ഷാർലറ്റ്ടൗൺ : പ്രിൻസ് എഡ്വേർഡ് ഐലൻഡിൽ സാധാരണക്കാർക്ക് നിയമോപദേശവും കോടതി പ്രാതിനിധ്യവും ഉറപ്പാക്കാൻ സൗജന്യ കമ്യൂണിറ്റി ലീഗൽ ക്ലിനിക്ക് പ്രവർത്തനം ആരംഭിച്ചു. ഷാർലറ്റ്ടൗണിലെ ഗ്രാഫ്റ്റൺ സ്ട്രീറ്റിലാണ് ആദ്യ കേന്ദ്രം തുറന്നിരിക്കുന്നത്. നിലവിൽ അഭിഭാഷകരുടെ സേവനം തേടുക എന്നത് സാധാരണക്കാർക്ക് ഏറെ പ്രയാസകരമാണെന്നും ഈ സംരംഭം ജനങ്ങളുടെ ജീവിതത്തിൽ വലിയ മാറ്റമുണ്ടാക്കുമെന്നും ‘കമ്യൂണിറ്റി ലീഗൽ ഇൻഫർമേഷൻ’ ലീഗൽ ഡയറക്ടർ ആൻഡ്രൂ മക്ഡൊണാൾഡ് പറഞ്ഞു. ഇതുവരെ പൊതുവായ നിയമ വിവരങ്ങൾ നൽകുന്നതിൽ മാത്രം ഒതുങ്ങിയിരുന്ന സ്ഥാപനത്തിന്, രണ്ട് അഭിഭാഷകരെ നിയമിച്ചതോടെ നേരിട്ട് കേസ് നടത്തുന്നതിനും ഉപദേശം നൽകുന്നതിനുമുള്ള ശേഷി കൈവന്നിട്ടുണ്ട്.
18 വയസ്സോ അതിൽ കൂടുതലോ പ്രായമുള്ള പ്രവിശ്യാ നിവാസികൾക്കാണ് സ്ഥാപനത്തിന്റെ ഔദ്യോഗിക വെബ്സൈറ്റിലെ മാനദണ്ഡങ്ങൾക്ക് വിധേയമായി ഈ സേവനം ലഭ്യമാകുക. വരുമാനവും തൊഴിലും, വാടകക്കാരുടെ അവകാശങ്ങൾ, എസ്റ്റേറ്റ് പ്ലാനിങ്, പ്രത്യേക പരിഗണന അർഹിക്കുന്നവരുടെ കേസ് തുടങ്ങിയ നാല് പ്രധാന മേഖലകളിലാണ് ക്ലിനിക്ക് ശ്രദ്ധ കേന്ദ്രീകരിക്കുന്നത്. നഗരപ്രദേശങ്ങൾക്ക് പുറത്തുള്ള ഗ്രാമീണ നിവാസികൾക്കും സഹായം എത്തിക്കുന്നതിനായി സംസ്ഥാനത്തുടനീളം ‘പോപ്പ്-അപ്പ്’ ക്ലിനിക്കുകൾ നടത്താനും തീരുമാനിച്ചിട്ടുണ്ട്. ആദ്യ വർഷം ഇത്തരത്തിലുള്ള രണ്ടോ മൂന്നോ ക്യാമ്പുകൾ നടത്താനാണ് ലക്ഷ്യമിടുന്നത്.
പ്രിൻസ് എഡ്വേർഡ് ഐലൻഡ് ലാ ഫൗണ്ടേഷൻ, പ്രവിശ്യാ നീതിന്യായ പൊതുസുരക്ഷാ വകുപ്പ് എന്നിവയുടെ സഹകരണത്തോടെയാണ് പദ്ധതി നടപ്പിലാക്കുന്നത്. അടുത്ത അഞ്ച് വർഷത്തേക്ക് കൃത്യമായ സാമ്പത്തിക സഹായം ഉറപ്പാക്കിയിട്ടുണ്ടെന്നും, ഭാവിയിൽ കൂടുതൽ ആളുകളിലേക്ക് സേവനം വ്യാപിപ്പിക്കാൻ ഇത് സഹായിക്കുമെന്നും ആൻഡ്രൂ മക്ഡൊണാൾഡ് വ്യക്തമാക്കി. സാധാരണക്കാർക്ക് നീതി ലഭ്യമാക്കാൻ ഈ കൂട്ടായ്മ വലിയൊരു പടിയാകുമെന്നാണ് വിലയിരുത്തപ്പെടുന്നത്.
Relief for ordinary people: Legal clinic offers free legal aid in PEI!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
