തിരുവനന്തപുരം: സംസ്ഥാനത്തെ വാഹന മോഡിഫിക്കേഷനുമായി ബന്ധപ്പെട്ട പുതിയ നിർദേശങ്ങളും ശുപാർശകളും അടങ്ങിയ റിപ്പോർട്ട് വരുന്ന സെപ്റ്റംബറിൽ മോട്ടോർ വാഹന വകുപ്പ് (MVD) സർക്കാരിന് സമർപ്പിക്കും. ജൂലൈ 28 മുതൽ ഓഗസ്റ്റ് 7 വരെ ഗൂഗിൾ ഫോം വഴി സംഘടിപ്പിച്ച പൊതുജന സർവേയിൽ ലഭിച്ച നിർദേശങ്ങൾ പഠിച്ച ശേഷമായിരിക്കും റിപ്പോർട്ട് കൈമാറുക. സർവേയിലൂടെ പതിനേഴായിരത്തോളം ആളുകളാണ് തങ്ങളുടെ അഭിപ്രായങ്ങൾ പങ്കുവെച്ചത്. അടുത്ത രണ്ടാഴ്ചയ്ക്കകം ഈ പ്രതികരണങ്ങളുടെ വിശദമായ പരിശോധന പൂർത്തിയാക്കാനാണ് എംവിഡി ലക്ഷ്യമിടുന്നത്.
വാഹനങ്ങളുടെ രൂപമാറ്റത്തിൽ സംസ്ഥാനങ്ങൾക്ക് മാത്രമായി സ്വന്തം നിലയിൽ മാനദണ്ഡങ്ങൾ നിശ്ചയിക്കാൻ അധികാരമില്ലെന്നതാണ് കേന്ദ്ര സർക്കാരിന്റെ നിലപാട്. കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരി വ്യക്തമാക്കിയത് അനുസരിച്ച്, കേന്ദ്രം നിശ്ചയിച്ചിട്ടുള്ള നിർദേശങ്ങൾ പ്രകാരം അംഗീകൃത വർക്ക്ഷോപ്പുകളിലോ സർവീസ് സ്റ്റേഷനുകളിലോ മാത്രമേ മോഡിഫിക്കേഷൻ നടത്താൻ പാടുള്ളൂ. കൂടാതെ രൂപമാറ്റം വരുത്തുന്നതിന് മുൻപ് ഫോം 22 സി വഴി രജിസ്റ്ററിംഗ് അതോറിറ്റിയുടെ മുൻകൂർ അനുമതി നേടുകയും, മാറ്റങ്ങൾ വരുത്തി 14 ദിവസത്തിനകം അത് ആർസി ബുക്കിൽ രേഖപ്പെടുത്തുകയും വേണമെന്ന വ്യവസ്ഥ കർശനമായി നിലനിൽക്കുന്നുണ്ട്.
അനുമതിയില്ലാതെ ചെയ്യാവുന്ന 18 മോഡിഫിക്കേഷൻ
നേരത്തെ ജൂൺ മാസത്തിൽ അനുമതിയില്ലാതെ ചെയ്യാവുന്ന 18 മോഡിഫിക്കേഷനുകളുടെയും, മുൻകൂർ അനുമതിയോടെ ചെയ്യാവുന്ന 6 മാറ്റങ്ങളുടെയും പട്ടിക മോട്ടോർ വാഹന വകുപ്പ് പുറത്തിറക്കിയിരുന്നു. എന്നാൽ ഇതിൽ ഉൾപ്പെട്ടിരുന്ന പല കാര്യങ്ങളും (സീറ്റ് കവറുകൾ, ഡോർ വൈസറുകൾ, ജിപിഎസ് മുതലായവ) മുൻപ് തന്നെ സർവസാധാരണമായി ചെയ്തുവരുന്നവയാണെന്ന വിമർശനം വാഹനപ്രേമികളിൽ നിന്നും യുവാക്കളിൽ നിന്നും ശക്തമായി ഉയർന്നു. ഇതിനെത്തുടർന്നാണ് ജനങ്ങളുടെ യഥാർത്ഥ ആവശ്യങ്ങളും നിർദേശങ്ങളും അറിയുന്നതിനായി എംവിഡി വിപുലമായ ജനകീയ സർവേ നടത്താൻ തീരുമാനിച്ചത്.
ALSO READ: Trump New Tariffs: ട്രംപിന്റെ തീരുവ: കാനഡയിൽ ഭിന്നതയ്ക്ക് വഴിയൊരുങ്ങുമോ?
അപകടകരമല്ലാത്ത വാഹന മോഡിഫിക്കേഷൻ
അധികാരത്തിലെത്തിയാൽ അപകടകരമല്ലാത്ത വാഹന മോഡിഫിക്കേഷനുകൾക്ക് അനുമതി നൽകുമെന്ന പ്രഖ്യാപനം ചെറുപ്പക്കാർക്കിടയിലും വാഹന പ്രേമികൾക്കിടയിലും വലിയ തരംഗമായിരുന്നു. വാഗ്ദാനങ്ങൾ പാലിക്കുന്നതിനെക്കുറിച്ചുള്ള മാധ്യമ ചോദ്യങ്ങൾക്ക് മുൻപ് ഉണ്ടായ മറുപടികളും മുഖഭാവങ്ങളും സോഷ്യൽ മീഡിയയിൽ വലിയ രീതിയിൽ വൈറലാവുകയും പല തരത്തിലുള്ള ട്രോളുകൾക്കും ചർച്ചകൾക്കും വഴിതുറക്കുകയും ചെയ്തു. കേന്ദ്രത്തിന്റെ കടുപ്പമേറിയ നിയമങ്ങൾ നിലനിൽക്കെ, എംവിഡി സർക്കാരിന് സമർപ്പിക്കുന്ന അന്തിമ റിപ്പോർട്ടിൽ യുവാക്കൾ പ്രതീക്ഷിക്കുന്ന ഇളവുകൾ ഉണ്ടാകുമോ എന്നാണ് ഇനി അറിയേണ്ടത്.
MVD to Submit Vehicle Modification Report to Govt
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
