ഹാലിഫാക്സ്: നോവ സ്കോഷ്യയിൽ കൃഷിക്കും തോട്ടങ്ങൾക്കും വൻ ഭീഷണിയായ ‘ജാപ്പനീസ് വണ്ടുകളെ’ നശിപ്പിക്കാൻ പ്രകൃതിദത്തമായ മാർഗം കണ്ടെത്തിയെന്ന പ്രതീക്ഷയിൽ ഗവേഷകരും കർഷകരും. ഇവിടുത്തെ ജാപ്പനീസ് വണ്ടുകളുടെ ശരീരത്തിൽ ചെറിയ വെളുത്ത പുള്ളികൾ കണ്ടെത്തിയിട്ടുണ്ട്. ഇത് വണ്ടുകളെ നശിപ്പിക്കുന്ന ‘വിൻസം ഫ്ലൈ’ (Winsome fly) എന്ന പരാദ ഈച്ചകളുടെ മുട്ടകളാണെന്നാണ് ഗവേഷകരുടെ പ്രാഥമിക നിഗമനം. നിലവിൽ ഡൽഹൗസി സർവകലാശാലയിലെ ഗവേഷകർ ഡി.എൻ.എ പരിശോധനയിലൂടെ ഇത് വിൻസം ഫ്ലൈ തന്നെയാണോ എന്ന് സ്ഥിരീകരിക്കാനുള്ള ശ്രമത്തിലാണ്.
വിദേശത്തുനിന്നെത്തി പച്ചപ്പുകൾ കാർന്നുതിന്നുന്ന ജാപ്പനീസ് വണ്ടുകൾ നോവ സ്കോഷ്യയിലെ ചെടികൾക്കും മരങ്ങൾക്കും വലിയ നാശമാണ് ഉണ്ടാക്കുന്നത്. സാധാരണ ഈച്ചകളുടെ വലുപ്പമുള്ള വിൻസം ഫ്ലൈകൾ ഈ വണ്ടുകളുടെ ശരീരത്തിൽ, പ്രത്യേകിച്ച് തലയ്ക്ക് പിന്നിലായി മുട്ടയിടുകയാണ് ചെയ്യുന്നത്. ദിവസങ്ങൾക്കകം മുട്ട വിരിഞ്ഞിറങ്ങുന്ന ലാർവകൾ വണ്ടിന്റെ ശരീരത്തിനുള്ളിലേക്ക് കടന്ന് അവയെ നശിപ്പിക്കുന്നു. ഈ പുള്ളികൾ വിൻസം ഫ്ലൈയുടെ മുട്ടകൾ തന്നെയെന്ന് സ്ഥിരീകരിച്ചാൽ മേഖലയിലെ ജാപ്പനീസ് വണ്ടുകളുടെ ശല്യത്തിന് വലിയ അളവിൽ ആശ്വാസമാകും.
മേഖലയിലെ നിരവധി തോട്ട ഉടമകൾ ഇത്തരം പുള്ളികളുള്ള നൂറുകണക്കിന് വണ്ടുകളെ ദിവസവും കണ്ടെത്തുന്നുണ്ട്. മുൻവർഷങ്ങളിൽ മറ്റൊരു തരം ഈച്ചയുടെ മുട്ടകളും ഇത്തരത്തിൽ കണ്ടെത്തിയിരുന്നതിനാൽ, കൃത്യമായ ശാസ്ത്രീയ സ്ഥിരീകരണത്തിന് ശേഷമേ നിഗമനത്തിൽ എത്താനാകൂ എന്ന് അഗ്രികൾച്ചർ ആൻഡ് അഗ്രി-ഫുഡ് കാനഡയിലെ ഗവേഷകനായ പോൾ എബ്രാം വ്യക്തമാക്കി. വണ്ടുകളുടെ എണ്ണം പൂർണ്ണമായി ഇല്ലാതാക്കാൻ കഴിയില്ലെങ്കിലും 20 മുതൽ 40 ശതമാനം വരെ കുറയ്ക്കാൻ ഈ പ്രകൃതിദത്ത രീതിക്ക് സാധിക്കുമെന്നാണ് പ്രതീക്ഷിക്കുന്നത്. വാസസ്ഥലങ്ങളിൽ ഇത്തരം വണ്ടുകളെ കാണുന്നവർ അവയുടെ ചിത്രം എടുത്ത് ‘iNaturalist’ ആപ്പ് വഴി വിവരങ്ങൾ കൈമാറണമെന്ന് ഗവേഷകർ അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Winsome Fly' to Combat Japanese Beetles: Farmers in Nova Scotia Hopeful
