കാനഡയുടെ ഇലക്ട്രോണിക്സ് വ്യവസായത്തിന് താരിഫ് കുരുക്ക്: ഇരുരാജ്യങ്ങളിലെയും വിതരണ ശൃംഖല പ്രതിസന്ധിയിൽ

ഓട്ടവ: യു.എസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച പുതിയ വ്യാപാര താരിഫുകൾ കാനഡയുടെ ഇലക്ട്രോണിക്സ് വ്യവസായത്തിന് കനത്ത സാമ്പത്തിക തിരിച്ചടിയാകുമെന്ന് വിദഗ്ധർ മുന്നറിയിപ്പ് നൽകുന്നു. കാനഡയിലെ ഇലക്ട്രോണിക്സ് ഉൽപന്നങ്ങളുടെ 90 ശതമാനവും അമേരിക്കയിലേക്കാണ് കയറ്റി അയക്കുന്നത് എന്നതിനാൽ ഈ മേഖലയായിരിക്കും ഏറ്റവും കൂടുതൽ പ്രതിസന്ധിയിലാകുക എന്ന് നൂറുകണക്കിന് ഇലക്ട്രിക്കൽ, ഓട്ടോമേഷൻ കമ്പനികളെ പ്രതിനിധീകരിക്കുന്ന ട്രേഡ് ഗ്രൂപ്പായ ‘ഇലക്ട്രോ-ഫെഡറേഷൻ കാനഡ’ വ്യക്തമാക്കുന്നു.

ഇലക്ട്രോണിക് ഉപകരണങ്ങൾ, ഫർണിച്ചർ, ഡൈസ്‌വെയർ, കനേഡിയൻ വിസ്കി, ഡൗൺ ജാക്കറ്റുകൾ എന്നിവയുൾപ്പെടെയുള്ള കനേഡിയൻ ഉൽപന്നങ്ങൾക്ക് ഓഗസ്റ്റ് 19 മുതൽ 50 ശതമാനം ഇറക്കുമതി തീരുവ ചുമത്താനാണ് ട്രംപിന്റെ തീരുമാനം. NAFTA കരാർ ഒപ്പിട്ടതു മുതൽ കാനഡയും അമേരിക്കയും തമ്മിലുള്ള ഇലക്ട്രിക്കൽ, ഓട്ടോമേഷൻ ഉൽപന്നങ്ങളുടെ വിതരണ ശൃംഖല പരസ്പരം ഇഴചേർന്നാണ് പ്രവർത്തിക്കുന്നതെന്നും, ഈ താരിഫ് ഇരുരാജ്യങ്ങളിലെയും ഉൽപാദനത്തെ ബാധിക്കുമെന്നും ഇലക്ട്രോ-ഫെഡറേഷൻ കാനഡ ഗവൺമെന്റ് അഫയേഴ്സ് ഡയറക്ടർ ചെരിത് സിനാസാക് സി.ടി.വി യുവർ മോർണിംഗിന് നൽകിയ അഭിമുഖത്തിൽ പറഞ്ഞു.

കാർബൺ പുറന്തള്ളൽ കുറയ്ക്കുന്നതിനും വൈദ്യുതീകരണത്തിനുമുള്ള ആഗോള ശ്രമങ്ങളെ ഈ താരിഫുകൾ തകിടം മറിക്കുമെന്നും അവർ കൂട്ടിച്ചേർത്തു. കാനഡയിലും യു.എസിലുമായി വൈദ്യുത വിതരണം ഇരട്ടിയാക്കാൻ ലക്ഷ്യമിടുന്ന പദ്ധതികൾക്ക് സുരക്ഷിതമായ വിതരണ ശൃംഖല അത്യാവശ്യമാണ്. എന്നാൽ താരിഫ് ചെലവ് വർധിപ്പിക്കുക വഴി ഊർജ്ജ സുരക്ഷയ്ക്കായുള്ള അടിസ്ഥാന സൗകര്യ വികസനങ്ങളെയും നിക്ഷേപങ്ങളെയും ഇത് തടസ്സപ്പെടുത്തുന്നു.

ഈ പ്രതിസന്ധിയെ നേരിടാൻ കാനഡയ്ക്കുള്ളിൽ ഉൽപാദന രംഗം ശക്തിപ്പെടുത്താനും ആഭ്യന്തര വിതരണ ശൃംഖല സുരക്ഷിതമാക്കാനുമുള്ള നടപടികൾ സ്വീകരിക്കണമെന്ന് സംഘടന ആവശ്യപ്പെട്ടു. പ്രാദേശികമായി നിർമ്മിച്ച ഭാഗങ്ങൾക്ക് ഒരു നിശ്ചിത ശതമാനം മുൻഗണന നൽകുന്ന കമ്പനികൾക്ക് ആനുകൂല്യങ്ങളും കോൺട്രാക്ടുകളും നൽകുക, ആഭ്യന്തര ഉൽപന്നങ്ങൾക്ക് ബോണസ് ഘടന നടപ്പിലാക്കുക, നിക്ഷേപ നികുതി ഇളവുകൾ തുടരുക തുടങ്ങിയ ആവശ്യങ്ങൾ ഫെഡറൽ സർക്കാരിന് മുന്നിൽ വെച്ചിട്ടുണ്ടെന്നും സിനാസാക് വ്യക്തമാക്കി. മത്സരസ്വഭാവം നിലനിർത്തി കാനഡയിൽ തന്നെ വ്യവസായങ്ങൾ വേരുറപ്പിക്കാൻ ഇത്തരം നടപടികൾ അത്യന്താപേക്ഷിതമാണെന്നും അവർ ഓർമ്മിപ്പിച്ചു.

Canada’s electronic industry could be among hardest hit by tariffs

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt