റെജീന: റീജിയണൽ തൊഴിലാളി യൂണിയനുമായുള്ള കരാർ ചർച്ചകൾ പുരോഗമിക്കവേ, തങ്ങളുടെ റെജീന റിഫൈനറിക്ക് സമീപം 510 കിടക്കകളുള്ള കൂറ്റൻ താൽക്കാലിക വർക്ക് ക്യാമ്പ് നിർമ്മിക്കാൻ അനുമതി തേടി ഫെഡറേറ്റഡ് കോ-ഓപ്പ് ലിമിറ്റഡ് (FCL).
റിഫൈനറിയുടെ തുടർച്ചയായ പ്രവർത്തനം, അറ്റകുറ്റപ്പണികൾ എന്നിവയ്ക്ക് അധിക ജീവനക്കാരെ ആവശ്യമായി വരികയാണെങ്കിൽ ഉപയോഗിക്കാനാണ് ഈ സൗകര്യമെന്നാണ് എഫ്.സി.എൽ വക്താവ് ബ്രാഡ് ഡി ലോറി വിശദീകരിക്കുന്നത്. എന്നാൽ, ഭാവിയിൽ തൊഴിൽ തർക്കങ്ങളോ സമരങ്ങളോ ഉണ്ടായാൽ അത് നേരിടാൻ പകരം ജീവനക്കാരെ താമസിപ്പിക്കാനും ഈ ക്യാമ്പ് ഉപയോഗിച്ചേക്കാമെന്ന് കമ്പനി സൂചന നൽകുന്നുണ്ട്.
തൊഴിലാളി സംഘടനയായ ‘യൂണിഫോർ ലോക്കൽ 594’ ആണ് റിഫൈനറിയിലെ 700-ലധികം വരുന്ന തൊഴിലാളികളെ പ്രതിനിധീകരിക്കുന്നത്. നിലവിലെ കരാർ കാലാവധി അവസാനിച്ചതിനെ തുടർന്ന് പുതിയ കരാറിനായുള്ള ചർച്ചകൾ ഇരുവിഭാഗവും തമ്മിൽ നടന്നു വരികയാണ്.
കമ്പനിയുടെ ഈ നീക്കത്തിനെതിരെ ‘സസ്കാച്ചെവൻ ഫെഡറേഷൻ ഓഫ് ലേബർ’ (SFL) ശക്തമായ പ്രതിഷേധവുമായി രംഗത്തെത്തി. കമ്പനി നിർമ്മിക്കാൻ ഉദ്ദേശിക്കുന്നത് സമരം പൊളിക്കാൻ ആളുകളെ താമസിപ്പിക്കുന്ന “സ്കാബ് ക്യാമ്പ്” ആണെന്ന് ആരോപിച്ച സംഘടന, പദ്ധതിക്കെതിരെ പൊതുജനങ്ങൾ പ്രതിഷേധിക്കണമെന്നും സിറ്റി കൗൺസിലിന്റെ പബ്ലിക് റിവ്യൂ പ്രക്രിയയിൽ പങ്കാളികളാകണമെന്നും ആഹ്വാനം ചെയ്തു.
മക്ഡൊണാൾഡ് സ്ട്രീറ്റിന് വടക്കും ഫ്ലീറ്റ് സ്ട്രീറ്റിന് പടിഞ്ഞാറുമായി റിഫൈനറിക്ക് കിഴക്കുഭാഗത്താണ് ക്യാമ്പ് നിർമ്മിക്കാൻ നിർദ്ദേശിച്ചിരിക്കുന്നത്. 20-ൽ കൂടുതൽ കിടക്കകളുള്ള ഇത്തരം വർക്ക് ക്യാമ്പുകൾക്ക് റെജീന സിറ്റി കൗൺസിലിന്റെ പ്രത്യേക അനുമതി ആവശ്യമാണ്. പൊതുജനങ്ങളുടെ അഭിപ്രായ രൂപീകരണത്തിന് ശേഷം സിറ്റി അഡ്മിനിസ്ട്രേഷൻ കൗൺസിലിന് റിപ്പോർട്ട് സമർപ്പിക്കും.
മുമ്പ് 2019-ൽ ഇതേ വിഷയത്തിൽ കമ്പനിയും തൊഴിലാളികളും തമ്മിൽ കടുത്ത തർക്കമുണ്ടാവുകയും, ആറുമാസത്തോളം നീണ്ടുനിന്ന വലിയ തൊഴിലാളി സമരം ശ്രദ്ധ നേടുകയും ചെയ്തിരുന്നു. അന്ന് പകരം ജീവനക്കാരെ ഇറക്കുന്നതിനെതിരെ യൂണിയൻ പ്രവർത്തകർ റിഫൈനറിയിലേക്കുള്ള ട്രക്കുകൾ തടയുകയും, ദേശീയ നേതാക്കളടക്കം 14 ഓളം പേർ അറസ്റ്റിലാവുകയും ചെയ്തിരുന്നു. തുടർന്ന് 2020 ജൂണിലാണ് ഇരുവിഭാഗവും പുതിയ കരാറിൽ ഒപ്പുവെച്ചത്.
Regina Co-op refinery seeking approval for 510 bed temporary work camp
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
