ചില്ലിവാക്ക് : ബ്രിട്ടീഷ് കൊളംബിയയിലുള്ള ചില്ലിവാക്ക് എയർപോർട്ടിന് സമീപം ആകാശത്തുവെച്ച് രണ്ട് വിമാനങ്ങൾ കൂട്ടിയിടിച്ചു. രണ്ട് ഫ്ലൈയിംഗ് സ്കൂളുകളിൽ നിന്നുള്ള വിമാനങ്ങളാണ് അപകടത്തിൽപ്പെട്ടത്. എന്നാൽ, ഭാഗ്യം കൊണ്ട് മാത്രമാണ് വലിയൊരു ദുരന്തം ഒഴിവായതെന്ന് അധികൃതർ അറിയിച്ചു.
തിങ്കളാഴ്ച നടന്ന അപകടത്തിൽപ്പെട്ട ഒരു വിമാനം സുരക്ഷിതമായി ചില്ലിവാക്ക് എയർപോർട്ടിൽ അടിയന്തര ലാൻഡിംഗ് നടത്തി. ഈ വിമാനത്തിൽ രണ്ട് പേരുണ്ടായിരുന്നു. എന്നാൽ, രണ്ടാമത്തെ വിമാനം സമീപത്തുള്ള ക്വാറിയിലെ വെള്ളക്കെട്ടിലേക്ക് (ലഗൂൺ) പതിക്കുകയായിരുന്നു. ഇതിൽ ഒരാളാണ് ഉണ്ടായിരുന്നതെന്ന് എയർപോർട്ട് അധികൃതർ വ്യക്തമാക്കി. ഇതുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല.
അപകടത്തെക്കുറിച്ച് വിവരമറിഞ്ഞയുടൻ അഞ്ച് ആംബുലൻസുകൾ സംഭവസ്ഥലത്തേക്ക് എത്തിയതായി ബി.സി എമർജൻസി ഹെൽത്ത് സർവീസസ് അറിയിച്ചു. എങ്കിലും, ആരെയും ഗുരുതര പരിക്കുകളോടെ ആശുപത്രിയിൽ പ്രവേശിപ്പിക്കേണ്ടി വന്നിട്ടില്ലെന്നാണ് പ്രാഥമിക വിവരം. അപകടത്തിന്റെ കാരണം വ്യക്തമല്ലെന്നും അന്വേഷണം ആരംഭിച്ചിട്ടുണ്ടെന്നും പൊലീസ് അറിയിച്ചു. വാൻകൂവറിൽ നിന്നും ഏകദേശം 100 കിലോമീറ്റർ കിഴക്ക് മാറിയാണ് ചില്ലിവാക്ക് സ്ഥിതി ചെയ്യുന്നത്.
Two planes crash mid-air near Chilliwack airport
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
