വാൻകൂവർ: ഒരുകാലത്ത് മയക്കുമരുന്നിനും തെരുവ് ജീവിതത്തിനും അടിമപ്പെട്ട് മരണത്തിന്റെ വക്കിൽ നിന്ന് ആറു തവണ തിരിച്ചെത്തിയ ഗൈ ഫെലിസെല്ല ഇന്ന് കുടുംബത്തോടൊപ്പം സാധാരണ ജീവിതം നയിക്കുന്ന ഒരാളാണ്. എന്നാൽ, മയക്കുമരുന്നിൽ നിന്ന് മോചിതനാകുക എന്നത് ലഹരി ഉപേക്ഷിക്കുന്നതിൽ മാത്രം ഒതുങ്ങുന്ന കാര്യമല്ലെന്നും, അതിന് പിന്നിലെ ജീവിത സാഹചര്യങ്ങളും മാനസിക കാരണങ്ങളും മാറ്റിയെടുക്കേണ്ടതുണ്ടെന്നും അദ്ദേഹം പറയുന്നു.
വാൻകൂവറിലെ കുപ്രസിദ്ധമായ ഡൗൺടൗൺ ഈസ്റ്റ്സൈഡിൽ ഏകദേശം ഇരുപത് വർഷത്തോളം കഴിഞ്ഞ ഫെലിസെല്ലയുടെ ജീവിതം മാറിത്തുടങ്ങിയത് മേൽനോട്ടത്തിലുള്ള ലഹരി ഉപയോഗ കേന്ദ്രത്തിൽ (Supervised Consumption Site) നിന്നാണ്. അവിടെ നിന്ന് ചികിത്സാകേന്ദ്രത്തിലേക്കുള്ള ഒരു ബസ് ടിക്കറ്റായിരുന്നു പുതിയ ജീവിതത്തിലേക്കുള്ള ആദ്യപടി. തുടർന്ന് ഒരു പതിറ്റാണ്ടിലേറെ നീണ്ട പരിശ്രമത്തിനൊടുവിലാണ് അദ്ദേഹം ലഹരിയിൽ നിന്ന് പൂർണമായി മോചിതനായത്.
ഫെലിസെല്ലയെപ്പോലെ തന്നെ ബ്രിട്ടിഷ് കൊളംബിയയിലെ ആരോഗ്യവിദഗ്ധരും ലഹരി വിരുദ്ധ പ്രവർത്തകരും ഇപ്പോൾ പ്രതീക്ഷയോടെ നോക്കുന്നത് പ്രവിശ്യയിൽ മയക്കുമരുന്ന് അമിതഡോസ് മൂലമുള്ള മരണങ്ങൾ ഗണ്യമായി കുറഞ്ഞതിലേക്കാണ്. ബി.സി. കൊറോണേഴ്സ് സർവീസിന്റെ കണക്കുകൾ പ്രകാരം, മേയ് മാസത്തിൽ നിയന്ത്രണമില്ലാത്ത (Unregulated) മയക്കുമരുന്ന് ഉപയോഗത്തെ തുടർന്ന് മരിച്ചത് 109 പേരാണ്. കോവിഡ് മഹാമാരി ആരംഭിക്കുന്നതിന് തൊട്ടുമുമ്പ്, 2020 ഫെബ്രുവരിന് ശേഷമുള്ള ഏറ്റവും കുറഞ്ഞ പ്രതിമാസ മരണനിരക്കാണിത്.
2023 ഡിസംബറിൽ രേഖപ്പെടുത്തിയ 242 മരണങ്ങളുമായി താരതമ്യം ചെയ്യുമ്പോൾ ഇത് 55 ശതമാനത്തിന്റെ കുറവാണ്. അന്ന് പ്രതിസന്ധിയുടെ ഏറ്റവും രൂക്ഷമായ ഘട്ടത്തിൽ ദിവസേന ശരാശരി എട്ടോളം പേരാണ് ജീവൻ നഷ്ടപ്പെടുത്തിയിരുന്നത്. എന്നാൽ മരണനിരക്ക് കുറഞ്ഞതിന്റെ കാരണം ഒറ്റ ഘടകത്തിലേക്ക് ചൂണ്ടിക്കാണിക്കാൻ കഴിയില്ലെന്നാണ് വിദഗ്ധരുടെ വിലയിരുത്തൽ. ചികിത്സാ സൗകര്യങ്ങൾ വ്യാപിപ്പിച്ചത്, നലോക്സോൺ (Naloxone) മരുന്നിന്റെ ലഭ്യത വർധിപ്പിച്ചത്, മേൽനോട്ടത്തിലുള്ള ലഹരി ഉപയോഗ കേന്ദ്രങ്ങളിലൂടെ നിരവധി ജീവനുകൾ രക്ഷിക്കാനായത് എന്നിവയെല്ലാം ചേർന്നാണ് ഈ മാറ്റമുണ്ടായതെന്നാണ് അവരുടെ വിലയിരുത്തൽ.
