ശിവസാഗർ: അസമിൽ പ്രളയ സ്ഥിതി രൂക്ഷമായി തുടരുന്നു. സംസ്ഥാനത്ത് പ്രളയത്തിൽപ്പെട്ട് മരിച്ചവരുടെ എണ്ണം 78 ആയി ഉയർന്നതായി ഏറ്റവും പുതിയ ഔദ്യോഗിക കണക്കുകൾ വ്യക്തമാക്കുന്നു. ഒടുവിൽ പുറത്തുവന്ന റിപ്പോർട്ടുകൾ പ്രകാരം ശിവസാഗറിൽ രണ്ടും ഗൊലാഘട്ടിൽ ഒന്നും എന്നിങ്ങനെ മൂന്ന് മരണങ്ങൾ കൂടി പുതിയതായി സ്ഥിരീകരിച്ചു. നിലവിൽ ഏഴ് ജില്ലകളിലായി മൂന്ന് ലക്ഷത്തിലധികം ആളുകളെ പ്രളയം നേരിട്ട് ബാധിച്ചിട്ടുണ്ട്.
ശിവസാഗർ, ചരൈഡിയോ, ഗൊലാഘട്ട്, ജോർഹാട്ട്, നഗാവ്, ബിശ്വനാഥ്, കാംരൂപ് (മെട്രോ) എന്നീ ഏഴ് ജില്ലകളെയാണ് പ്രളയം സാരമായി ബാധിച്ചത്. ഈ ജില്ലകളിലായി 21 റവന്യൂ സർക്കിളുകളും 551 ഗ്രാമങ്ങളും വെള്ളത്തിനടിയിലാണ്. കൂടാതെ 21,523.08 ഹെക്ടർ കൃഷിഭൂമിയെ പ്രളയജലം ബാധിച്ചതായും അധികൃതർ അറിയിച്ചു. കാംരൂപ് മെട്രോയിൽ നഗരപ്രദേശങ്ങളിലെ വെള്ളക്കെട്ടും പ്രളയസമാനമായ സാഹചര്യം സൃഷ്ടിച്ചിട്ടുണ്ട്.
പ്രളയബാധിതർക്കായി അസം സർക്കാർ ദുരിതാശ്വാസ പ്രവർത്തനങ്ങൾ ഊർജ്ജിതമാക്കിയിട്ടുണ്ട്. ഭക്ഷ്യവസ്തുക്കളും വസ്ത്രങ്ങളും അടക്കമുള്ള അടിയന്തര സഹായങ്ങളുമായി 30 ട്രക്കുകൾ ദുരിതാശ്വാസ മേഖലകളിലേക്ക് അയച്ചതായി മന്ത്രി അതുൽ ബോറ വ്യക്തമാക്കി. പ്രളയബാധിത കുടുംബങ്ങൾക്ക് 15,000 രൂപ വീതം ധനസഹായം നൽകുന്നുണ്ടെന്നും ദുരിതാശ്വാസ പ്രവർത്തനങ്ങൾ തുടരുമെന്നും സർക്കാർ അറിയിച്ചു.
Floods in Assam: Death toll rises to 78; Over 21,000 hectares of agricultural land submerged
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
