കനേഡിയൻ വ്യോമാതിർത്തി വഴി നേതന്യാഹുവിന്റെ യാത്ര: അനുമതി തേടിയെന്ന് ഇസ്രായേൽ, മൗനം പാലിച്ച് മാർക്ക് കാർണി സർക്കാർ

ഒട്ടാവ: അന്താരാഷ്ട്ര ക്രിമിനൽ കോടതി (ഐസിസി) അറസ്റ്റ് വാറന്റ് പുറപ്പെടുവിച്ചിട്ടുള്ള ഇസ്രായേൽ പ്രധാനമന്ത്രി ബെഞ്ചമിൻ നേതന്യാഹുവിന് രാജ്യത്തിന്റെ വ്യോമാതിർത്തി ഉപയോഗിക്കാൻ അനുമതി നൽകിയോ എന്ന വിഷയത്തിൽ കനേഡിയൻ സർക്കാർ വ്യക്തത വരുത്തിയില്ല. തങ്ങൾ കാനഡയോട് ഇതിനായി അനുമതി തേടിയിരുന്നതായി ഇസ്രായേൽ സർക്കാർ വക്താവ് mമാധ്യമങ്ങളോട് സ്ഥിരീകരിച്ചെങ്കിലും, ഈ അനുമതി ലഭിച്ചോ എന്ന ചോദ്യത്തോട് പ്രതികരിച്ചില്ല.

അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള കൂടിക്കാഴ്ചയ്ക്കും അന്തരിച്ച റിപ്പബ്ലിക്കൻ സെനറ്റർ ലിൻഡ്സെ ഗ്രഹാമിന്റെ സംസ്കാര ചടങ്ങിൽ പങ്കെടുക്കുന്നതിനുമായി വാഷിംഗ്ടണിലേക്ക് പോകുന്നതിനിടെയാണ് നേതന്യാഹു സഞ്ചരിച്ച ‘വിംഗ് ഓഫ് സീയോൻ’ വിമാനം ന്യൂഫൗണ്ട്‌ലാൻഡ്, നോവ സ്കോഷ്യ പ്രദേശങ്ങൾക്ക് മുകളിലൂടെ പറന്നത്.

നേതന്യാഹു കാനഡയിലെത്തിയാൽ അറസ്റ്റ് ചെയ്യുമെന്ന് പ്രധാനമന്ത്രി മാർക്ക് കാർണിയും മുൻ പ്രധാനമന്ത്രി ജസ്റ്റിൻ ട്രൂഡോയും നേരത്തെ വ്യക്തമാക്കിയിരുന്നു. എന്നാൽ ഈ വിഷയത്തിൽ കാനഡ അനുമതി നൽകിയിട്ടുണ്ടോ എന്ന് പറയാൻ പ്രധാനമന്ത്രിയുടെ ഓഫീസ് വക്താവ് ഓഡ്രി ഷാംപൂ വിസമ്മതിച്ചു. നിലവിൽ കാനഡ തങ്ങളുടെ വ്യോമാതിർത്തി നയം ക്രമസമാധാന ലക്ഷ്യങ്ങളുമായി ബന്ധിപ്പിക്കുന്നില്ലെന്നും സുരക്ഷാ ഭീഷണിയുള്ള സാഹചര്യങ്ങളിൽ മാത്രമാണ് ഇതിൽ മാറ്റം വരുത്തുന്നതെന്നും അവർ അറിയിച്ചു. ഇതിനൊപ്പം ഇസ്രായേൽ അന്താരാഷ്ട്ര നിയമങ്ങൾ പാലിക്കണമെന്നും വെടിനിർത്തൽ വ്യവസ്ഥകൾ അംഗീകരിച്ച് ഗാസയിലേക്ക് മാനുഷിക സഹായം അനുവദിക്കണമെന്നും വക്താവ് കൂട്ടിച്ചേർത്തു.

വിദേശ സർക്കാർ വിമാനത്തിന് കനേഡിയൻ വ്യോമാതിർത്തിയിൽ പ്രവേശിക്കാൻ കുറഞ്ഞത് 72 മണിക്കൂർ മുമ്പെങ്കിലും അനുമതി തേടേണ്ടതുണ്ടെന്ന് കാനഡയുടെ ഔദ്യോഗിക ചട്ടങ്ങൾ വ്യക്തമാക്കുന്നു. ഏതൊരു രാജ്യത്തിന്റെയും ഭൂപ്രദേശത്തിന് മുകളിലുള്ള വ്യോമാതിർത്തി ആ രാജ്യത്തിന്റെ പരമാധികാരത്തിന് കീഴിലാണെന്നും അവിടെ അവിടുത്തെ നിയമങ്ങൾ ബാധകമാണെന്നും അന്താരാഷ്ട്ര നിയമവിദഗ്ദ്ധർ ചൂണ്ടിക്കാണിക്കുന്നു. അതിനാൽ നേതന്യാഹു കാനഡയിൽ വിമാനം ഇറക്കിയില്ലെങ്കിലും, കനേഡിയൻ വ്യോമാതിർത്തി ഉപയോഗിക്കാൻ അനുവദിക്കുന്നത് അന്താരാഷ്ട്ര നിയമങ്ങളെയും കാനഡയുടെ പരമാധികാരത്തെയും ബാധിക്കുമെന്ന വിമർശനവും ഉയരുന്നുണ്ട്.

നേരത്തെ സെപ്റ്റംബറിൽ ഇസ്രായേൽ വിമാനങ്ങൾ കനേഡിയൻ വ്യോമാതിർത്തി ഒഴിവാക്കി ദീർഘദൂര പാതയിലൂടെയാണ് സഞ്ചരിച്ചിരുന്നത്. എന്നാൽ ഡിസംബർ, ഫെബ്രുവരി മാസങ്ങളിലും തുടർന്ന് ഇപ്പോഴും കനേഡിയൻ വ്യോമാതിർത്തിയിലൂടെയാണ് ഇസ്രായേൽ പ്രധാനമന്ത്രി യാത്ര ചെയ്തത്. കാനഡ അനുമതി നിഷേധിച്ചിട്ടും ഇസ്രായേൽ അത് ലംഘിച്ചതാണോ അതോ കാനഡ അനുമതി നൽകിയതാണോ എന്ന കാര്യത്തിൽ സർക്കാരുകളുടെ ഭാഗത്തുനിന്ന് വ്യക്തമായ ഔദ്യോഗിക വിശദീകരണം പുറത്തുവന്നിട്ടില്ല.

Netanyahu’s travel through Canadian airspace: Israel says it sought permission, Mark Carney’s government remains silent

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla