ഷാർലറ്റ് ടൗൺ: പ്രിൻസ് എഡ്വേർഡ് ഐലൻഡിനും (P.E.I) ന്യൂ ബ്രൺസ്വിക്കിനുമിടയിൽ വൈദ്യുതി ബന്ധം മെച്ചപ്പെടുത്തുന്നതിനായി ഫെഡറൽ സർക്കാർ 5.9 മില്യൺ ഡോളറിന്റെ സാമ്പത്തിക സഹായം പ്രഖ്യാപിച്ചു. ദ്വീപ് പ്രദേശമായ P.E.I-യിലെ ഊർജ ആവശ്യങ്ങൾ സുരക്ഷിതമാക്കാനും നിലവിലുള്ള കേബിളുകളുടെ പഴക്കം മൂലമുള്ള പ്രശ്നങ്ങൾ പരിഹരിക്കാനുമാണ് ഈ തുക അനുവദിച്ചിരിക്കുന്നത്. പുതിയ പദ്ധതിയുടെ ഭാഗമായി 200 മെഗാവാട്ട് ശേഷിയുള്ള രണ്ട് പുതിയ കേബിളുകൾ സ്ഥാപിക്കുകയും ട്രാൻസ്മിഷൻ കേന്ദ്രങ്ങളും സബ്സ്റ്റേഷനുകളും നവീകരിക്കുകയും ചെയ്യും.
നിലവിൽ ന്യൂ ബ്രൺസ്വിക്കിൽ നിന്നുള്ള വൈദ്യുതിയെയാണ് P.E.I പ്രധാനമായും ആശ്രയിക്കുന്നത്. ഇതിനായി കടലിനടിയിലൂടെയുള്ള നാല് കേബിളുകളാണ് ഉപയോഗിക്കുന്നത്. ഇതിൽ രണ്ട് കേബിളുകൾ 2017-ൽ മാറ്റിസ്ഥാപിച്ചിരുന്നെങ്കിലും, മറ്റു രണ്ടെണ്ണം 1970-കളുടെ അവസാനത്തിൽ സ്ഥാപിച്ചവയാണ്. ഇവയുടെ ഉപയോഗകാലാവധി അവസാനിക്കാറായ സാഹചര്യത്തിലാണ് പുതിയ പദ്ധതി വേഗത്തിലാക്കാൻ P.E.I സർക്കാർ കേന്ദ്ര സർക്കാരിനോട് ആവശ്യപ്പെട്ടത്. പുതിയ കേബിളുകൾ വരുന്നതോടെ മേഖലയിലെ ഊർജ സുരക്ഷ വർധിക്കും.
ലഭിച്ച ധനസഹായം ഉപയോഗിച്ച് P.E.I എനർജി കോർപ്പറേഷൻ പദ്ധതിയുടെ പ്രാഥമിക ഘട്ട പ്രവർത്തനങ്ങൾ ആരംഭിക്കും. കടൽ സർവേകൾ, പരിസ്ഥിതി പഠനങ്ങൾ, എഞ്ചിനീയറിംഗ് ഡിസൈനുകൾ, പ്രാദേശിക സമൂഹങ്ങളുമായുള്ള ചർച്ചകൾ എന്നിവയാണ് ആദ്യഘട്ടത്തിൽ പൂർത്തിയാക്കുക. പദ്ധതിയുടെ നിർമ്മാണ പ്രവർത്തനങ്ങൾ 2028-ഓടെ ആരംഭിക്കുമെന്ന് കാനഡയുടെ എനർജി ആൻഡ് നാച്ചുറൽ റിസോഴ്സസ് മന്ത്രി ടിം ഹോഡ്സൺ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New project to ensure energy security in P.E.I. and New Brunswick; Federal government announces $5.9 million.
