ഒട്ടാവ: കാനഡയെയും അമേരിക്കയെയും ബന്ധിപ്പിക്കുന്ന പുതിയ ‘ഗോർഡി ഹൗ’ അന്താരാഷ്ട്ര പാലത്തിൽ നിന്നുള്ള ടോൾ വരുമാനം, അതിന്റെ നിർമാണത്തിനായി എടുത്ത കടം മുഴുവൻ വീട്ടിയ ശേഷമേ ഇരുരാജ്യങ്ങളും തമ്മിൽ പങ്കിടുകയുള്ളൂ എന്ന് വ്യക്തമാക്കി പ്രധാനമന്ത്രി മാർക്ക് കാർണി. ലണ്ടനിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. പുതിയ പാലത്തിന്റെ വരുമാനം പങ്കിടുന്നതുമായി ബന്ധപ്പെട്ട് രാജ്യത്ത് ചില തർക്കങ്ങളും വിമർശനങ്ങളും ഉയർന്ന സാഹചര്യത്തിലാണ് പ്രധാനമന്ത്രിയുടെ ഈ വിശദീകരണം. പാലത്തിന്റെ അറ്റകുറ്റപ്പണി, ജീവനക്കാരുടെ ശമ്പളം തുടങ്ങിയ ചെലവുകളെല്ലാം കഴിഞ്ഞ് ആദ്യ 15 വർഷം കിട്ടുന്ന ലാഭമാണ് പങ്കുവെക്കുകയെന്നും, എന്നാൽ കാനഡ മുടക്കിയ പണം പൂർണ്ണമായി തിരിച്ചുപിടിച്ച ശേഷമേ ഈ പങ്കിടൽ തുടങ്ങുകയുള്ളൂ എന്നും അദ്ദേഹം വ്യക്തമാക്കി.
വിൻഡ്സറിനെയും അമേരിക്കയിലെ ഡിട്രോയിറ്റിനെയും ബന്ധിപ്പിക്കുന്ന ഈ വലിയ പാലം വരുന്ന ജൂലൈ 27-നാണ് പൊതുജനങ്ങൾക്കായി തുറന്നുകൊടുക്കുന്നത്. നിലവിൽ ഈ റൂട്ടിലുള്ള അംബാസഡർ ബ്രിഡ്ജിലെ കടുത്ത ഗതാഗതക്കുരുക്ക് ഒഴിവാക്കാനും ഇരുരാജ്യങ്ങളും തമ്മിലുള്ള കച്ചവടം എളുപ്പമാക്കാനുമാണ് ഈ പാലം പണിതത്. പുതിയ തീരുമാനപ്രകാരം വരാൻ പോകുന്ന ലാഭത്തിന്റെ പകുതി കാനഡയ്ക്കും, ബാക്കി പകുതി അമേരിക്കയിലെ വികസന കാര്യങ്ങൾക്കുമാണ് മാറ്റിവെക്കുന്നത്. എന്നാൽ, നിർമാണച്ചെലവ് മുഴുവൻ കാനഡ വഹിക്കുന്നതിനാൽ പണം തിരിച്ചുകിട്ടുന്നതുവരെ ടോൾ വരുമാനം 100 ശതമാനവും കാനഡയ്ക്ക് ലഭിക്കുമെന്നായിരുന്നു 2012-ലെ ആദ്യ കരാർ. പാലം പണിയാൻ ഏകദേശം 6.4 ബില്യൺ ഡോളർ ചിലവായതിനാൽ ഈ തുക തിരിച്ചുപിടിക്കാൻ കുറഞ്ഞത് 50 വർഷമെങ്കിലും വേണമെന്നാണ് പഴയ കണക്കുകൾ പറയുന്നത്.
അതേസമയം, ഈ പുതിയ കരാറിന്റെ പൂർണ്ണവിവരങ്ങൾ പൊതുജനങ്ങൾക്കായി പുറത്തുവിടണമെന്ന ആവശ്യം കാനഡയിൽ ശക്തമായിട്ടുണ്ട്. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ സമ്മർദ്ദത്തിന് വഴങ്ങിയാണ് കാനഡ പഴയ കരാർ മാറ്റിയെഴുതിയതെന്ന് പ്രതിപക്ഷ പാർട്ടികൾ ആരോപിക്കുന്നു. എന്നാൽ കരാറിന്റെ നിയമപരമായ നടപടികൾ അവസാന ഘട്ടത്തിലാണെന്നും ഉടൻ തന്നെ വിവരങ്ങൾ പുറത്തുവിടുമെന്നും പ്രധാനമന്ത്രിയുടെ ഓഫീസ് അറിയിച്ചു. 2018-ൽ നിർമാണം തുടങ്ങി കഴിഞ്ഞ മാസം പണി പൂർത്തിയായ ഈ പാലം വടക്കേ അമേരിക്കയിലെ ഏറ്റവും നീളം കൂടിയ വലിയ അഞ്ച് പാലങ്ങളിൽ ഒന്നാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Gordie Howe Bridge: Won't share toll revenue with the US without settling debt; Mark Carney explains.
