ഇസ്ലാമാബാദ്: വിദേശകാര്യ മന്ത്രി അനിത ആനന്ദ് പാകിസ്ഥാനിൽ ഔദ്യോഗിക സന്ദർശനം നടത്തി. രണ്ട് പതിറ്റാണ്ടിലേറെക്കാലത്തെ ഇടവേളയ്ക്ക് ശേഷമാണ് ഇങ്ങനെയൊരു സന്ദർശനം നടക്കുന്നത് എന്നതാണ് ശ്രദ്ധേയമായ കാര്യം. ഉഭയകക്ഷി ബന്ധം പുതിയൊരു തലത്തിലേക്ക് ഉയർത്തുക എന്ന ലക്ഷ്യത്തോടെയാണ് ഒരു ദിവസത്തെ നിർണായക സന്ദർശനം നടന്നത്. ഇസ്ലാമാബാദിൽ എത്തിയ കനേഡിയൻ വിദേശകാര്യ മന്ത്രി, പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, ഉപപ്രധാനമന്ത്രി ഇഷാഖ് ദാർ, ആഭ്യന്തര മന്ത്രി മൊഹ്സിൻ നഖ്വി, പാകിസ്ഥാൻ സൈനിക മേധാവി ഫീൽഡ് മാർഷൽ ആസിം മുനീർ എന്നിവരുമായി ഉന്നതതല ചർച്ചകൾ നടത്തി. ഇരുരാജ്യങ്ങളും തമ്മിലുള്ള വ്യാപാരം, നിക്ഷേപം, സുരക്ഷ, ശുദ്ധമായ ഊർജ്ജം തുടങ്ങിയ വിവിധ മേഖലകളിലെ സഹകരണം കൂടുതൽ ശക്തമാക്കുന്നതിനെക്കുറിച്ച് ഈ കൂടിക്കാഴ്ചകളിൽ വിശദമായി സംസാരിച്ചു.
സന്ദർശനത്തിന്റെ ഭാഗമായി പാകിസ്ഥാന് ആകെ 47 മില്യൺ ഡോളറിന്റെ പുതിയ സാമ്പത്തിക സുരക്ഷാ, വികസന സഹായ പാക്കേജാണ് കാനഡ പ്രഖ്യാപിച്ചിരിക്കുന്നത്. ഇതിൽ 2.2 മില്യൺ ഡോളർ സുരക്ഷാ സഹകരണ പദ്ധതികൾക്കായാണ് നീക്കിവെച്ചിരിക്കുന്നത്. അന്താരാഷ്ട്ര പൊലീസായ ഇൻ്റർപോൾ, യുഎൻ ഓഫീസ് ഓൺ ഡ്രഗ്സ് ആൻഡ് ക്രൈം, റോയൽ കനേഡിയൻ മൗണ്ടഡ് പൊലീസ് എന്നിവയുമായി സഹകരിച്ച് അതിർത്തി സുരക്ഷ, ഭീകരവാദ വിരുദ്ധ പ്രവർത്തനങ്ങൾ, സാമ്പത്തിക കുറ്റകൃത്യങ്ങൾ തടയൽ, സംഘടിത കുറ്റകൃത്യങ്ങൾ എന്നിവ ചെറുക്കാനാണ് ഈ തുക വിനിയോഗിക്കുക. പാകിസ്ഥാനിലെ വിവിധ പ്രദേശങ്ങളിലായി നിലനിൽക്കുന്ന കലാപങ്ങളും ഭീകരവാദ ഭീഷണികളും കണക്കിലെടുത്താണ് സുരക്ഷാ രംഗത്തെ ഈ സഹായം പ്രഖ്യാപിച്ചിരിക്കുന്നത്.
ഇതിനുപുറമെ, വിവിധ വികസന പദ്ധതികൾക്കായി 45 മില്യൺ ഡോളറും അനുവദിച്ചിട്ടുണ്ട്. പ്രളയബാധിത പ്രദേശങ്ങളിലെ കുട്ടികളുടെ വിദ്യാഭ്യാസം പുനഃസ്ഥാപിക്കുന്നതിനായി യുണൈറ്റഡ് നേഷൻസ് ഡെവലപ്മെന്റ് പ്രോഗ്രാമിന് 10 മില്യൺ ഡോളറും, കാലാവസ്ഥാ വ്യതിയാനങ്ങളെ പ്രതിരോധിക്കാനുള്ള ശേഷി വർദ്ധിപ്പിക്കുന്നതിനായി അഗാ ഖാൻ ഫൗണ്ടേഷൻ കാനഡയ്ക്ക് 15 മില്യൺ ഡോളറും, പ്രത്യുത്പാദന ആരോഗ്യവും കുടുംബസൂത്രണ സേവനങ്ങളും വിപുലീകരിക്കുന്നതിനായി യുഎൻഎഫ്പിഎയ്ക്ക് 20 മില്യൺ ഡോളറുമാണ് നൽകുന്നത്.
സാമ്പത്തിക സഹായങ്ങൾക്ക് പുറമേ, ഇരു രാജ്യങ്ങളും തമ്മിലുള്ള വ്യാപാര ബന്ധങ്ങൾ ശക്തിപ്പെടുത്തുന്നതിന്റെ ഭാഗമായി കാനഡ-പാകിസ്ഥാൻ ഫോറിൻ ഇൻവെസ്റ്റ്മെന്റ് പ്രൊമോഷൻ ആൻഡ് പ്രൊട്ടക്ഷൻ അഗ്രിമെന്റുമായി ബന്ധപ്പെട്ട ചർച്ചകൾ വേഗത്തിലാക്കാൻ ധാരണയായി. കൃഷി, ഊർജ്ജം, ഖനനം, വിവര സാങ്കേതികവിദ്യ തുടങ്ങിയ മേഖലകളിൽ കനേഡിയൻ നിക്ഷേപങ്ങൾ ആകർഷിക്കാൻ പാകിസ്ഥാൻ താൽപ്പര്യം പ്രകടിപ്പിച്ചു. സോളാർ, വിൻഡ്, ബാറ്ററി സ്റ്റോറേജ് തുടങ്ങിയ ശുദ്ധമായ ഊർജ്ജ മേഖലകളിലെ സഹകരണവും കനേഡിയൻ കമ്പനിയായ ബാറിക്കിന്റെ നേതൃത്വത്തിലുള്ള റെക്കോ ഡിക് ചെമ്പ്-സ്വർണ്ണ ഖനന പദ്ധതിയും ചർച്ചകളിൽ പ്രധാന വിഷയങ്ങളായി. കശ്മീർ വിഷയം ഉന്നയിച്ച പാകിസ്ഥാൻ ഉപപ്രധാനമന്ത്രി ഇഷാഖ് ദാർ, ഇന്ത്യയുടെ നടപടിയിലൂടെ തടസ്സപ്പെട്ട സിന്ധു നദീജല കരാർ പുനഃസ്ഥാപിക്കുന്നതിൽ കാനഡയുടെ പിന്തുണയും അഭ്യർത്ഥിക്കുകയുണ്ടായി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada extends a helping hand; Foreign Minister announces $47 million in financial aid for Pakistan.
