ടൊറന്റോ: കാനഡയിൽ വർധിച്ചുവരുന്ന വിദ്വേഷ പ്രേരിത കുറ്റകൃത്യങ്ങളെ തടയുന്നതിനായി രൂപീകരിച്ച ‘കോംബാറ്റിങ് ഹേറ്റ് ആക്ട്’ (ബിൽ C-9) ഇന്ന് (ജൂലൈ 18) മുതൽ രാജ്യവ്യാപകമായി പ്രാബല്യത്തിൽ വന്നു. കഴിഞ്ഞ ജൂൺ 18-ന് റോയൽ അസന്റ് ലഭിച്ചതിനെത്തുടർന്ന് കൃത്യം 30 ദിവസങ്ങൾക്ക് ശേഷമാണ് കാനഡയുടെ ചരിത്രത്തിലെ ഏറ്റവും വലിയ ക്രിമിനൽ നിയമപരിഷ്കരണങ്ങളിലൊന്നായ ഈ പുതിയ നിയമം നടപ്പിലാകുന്നത്. 2018 മുതൽ 2024 വരെയുള്ള കാലയളവിൽ രാജ്യത്ത് വംശീയ, മത ന്യൂനപക്ഷങ്ങൾക്കെതിരെയുള്ള അതിക്രമങ്ങൾ 169 ശതമാനത്തോളം വർധിച്ച പശ്ചാത്തലത്തിലാണ് ഫെഡറൽ സർക്കാർ കർശനമായ ശിക്ഷാ വ്യവസ്ഥകളോടെ ഈ നിയമം കൊണ്ടുവന്നത്.
പുതിയ നിയമപ്രകാരം വിദ്വേഷ കുറ്റകൃത്യങ്ങളെ നാല് പ്രധാന വിഭാഗങ്ങളായി തിരിച്ച് കർശനമായ ശിക്ഷയാണ് ഉറപ്പാക്കുന്നത്. വംശം, മതം, ലിംഗഭേദം, ദേശീയത എന്നിവയുടെ പേരിലുള്ള അതിക്രമങ്ങൾ ഇനി മുതൽ നേരിട്ടുള്ള വിദ്വേഷ കുറ്റകൃത്യമായി (Standalone Hate Crime) കണക്കാക്കും. ആരാധനാലയങ്ങൾ, സ്കൂളുകൾ, സാംസ്കാരിക കേന്ദ്രങ്ങൾ എന്നിവയ്ക്ക് നേരെ ഉണ്ടാകുന്ന ഭീഷണികൾക്കും തടസ്സപ്പെടുത്തലുകൾക്കും 10 വർഷം വരെ തടവ് ലഭിക്കാം. കൂടാതെ, വിദ്വേഷവും തീവ്രവാദവും പ്രചരിപ്പിക്കുന്ന നാസി ചിഹ്നങ്ങളോ മറ്റ് സമാനമായ അടയാളങ്ങളോ പൊതുസ്ഥലങ്ങളിൽ പ്രദർശിപ്പിക്കുന്നത് രണ്ട് വർഷം വരെ തടവ് ലഭിക്കാവുന്ന കുറ്റമായി മാറിയിട്ടുണ്ട്. ഗുരുതരമായ കേസുകളിൽ പ്രതികൾക്ക് ജീവപര്യന്തം തടവുശിക്ഷ വരെ നിയമം വ്യവസ്ഥ ചെയ്യുന്നുണ്ട്.
കാനഡയിലെ പൗരന്മാർക്കും സ്ഥിരതാമസക്കാർക്കും (PR) താൽക്കാലിക വിസയിൽ കഴിയുന്ന വിദേശികൾക്കും ഈ നിയമം ഒരേപോലെ ബാധകമായിരിക്കും. നിയമലംഘനം നടത്തുന്ന കുടിയേറ്റക്കാരുടെ പി.ആർ അപേക്ഷകൾ നിരസിക്കാനും അവരെ നാട്ടിലേക്ക് തിരിച്ചയക്കാനും പുതിയ വ്യവസ്ഥയിൽ സാധിക്കും. വിദ്വേഷം പ്രചരിപ്പിക്കാൻ ഉദ്ദേശിച്ചുള്ളതല്ലെങ്കിൽ മതപരമായ പ്രഭാഷണങ്ങൾക്കോ വിശുദ്ധ ഗ്രന്ഥ വായനകൾക്കോ ഈ നിയമം തടസ്സമല്ലെന്ന് സർക്കാർ വ്യക്തമാക്കുന്നുണ്ട്. എങ്കിലും, പുതിയ മാറ്റങ്ങൾ അഭിപ്രായ സ്വാതന്ത്ര്യത്തെ ബാധിക്കുമോ എന്ന് ചില മനുഷ്യാവകാശ സംഘടനകൾ ആശങ്ക ഉന്നയിക്കുന്നുണ്ട്. എന്നാൽ രാജ്യത്തെ സുരക്ഷ മുൻനിർത്തി ഭരണഘടനാ പരിധിക്കുള്ളിൽ നിന്നുകൊണ്ട് തയാറാക്കിയ സമതുലിതമായ നിയമമാണിതെന്നാണ് സർക്കാർ വിശദീകരണം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Hate crimes in Canada to face harsher penalties; Bill C-9 comes into effect today.
