്കൊപ്പം 115 സ്ട്രക്ചർ പ്രൊട്ടക്ഷൻ ജീവനക്കാരും 16 ഹെലികോപ്റ്ററുകളും 59 ഹെവി ഉപകരണങ്ങളും രംഗത്തുണ്ട്. ഒക്കനഗൻ ഫാൾസിലെ കിയോഗൻ സ്പോർട്സ് പാർക്കിൽ ഏകദേശം 500 BC Wildfire Service ജീവനക്കാരെ താമസിപ്പിച്ചിട്ടുണ്ട്.
ഷിംഗിൾ ക്രീക്ക് റോഡ് മേഖലയിലും പ്രിൻസ്റ്റൺ-സമ്മർലാൻഡ് റോഡ് മേഖലയിലുമാണ് പ്രധാനമായും പ്രവർത്തനങ്ങൾ നടക്കുന്നത്. വെള്ളിയാഴ്ച രാത്രി നൈറ്റ് വിഷൻ ഹെലികോപ്റ്ററുകളുടെ സഹായത്തോടെയും സംഘം പ്രവർത്തിച്ചു. തെക്കൻ ഭാഗത്ത് തീയുടെ ചില ചെറിയ ഭാഗങ്ങൾ പടർന്നെങ്കിലും അവ കണ്ടെത്തി അണയ്ക്കാൻ കഴിഞ്ഞതായി അധികൃതർ പറഞ്ഞു.
തീപിടിത്തത്തിന്റെ ഏറ്റവും സജീവമായ മേഖല ഇപ്പോഴും വടക്കുപടിഞ്ഞാറൻ ഭാഗത്താണ്. ഓസ്പ്രേ തടാകത്തിൽ നിന്ന് ഏകദേശം 20 കിലോമീറ്റർ അകലെയുള്ള ഈ മേഖലയിൽ ഹെവി ഉപകരണങ്ങളുടെ സഹായത്തോടെ തീയുടെ അരികിൽ നേരിട്ടുള്ള പ്രതിരോധ പ്രവർത്തനങ്ങൾ തുടരുകയാണ്. കാലാവസ്ഥ അനുകൂലമായാൽ തീയുടെ അരികിനും നിയന്ത്രണരേഖകൾക്കുമിടയിലെ കത്തിക്കാവുന്ന സസ്യാവശിഷ്ടങ്ങൾ നീക്കം ചെയ്യാൻ നിയന്ത്രിത തീപിടിത്തങ്ങളും നടത്തും.
ശനിയാഴ്ച സമ്മർലാൻഡിൽ തെക്കൻ കാറ്റ് പ്രതീക്ഷിക്കുന്നതിനാൽ തീയുടെ സ്വഭാവത്തിൽ മാറ്റമുണ്ടാകാമെന്ന് അധികൃതർ മുന്നറിയിപ്പ് നൽകി. രാവിലെ പുകയും മൂടൽമഞ്ഞും മൂലം കാഴ്ചപരിധി കുറയുമെങ്കിലും പിന്നീട് ആകാശം തെളിയുന്നതോടെ സൂര്യപ്രകാശം വർധിക്കുകയും തീ കൂടുതൽ സജീവമാകുകയും ചെയ്യാനുള്ള സാധ്യതയുണ്ട്.
അതേസമയം, തീപിടിത്തത്തെ തുടർന്ന് ഒരാഴ്ചയോളം വീടുകളിൽ നിന്ന് മാറിനിന്ന ചില നിവാസികൾ വെള്ളിയാഴ്ച വീടുകളിലേക്ക് മടങ്ങി.
ഹൈവേ 97-ന്റെ കിഴക്കുഭാഗത്തെ ട്രൗട്ട് ക്രീക്ക് മേഖലയിലെ ചില വീടുകൾക്കും പീച്ച്ലാൻഡിലെയും ഇലക്ടറൽ ഏരിയ വെസ്റ്റിലെയും പ്രദേശങ്ങൾക്കും ഏർപ്പെടുത്തിയിരുന്ന ഒഴിപ്പിക്കൽ ഉത്തരവുകൾ അലർട്ടുകളാക്കി മാറ്റിയതോടെയാണ് ഭാഗികമായി തിരിച്ചെത്താൻ അനുമതി ലഭിച്ചത്. ഹൈവേ 97 സമ്മർലാൻഡിലൂടെ ദിവസവും രാവിലെ 7 മുതൽ വൈകിട്ട് 7 വരെ തുറന്നിരിക്കും.
നിലവിൽ ഇത് പ്രധാനമായും കടന്നുപോകുന്ന വാഹനങ്ങൾക്കായാണ് അനുവദിച്ചിരിക്കുന്നത്. ഒഴിപ്പിക്കൽ ഉത്തരവിൽ നിന്ന് ഒഴിവാക്കിയ ട്രൗട്ട് ക്രീക്ക് നിവാസികൾക്കും താൽക്കാലിക പ്രവേശന പാസ് ഉള്ളവർക്കും പ്രത്യേക പ്രവേശനം അനുവദിച്ചിട്ടുണ്ട്. കാട്ടുതീയുടെ പരിധിക്കുള്ളിൽ അടുത്ത ഏതാനും ആഴ്ചകളിലും പുകയും മണ്ണിനടിയിലെ തീയും കാണാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. അതേസമയം, തീ നിയന്ത്രണ പ്രവർത്തനങ്ങളെ തടസ്സപ്പെടുത്തുന്ന ഡ്രോണുകളോ ബോട്ടുകളോ സംബന്ധിച്ച് റിപ്പോർട്ടുകളൊന്നുമില്ലെന്നും BC Wildfire Service അറിയിച്ചു.
കാട്ടുതീ ഇപ്പോഴും 19,891 ഹെക്ടർ പ്രദേശത്ത് വ്യാപിച്ചുകിടക്കുകയാണ്. തീയുടെ മുഴുവൻ പരിധിയും നിയന്ത്രണത്തിലാകാത്തതിനാലാണ് ഇത് ‘ഔട്ട് ഓഫ് കൺട്രോൾ’ വിഭാഗത്തിൽ തുടരുന്നതെന്ന് അധികൃതർ വ്യക്തമാക്കി. പ്രവർത്തനങ്ങളിൽ പുരോഗതിയുണ്ടെങ്കിലും തീ പൂർണമായി നിയന്ത്രണവിധേയമാക്കാൻ ഇനിയും ഏറെ ജോലി ബാക്കിയുണ്ടെന്നും BC Wildfire Service അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