അതേസമയം, ലഹരി കൈവശം വയ്ക്കുന്നത് കുറ്റകരമല്ലാതാക്കുന്ന പ്രവിശ്യയുടെ പരീക്ഷണാത്മക നയവും ‘സേഫ് സപ്ലൈ’ പദ്ധതിയും രാഷ്ട്രീയ വിവാദങ്ങൾക്കും വഴിവെച്ചിരുന്നു. മുൻ ആർസിഎംപി ഉദ്യോഗസ്ഥയും ബി.സി. എംഎൽഎയുമായ എലിനോർ സ്റ്റുർക്കോയുടെ അഭിപ്രായത്തിൽ, ഈ നയം നടപ്പാക്കിയ കാലയളവിലാണ് പ്രവിശ്യയുടെ ചരിത്രത്തിലെ ഏറ്റവും കൂടുതൽ അമിതഡോസ് മരണങ്ങൾ റിപ്പോർട്ട് ചെയ്തത്. പൊതുസ്ഥലങ്ങളിലെ തുറന്ന ലഹരി ഉപയോഗത്തിനെതിരെ ശക്തമായ വിമർശനം ഉയർന്നതിനെ തുടർന്ന് പ്രീമിയർ ഡേവിഡ് എബി പിന്നീട് പദ്ധതി പിൻവലിച്ചിരുന്നു.
മരണനിരക്ക് കുറഞ്ഞതിന് പിന്നിൽ മറ്റൊരു നിർണായക കാരണവും ഗവേഷകർ ചൂണ്ടിക്കാട്ടുന്നു. ബ്രിട്ടിഷ് കൊളംബിയ സർവകലാശാലയിലെ ഗവേഷകനായ സാമുവൽ ടോബിയസിന്റെ വിലയിരുത്തലിൽ, അനധികൃത വിപണിയിൽ എത്തുന്ന മയക്കുമരുന്നുകളുടെ ഘടനയിൽ വലിയ മാറ്റമാണ് സംഭവിച്ചിരിക്കുന്നത്. ഫെന്റനിലിനൊപ്പം ഇപ്പോൾ സൈലസീൻ, മെഡെറ്റോമിഡിൻ പോലുള്ള ശക്തമായ ശാന്തക മരുന്നുകൾ കലർത്തുന്നതോടെ ഫെന്റനിലിന്റെ സാന്ദ്രത കുറയുകയും അതുവഴി ശ്വാസതടസ്സം മൂലമുള്ള മരണസാധ്യത കുറയുകയും ചെയ്യുന്നുണ്ടാകാമെന്നാണ് അദ്ദേഹം പറയുന്നത്. എന്നാൽ അതുകൊണ്ട് അപകടം കുറഞ്ഞെന്നല്ല അർഥം. ഇത്തരം മിശ്രിതങ്ങൾ ഉപയോഗിക്കുന്നവർ മണിക്കൂറുകളോളം അബോധാവസ്ഥയിൽ തുടരാനുള്ള സാധ്യത കൂടുതലാണെന്നും അദ്ദേഹം മുന്നറിയിപ്പ് നൽകുന്നു.
ഈ വിലയിരുത്തലിനെ അടിയന്തര ആരോഗ്യസേവന വിഭാഗവും ശരിവയ്ക്കുന്നുണ്ട്. നലോക്സോൺ നൽകി ജീവൻ രക്ഷിക്കാനാകുന്നുണ്ടെങ്കിലും, രോഗികൾ കൂടുതൽ നേരം അബോധാവസ്ഥയിൽ തുടരുന്നതാണ് ഇപ്പോൾ കൂടുതൽ കാണുന്നതെന്ന് നാലു പതിറ്റാണ്ടിലേറെ പരിചയമുള്ള പാരാമെഡിക് ബ്രയൻ ട്വെയ്റ്റ്സ് പറയുന്നു.
അതേസമയം, മരണനിരക്ക് കുറഞ്ഞെങ്കിലും അമിതഡോസ് കേസുകൾ കുറയുന്നില്ലെന്നതാണ് ഏറ്റവും ആശങ്കപ്പെടുത്തുന്ന കാര്യം. 2026-ലെ ആദ്യ ആറുമാസത്തിനുള്ളിൽ മാത്രം ബ്രിട്ടിഷ് കൊളംബിയ എമർജൻസി ഹെൽത്ത് സർവീസസ് കൈകാര്യം ചെയ്ത അമിതഡോസ് കേസുകളുടെ എണ്ണം 2020-ലെ മുഴുവൻ വർഷത്തേതിനേക്കാളും കൂടുതലാണ്. മേയ് മാസത്തിൽ മാത്രം 5,129 അമിതഡോസ് കേസുകളാണ് റിപ്പോർട്ട് ചെയ്തത്. ഇതോടെ ലഹരി ഉപയോഗം ഇപ്പോഴും വ്യാപകമാണെന്നും മരണങ്ങൾ കുറഞ്ഞതുകൊണ്ട് പ്രതിസന്ധി അവസാനിച്ചുവെന്ന് കരുതാനാകില്ലെന്നും വിദഗ്ധർ മുന്നറിയിപ്പ് നൽകുന്നു.
“ഞാൻ എത്ര പേരെ മരണത്തിൽ നിന്ന് തിരികെ കൊണ്ടുവന്നിട്ടുണ്ടെന്ന് എനിക്ക് തന്നെ കണക്കില്ല,” ഫെലിസെല്ല പറയുന്നു. ലഹരിയുടെ വേരുകൾ പിഴുതെറിയാൻ സമൂഹവും ആരോഗ്യ സംവിധാനവും ഇനിയും ദൂരം സഞ്ചരിക്കാനുണ്ടെന്നാണ് അദ്ദേഹത്തിന്റെ മുന്നറിയിപ്പ്.
Drug crisis: Concerns persist despite a drop in the death rate.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
