ഹാലിഫാക്സ്: റോഡപകടങ്ങൾ കുറയ്ക്കാനും സൈക്കിൾ യാത്രികർ ഉൾപ്പെടെയുള്ളവരുടെ സുരക്ഷ ഉറപ്പാക്കാനും ലക്ഷ്യമിട്ട് കർശന നിയമനിർമ്മാണത്തിനൊരുങ്ങി നോവ സ്കോഷ്യ സർക്കാർ. ഈ വരുന്ന ശരത്കാലത്തോടെ നടപ്പിലാക്കാൻ ഉദ്ദേശിക്കുന്ന പുതിയ ‘ട്രാൻസ്പോർട്ടേഷൻ സേഫ്റ്റി ആക്ട്’ പ്രകാരം ഇ-ബൈക്കുകൾ ഉപയോഗിക്കുന്നതിനുള്ള കുറഞ്ഞ പ്രായപരിധി 14 വയസ്സായി ഉയർത്തും.
സാധാരണ സൈക്കിളുകളിൽ നിന്ന് വ്യത്യസ്തമായി മണിക്കൂറിൽ 32 കിലോമീറ്റർ വരെ വേഗതയിൽ സഞ്ചരിക്കാൻ ഇ-ബൈക്കുകൾക്ക് സാധിക്കുമെന്നും, അതിനാൽ തന്നെ കൊച്ചു കുട്ടികൾ ഇത് ഉപയോഗിക്കുന്നത് അപകടസാധ്യത വർദ്ധിപ്പിക്കുന്നുവെന്നും പബ്ലിക് വർക്സ് മന്ത്രി ഫ്രെഡ് ടില്ലി വ്യക്തമാക്കി. 2022-ൽ ഇ-സ്കൂട്ടറുകൾക്ക് ഏർപ്പെടുത്തിയ അതേ പ്രായപരിധിയാണ് ഇപ്പോൾ ഇ-ബൈക്കുകൾക്കും ബാധകമാക്കുന്നത്.
റോഡരികിൽ നിർത്തിയിട്ടിരിക്കുന്ന വാഹനങ്ങളുടെ വാതിലുകൾ ശ്രദ്ധിക്കാതെ പെട്ടെന്ന് തുറന്ന് സൈക്കിൾ യാത്രികരെ അപകടത്തിൽപ്പെടുത്തുന്ന ‘ഡോറിങ്’ ഇനിമുതൽ കടുത്ത പിഴ ലഭിക്കാവുന്ന ശിക്ഷാർഹമായ കുറ്റമായി മാറും. വർഷങ്ങളായി സൈക്കിൾ പ്രേമികളും വിവിധ സംഘടനകളും ആവശ്യപ്പെടുന്ന നിയമമാണിത്. കഴിഞ്ഞ ജൂലൈ 17-ന് ഡൽഹൗസി യൂണിവേഴ്സിറ്റിയിലെ പ്രൊഫസറായ ഡോ. നൗമാൻ അലി (71) സമാനമായ രീതിയിൽ ട്രക്കിന്റെ വാതിൽ തട്ടി കൊല്ലപ്പെട്ടിരുന്നു. ഈ സംഭവത്തിന്റെ പശ്ചാത്തലത്തിൽ കൂടിയാണ് സർക്കാർ പുതിയ നിയമങ്ങൾ വേഗത്തിലാക്കുന്നത്. വലിയ വാഹനങ്ങൾ മൂലമുണ്ടാകുന്ന അപകട മരണങ്ങളിൽ സമഗ്രമായ അന്വേഷണം നടത്തണമെന്ന ആവശ്യവും ശക്തമാണ്. അതേസമയം, 14 വയസ്സിൽ താഴെയുള്ള കുട്ടികൾക്ക് ഇലക്ട്രിക് അല്ലാത്ത സാധാരണ സൈക്കിളുകളും സ്കൂട്ടറുകളും നടപ്പാതകളിൽ ഉപയോഗിക്കാൻ പുതിയ നിയമം അനുമതി നൽകുന്നുണ്ട്.
Reining in road menaces: New regulations coming for e-bike usage and 'doring'
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
