കാനഡയുടെ പി.ആർ കണക്കുകൾ മനസ്സിലാക്കാം; പുതിയ വിവരങ്ങൾ പുറത്തുവിട്ട് ഫെഡറൽ സർക്കാർ

ഒന്റാരിയോ; കാനഡ സർക്കാർ പ്രഖ്യാപിക്കുന്ന Permanent Residence പ്രവേശന ലക്ഷ്യങ്ങൾ രാജ്യത്തേക്ക് അനുവദിക്കുന്ന മുഴുവൻ പി.ആർ പ്രവേശനങ്ങളെയും പ്രതിനിധീകരിക്കുന്നതല്ലെന്ന് ഇമിഗ്രേഷൻ വകുപ്പ് വ്യക്തമാക്കി. ജൂലൈ 21-ന് പുറത്തിറക്കിയ പുതിയ വിശദീകരണ വെബ് പേജിലാണ് 2026, 2027 വർഷങ്ങളിലെ വാർഷിക 3.8 ലക്ഷം പി.ആർ പ്രവേശന ലക്ഷ്യത്തിൽ രണ്ട് പ്രത്യേക ഒറ്റത്തവണ പദ്ധതികളിലൂടെ അനുവദിക്കുന്ന പ്രവേശനങ്ങൾ ഉൾപ്പെടുന്നില്ലെന്ന് വ്യക്തമാക്കിയത്.

ഈ പദ്ധതികളിലൂടെ രണ്ട് വർഷത്തിനിടെ പരമാവധി 1.15 ലക്ഷം സംരക്ഷിത വ്യക്തികൾക്കും (Protected Persons), 33,000 കാനഡയ്ക്കുള്ളിലെ തൊഴിലാളികൾക്കും സ്ഥിരതാമസം നൽകാനാണ് സർക്കാർ ലക്ഷ്യമിടുന്നത്. ഇതോടെ 2026-27 കാലയളവിലെ ആകെ പി.ആർ പ്രവേശന പദ്ധതി 9.08 ലക്ഷത്തിലെത്തുകയും, വാർഷിക ശരാശരി 4.54 ലക്ഷമാവുകയും ചെയ്യുന്നു.

‘Understanding Permanent Residence Numbers in Canada’ എന്ന പുതിയ വിവരപേജിൽ 2026 ജനുവരി മുതൽ മേയ് വരെയുള്ള പ്രതിമാസ പി.ആർ പ്രവേശന കണക്കുകൾ പ്രത്യേകം ഗ്രാഫുകളായി പ്രസിദ്ധീകരിച്ചിട്ടുണ്ട്. മേയ് അവസാനം വരെ കാനഡ 1.28 ലക്ഷം പുതിയ സ്ഥിരതാമസക്കാരെ സ്വീകരിച്ചതിൽ ഏകദേശം 14.4 ശതമാനവും ഈ ഒറ്റത്തവണ പദ്ധതികളിലൂടെയായിരുന്നു.

കാനഡയ്ക്കുള്ളിലെ തൊഴിലാളികൾക്കായുള്ള വാർഷിക 20,000 ലക്ഷ്യത്തിൽ 9,100 പേരും (46%), സംരക്ഷിത വ്യക്തികൾക്കായുള്ള 46,000 ലക്ഷ്യത്തിൽ 9,300 പേരും (20%) ഇതിനകം സ്ഥിരതാമസം നേടിയതായി സർക്കാർ കണക്കുകൾ വ്യക്തമാക്കുന്നു. ഇതോടൊപ്പം, ഈ വർഷം തന്നെ പരിഗണിക്കപ്പെടുന്ന പി.ആർ അപേക്ഷകളും പിന്നീട് പരിഗണിക്കാനായി കാത്തിരിക്കുന്ന അപേക്ഷകളും വേർതിരിച്ച് കാണിക്കുന്ന രീതിയിലേക്ക് ബാക്ക്‌ലോഗ് വിവരങ്ങളും സർക്കാർ പുതുക്കിയിട്ടുണ്ട്.

അതേസമയം, മാതാപിതാക്കളെയും മുത്തശ്ശൻമാരെയും സ്ഥിരതാമസത്തിനായി സ്പോൺസർ ചെയ്യുന്ന Parents and Grandparents Program (PGP) പുതിയ അപേക്ഷകൾ താൽക്കാലികമായി നിർത്തിവച്ചതായും സർക്കാർ നേരത്തെ അറിയിച്ചിരുന്നു. നിലവിൽ ഈ പദ്ധതിയിൽ 50,900 അപേക്ഷകൾ കാത്തിരിക്കുമ്പോൾ, 2026 മുതൽ 2028 വരെ ഓരോ വർഷവും 15,000 പ്രവേശനങ്ങൾ മാത്രമാണ് ലക്ഷ്യമിട്ടിരിക്കുന്നത്.

സ്ഥിരതാമസ കണക്കുകളുടെ പുതിയ അവതരണം, 2025 ഓഗസ്റ്റിൽ വിദ്യാർത്ഥികളുടെയും താൽക്കാലിക തൊഴിലാളികളുടെയും എണ്ണം വിശദീകരിക്കാൻ സർക്കാർ ആരംഭിച്ച സമാന വിവരപേജിന്റെ മാതൃകയിലാണ്. എന്നാൽ, സർക്കാർ ഉപയോഗിച്ചിരിക്കുന്ന ‘മൂലധന നിക്ഷേപം’ എന്ന കണക്കുകൂട്ടൽ രീതി സാധാരണ സാമ്പത്തിക നിർവചനവുമായി പൊരുത്തപ്പെടുന്നില്ലെന്നാണ് ചില സാമ്പത്തിക വിദഗ്ധരുടെ വിമർശനം.

Understanding Canada's PR figures: Federal government releases new data.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt