സസ്കാറ്റൂൺ: നഗരത്തിൽ പുകവലി നിയന്ത്രണങ്ങൾ കൂടുതൽ കർശനമാക്കാൻ സസ്കാറ്റൂൺ. ബുധനാഴ്ച ചേർന്ന സിറ്റി കൗൺസിലിന്റെ പ്ലാനിങ്, ഡെവലപ്മെന്റ് ആൻഡ് കമ്മ്യൂണിറ്റി സർവീസസ് കമ്മിറ്റി യോഗത്തിലാണ് ബൈലോയിൽ മാറ്റങ്ങൾ വരുത്താനുള്ള നിർദേശങ്ങൾക്ക് ഏകകണ്ഠമായി അംഗീകാരം നൽകിയത്. ഈ മാസം അവസാനം നടക്കുന്ന സിറ്റി കൗൺസിൽ യോഗം നിർദേശം പൂർണ്ണമായി അംഗീകരിക്കുകയാണെങ്കിൽ, കെട്ടിടങ്ങളുടെ ഗേറ്റ്, ജനൽ, എയർ ഇൻടേക്ക് എന്നിവയ്ക്ക് സമീപം പുകവലിക്കുന്നവർ നിലവിലുള്ള 3 മീറ്ററിന് പകരം 10 മീറ്റർ അകലെ മാറിനിൽക്കേണ്ടി വരും.
നിലവിലുള്ള പ്രവിശ്യാ നിയമപ്രകാരം 3 മീറ്ററാണ് പുകവലി നിരോധിത പരിധി. എന്നാൽ റെജീന, എഡ്മന്റൻ എന്നീ നഗരങ്ങളിൽ നിലവിലുള്ളതിന് സമാനമായി 10 മീറ്ററിലേക്ക് ദൂരം വർധിപ്പിക്കാനാണ് സസ്കാറ്റൂണിലെയും നീക്കം. പുതിയ മാറ്റം നടപ്പിലാകുന്നതോടെ ഡൗൺടൗൺ, ബ്രോഡ്വേ, റിവേഴ്സ്ഡെയ്ൽ എന്നീ പ്രധാന വാണിജ്യ മേഖലകളിലെ ഭൂരിഭാഗം സ്ഥലങ്ങളും പുകവലി നിരോധിത മേഖലകളായി മാറും. നിർദേശത്തോട് റിവേഴ്സ്ഡെയ്ൽ ബിസിനസ് ഇംപ്രൂവ്മെന്റ് ഡിസ്ട്രിക്റ്റ് എതിർപ്പ് പ്രകടിപ്പിച്ചിട്ടുണ്ടെങ്കിലും, പൊതുജനാരോഗ്യം മുൻനിർത്തി നിയന്ത്രണം നല്ല തീരുമാനമാണ് മേയർ സിന്തിയ ബ്ലോക്ക് വ്യക്തമാക്കി.
സസ്കാറ്റൂൺ പോലീസിനാണ് നിലവിൽ ഈ നിയമങ്ങൾ നടപ്പിലാക്കാനുള്ള ചുമതല നൽകിയിട്ടുള്ളത്. സ്കൂളുകൾക്ക് സമീപം നിയമലംഘനം നടത്തുന്നവർക്കെതിരെ പ്രതിവർഷം 15 മുതൽ 25 വരെ പിഴ നോട്ടീസുകൾ പോലീസ് നൽകാറുണ്ട്. ഈ മാസം അവസാനം നടക്കുന്ന കൗൺസിൽ യോഗത്തിൽ അന്തിമാനുമതി ലഭിച്ചാൽ, പുതിയ നിയന്ത്രണങ്ങൾ 2027 ജനുവരി 1 മുതൽ പ്രാബല്യത്തിൽ വരും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Not 3 meters, but 10 meters now: Saskatoon to tighten smoking restrictions.
