അഹമ്മദാബാദ് : ഗുജറാത്തിലെ അഹമ്മദാബാദിലുള്ള വസ്ത്രാൽ മേഖലയിൽ പ്രവർത്തിച്ചിരുന്ന അനധികൃത പടക്ക നിർമ്മാണ ശാലയിലുണ്ടായ ശക്തമായ പൊട്ടിത്തെറിയിൽ എട്ട് പേർ മരണപ്പെട്ടു. ശനിയാഴ്ച വൈകുന്നേരത്തോടെയാണ് നാടിനെ നടുക്കിയ വൻ ദുരന്തമുണ്ടായത്. ലൈസൻസ് റദ്ദാക്കിയതിനെ തുടർന്ന് ഒരു ഫാമിൽ പ്രവർത്തിച്ചിരുന്ന ‘ടാലന്റ് ഫയർവർക്സ്’ എന്ന സ്ഥാപനത്തിലാണ് അപകടം സംഭവിച്ചത്. സ്ഫോടനം നടക്കുന്ന സമയത്ത് പതിനെട്ടോളം തൊഴിലാളികൾ ഫാക്ടറിക്കുള്ളിൽ ജോലിയിലുണ്ടായിരുന്നുവെന്ന് ഫയർഫോഴ്സ് അധികൃതർ വ്യക്തമാക്കി. വിവരമറിഞ്ഞ് ഉടൻ തന്നെ ഫയർഫോഴ്സ് സംഘവും റാപ്പിഡ് ആക്ഷൻ ഫോഴ്സും (ആർ എ എഫ്) സംഭവസ്ഥലത്തെത്തിയാണ് രക്ഷാപ്രവർത്തനം ഏകോപിപ്പിച്ചത്. അപകടത്തിൽ ഗുരുതരമായി പരിക്കേറ്റ ഒൻപത് പേരെ അടിയന്തര ചികിത്സയ്ക്കായി സിവിൽ ആശുപത്രിയിലേക്കും മണിനഗറിലെ എൽ ജി ആശുപത്രിയിലേക്കും മാറ്റിയിട്ടുണ്ട്.
അഹമ്മദാബാദിലുണ്ടായ പടക്കശാല ദുരന്തത്തിൽ പ്രധാനമന്ത്രി നരേന്ദ്ര മോദി ആഴമേറിയ ദുഃഖം രേഖപ്പെടുത്തി. മരിച്ചവരുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നതായും പരിക്കേറ്റവർ എത്രയും വേഗം സുഖം പ്രാപിക്കട്ടെയെന്നും അദ്ദേഹം ആശംസിച്ചു. ദുരന്തത്തിന് ഇരയായവർക്കായി പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ (PMNRF) നിന്ന് ധനസഹായവും പ്രഖ്യാപിച്ചിട്ടുണ്ട്. അപകടത്തിൽ മരണപ്പെട്ടവരുടെ ആശ്രിതർക്ക് രണ്ട് ലക്ഷം രൂപ വീതവും പരിക്കേറ്റവർക്ക് 50,000 രൂപ വീതവും അടിയന്തര ധനസഹായം നൽകുമെന്ന് പ്രധാനമന്ത്രിയുടെ ഓഫീസ് എക്സിലൂടെ (ട്വിറ്റർ) അറിയിച്ചു.
Massive explosion at illegal firecracker factory in Gujarat; 8 dead, 9 injured
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
