നിങ്ങൾ അറിഞ്ഞോ? ഒന്റാറിയോ ‘വർക്ക്ഫോഴ്സ് പ്രയോറിറ്റി സ്ട്രീം’ പോർട്ടൽ പ്രവർത്തനം ആരംഭിച്ചു

ഒന്റാറിയോ: ഒന്റാറിയോ ഇമിഗ്രേഷൻ നോമിനി പ്രോഗ്രാമിന്റെ (OINP) ഭാഗമായ പുതിയ ‘ഒന്റാറിയോ വർക്ക്ഫോഴ്‌സ് പ്രയോറിറ്റി സ്ട്രീം’ വഴിയുള്ള അപേക്ഷകൾ സ്വീകരിക്കുന്നതിനായി എക്‌സ്പ്രഷൻ ഓഫ് ഇൻട്രസ്റ്റ് (EOI) പോർട്ടൽ പ്രവർത്തനം ആരംഭിച്ചു. നാഷണൽ ഒക്യുപേഷണൽ ക്ലാസിഫിക്കേഷനിലെ (NOC) എല്ലാ TEER (Training, Education, Experience and Responsibilities) വിഭാഗങ്ങളിലുമുള്ള (TEER 0 മുതൽ 5 വരെ) തൊഴിൽ ഓഫറുകളുള്ള വിദേശ തൊഴിലാളികൾക്ക് ഈ പുതിയ സ്ട്രീം വഴി അപേക്ഷിക്കാൻ അവസരമുണ്ട്. കൂടാതെ, തൊഴിൽ ഓഫറുകളില്ലാത്ത സ്വയം തൊഴിൽ ചെയ്യുന്ന ഡോക്ടർമാർക്കും ഈ പ്രോഗ്രാമിലൂടെ സ്ഥിരതാമസത്തിന് വഴി തെളിയുന്നു.

തൊഴിൽ വിപണിയിലെ ഒഴിവുകൾ നികത്താൻ സഹായിക്കുന്ന പദ്ധതിയായതിനാൽ, അപേക്ഷിക്കുന്നതിന് മുന്നോടിയായി അപേക്ഷകരും തൊഴിൽദാതാക്കളും ഒന്റാറിയോ സർക്കാരിന്റെ യോഗ്യതാ മാനദണ്ഡങ്ങൾ പരിശോധിച്ച് ഉറപ്പുവരുത്തണമെന്ന് അധികൃതർ നിർദ്ദേശിച്ചിട്ടുണ്ട്. ഇതിനായി OINP ഔദ്യോഗിക വെബ്‌സൈറ്റിലെ അപേക്ഷാ വിവരങ്ങളും മാർഗ്ഗനിർദ്ദേശങ്ങളും പൂർണ്ണമായും പുതുക്കിയിട്ടുണ്ട്.

OINP വഴി നോമിനേഷന് അപേക്ഷിക്കുന്നതിനായി ഉദ്യോഗാർത്ഥികൾ ആദ്യം ‘എക്‌സ്പ്രഷൻ ഓഫ് ഇൻട്രസ്റ്റ്’ സിസ്റ്റം വഴി വിവരങ്ങൾ രജിസ്റ്റർ ചെയ്യേണ്ടതുണ്ട്. EOI രജിസ്ട്രേഷൻ പൂർണ്ണമായും സൗജന്യമാണ്. രജിസ്റ്റർ ചെയ്യുന്ന അപേക്ഷകരുടെ വിദ്യാഭ്യാസം, ഭാഷാ പ്രാവീണ്യം, തൊഴിൽ പരിചയം, ഒന്റാറിയോയിലെ ജോലി ഓഫർ എന്നിവയുടെ അടിസ്ഥാനത്തിൽ അപേക്ഷകരെ റാങ്ക് ചെയ്യുകയും, ഇതിൽ നിന്ന് തിരഞ്ഞെടുക്കപ്പെടുന്നവർക്ക് അപേക്ഷിക്കാനുള്ള ഔദ്യോഗിക ക്ഷണം നൽകുകയും ചെയ്യും.

EOI രജിസ്ട്രേഷന് സമർപ്പിച്ച തീയതി മുതൽ 12 മാസത്തെ സാധുതയുണ്ടായിരിക്കും. ഈ കാലയളവിനുള്ളിൽ ക്ഷണം ലഭിച്ചില്ലെങ്കിൽ അപേക്ഷ രജിസ്ട്രേഷൻ പൂളിൽ നിന്ന് സ്വയം നീക്കം ചെയ്യപ്പെടും. അപേക്ഷിക്കാൻ ക്ഷണ ലഭിക്കുന്ന ഉദ്യോഗാർത്ഥികൾ നിർദ്ദിഷ്ട സമയപരിധിക്കുള്ളിൽ അപേക്ഷാ ഫീസ് അടച്ച് നടപടികൾ പൂർത്തിയാക്കേണ്ടതുണ്ട്. ജോബ് ഓഫർ അടിസ്ഥാനമാക്കിയുള്ള സ്ട്രീമുകളിൽ ക്ഷണം ലഭിച്ചാൽ 17 കലണ്ടർ ദിവസങ്ങൾക്കുള്ളിൽ അപേക്ഷ സമർപ്പിക്കണം.

അപേക്ഷകർക്ക് ഫെഡറൽ ഗവൺമെന്റിന്റെ എക്സ്പ്രസ് എൻട്രി അഥവാ നോൺ-എക്സ്പ്രസ് എൻട്രി വഴികളിലൂടെ സ്ഥിരതാമസത്തിന് അപേക്ഷിക്കാവുന്നതാണ്. EOI പ്രൊഫൈലിലും അപേക്ഷയിലും നൽകുന്ന വിവരങ്ങൾ പൂർണ്ണമായും സത്യസന്ധമായിരിക്കണമെന്ന് അധികൃതർ കർശന മുന്നറിയിപ്പ് നൽകുന്നു. തെറ്റായ വിവരങ്ങൾ നൽകുന്നത് അപേക്ഷ നിരസിക്കപ്പെടുന്നതിനും, തുടർന്ന് കാനഡയിലേക്ക് അപേക്ഷിക്കുന്നതിൽ നിന്ന് അഞ്ച് വർഷം വരെ വിലക്ക് നേരിടുന്നതിനും കാരണമാകും. കൂടാതെ, ONe-key ലോഗിൻ ഉപയോഗിക്കുന്ന ഉപയോക്താക്കൾ പുതിയ Ontario.ca ലോഗിനിലേക്ക് മാറണമെന്നും നിർദ്ദേശമുണ്ട്. കൂടുതൽ വിവരങ്ങൾക്ക് ഒന്റാറിയോ സർക്കാരിന്റെ ഔദ്യോഗിക വെബ്‌സൈറ്റ് സന്ദർശിക്കാവുന്നതാണ്.

 The Ontario 'Workforce Priority Stream' portal has launched.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla