ഒട്ടാവ : അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച 50 ശതമാനം അധിക താരിഫ് പ്രാബല്യത്തിൽ വരാൻ ദിവസങ്ങൾ മാത്രം ശേഷിക്കെ, കയറ്റുമതി ധൃതിപിടിച്ച് വർധിപ്പിക്കാതെ സ്ഥിതിഗതികൾ ജാഗ്രതയോടെ വീക്ഷിക്കാൻ തീരുമാനിച്ച് കനേഡിയൻ കമ്പനികൾ. ഡെയറി ഉൽപ്പന്നങ്ങൾ മുതൽ ജാക്കറ്റുകൾ വരെയുള്ള ഏകദേശം 2000 കോടി യു.എസ്. ഡോളറിന്റെ കനേഡിയൻ ഉൽപ്പന്നങ്ങൾക്കാണ് ഓഗസ്റ്റ് 19 മുതൽ പുതിയ താരിഫ് ബാധകമാകുന്നത്. മുൻകാലങ്ങളിൽ നിന്ന് വ്യത്യസ്തമായി, നോർത്ത് അമേരിക്കൻ സ്വതന്ത്ര വ്യാപാര കരാറായ CUSMA പരിധിയിൽ വരുന്ന ഉൽപ്പന്നങ്ങൾക്കും ഇത്തവണ ഇളവ് നൽകിയിട്ടില്ല.
അവസാന നിമിഷം തീരുമാനം മാറ്റുന്നതിനോ അല്ലെങ്കിൽ താരിഫ് നടപ്പാക്കുന്നതിൽ നിന്ന് ട്രംപ് പിന്മാറുന്നതിനോ സാധ്യതയുണ്ടെന്നാണ് കനേഡിയൻ വ്യാപാരികളുടെ വിലയിരുത്തൽ. ബിസിനസ്സ് ലോകത്ത് ട്രംപിന്റെ ഈ പിന്മാറ്റ പ്രവണതയെ ‘ടാകോ’ (TACO – Trump Always Chickens Out) എന്ന ചുരുക്കപ്പേരിലാണ് വിദഗ്ധർ വിശേഷിപ്പിക്കുന്നത്. ഇതിനാൽ തന്നെ സാധനങ്ങൾ കൂട്ടത്തോടെ അതിർത്തി കടത്തിവിടുന്നതിന് പകരം ട്രേഡ് വാർ നൽകുന്ന സാമ്പത്തിക ആഘാതം വിലയിരുത്തി കാത്തിരിക്കാനാണ് ഭൂരിഭാഗം കനേഡിയൻ കമ്പനികളുടെയും തീരുമാനം.
ALSO READ: Trump New Tariffs: ട്രംപിന്റെ തീരുവ: കാനഡയിൽ ഭിന്നതയ്ക്ക് വഴിയൊരുങ്ങുമോ?
കഴിഞ്ഞ വർഷങ്ങളിൽ അമേരിക്കൻ താരിഫ് പ്രഖ്യാപനങ്ങൾ വന്ന ഉടൻ തന്നെ സാധനങ്ങൾ അതിർത്തി കടത്താൻ ലോകമെമ്പാടുമുള്ള വ്യാപാരികൾ വൻ തിരക്ക് കൂട്ടിയിരുന്നു. എന്നാൽ നിലവിലെ വ്യാപാര തർക്കങ്ങളോട് കനേഡിയൻ കയറ്റുമതിക്കാർ ഒരുപരിധി വരെ പൊരുത്തപ്പെട്ടു കഴിഞ്ഞതായാണ് വിപണി വിദഗ്ധരുടെ വിലയിരുത്തൽ. എങ്കിലും, പുതിയ താരിഫ് നടപ്പിലായാൽ ഉണ്ടാകാവുന്ന വൻ സാമ്പത്തിക ബാധ്യതകളെ ചെറുക്കാനുള്ള മുൻകരുതലുകളും കമ്പനികൾ സമാന്തരമായി സ്വീകരിക്കുന്നുണ്ട്.
തർക്കം പരിഹരിക്കുന്നതിനായി
വ്യാപാര തർക്കം പരിഹരിക്കുന്നതിനായി കനേഡിയൻ പ്രധാനമന്ത്രി മാർക്ക് കാർണിയും ട്രംപും തമ്മിൽ ഉച്ചകോടികളിൽ ചർച്ചകൾ നടത്തിയിട്ടുണ്ടെങ്കിലും അന്തിമ തീരുമാനത്തിൽ വ്യക്തത വന്നിട്ടില്ല. വരും ദിവസങ്ങളിൽ ട്രംപ് നിലപാടിൽ ഇളവ് വരുത്തുമോ അതോ ഓഗസ്റ്റ് 19 മുതൽ 50 ശതമാനം തീരുവ നിലവിൽ വരുമോ എന്നാണ് കാനഡയിലെ വ്യവസായ ലോകം ഉറ്റുനോക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
