അതിർത്തി കടന്ന് വീണ്ടും കനേഡിയൻ യാത്രികർ; യു.എസിലേക്കുള്ള സന്ദർശകരുടെ എണ്ണത്തിൽ നേരിയ വർധനവ്

ഒട്ടാവ : യു.എസിലേക്കുള്ള യാത്രകൾ കനേഡിയൻ പൗരന്മാർ ബഹിഷ്‌കരിച്ച പശ്ചാത്തലത്തിലും, യു.എസ് സന്ദർശിക്കുന്ന കനേഡിയൻ യാത്രികരുടെ എണ്ണത്തിൽ നേരിയ വർധനയുണ്ടായതായി പുതിയ റിപ്പോർട്ടുകൾ വ്യക്തമാക്കുന്നു. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം, കഴിഞ്ഞ ജൂൺ മാസത്തിൽ യു.എസിൽ നിന്ന് തിരിച്ചെത്തിയ കനേഡിയൻ യാത്രികരുടെ എണ്ണത്തിൽ മുൻവർഷത്തെ ഇതേ കാലയളവിനെ അപേക്ഷിച്ച് 3.2 ശതമാനത്തിന്റെ വർധനവാണ് രേഖപ്പെടുത്തിയത്. ഏപ്രിൽ മാസത്തിൽ 1.4 ശതമാനവും മേയ് മാസത്തിൽ 9.5 ശതമാനവും വർധനവ് രേഖപ്പെടുത്തിയതിന് പിന്നാലെ തുടർച്ചയായ മൂന്നാം മാസമാണ് യു.എസിലേക്കുള്ള യാത്രികരുടെ എണ്ണത്തിൽ വർധനവുണ്ടാകുന്നത്.

റോഡ് മാർഗമുള്ള യാത്രകളാണ് ഈ വർധനവിന് പ്രധാന കാരണം. കാർ മാർഗം അതിർത്തി കടന്ന് തിരിച്ചെത്തിയ കനേഡിയൻ യാത്രികരുടെ എണ്ണത്തിൽ മുൻവർഷത്തെ ജൂൺ മാസത്തെ അപേക്ഷിച്ച് 5.2 ശതമാനം വർധനവുണ്ടായി. അതേസമയം വിമാനമാർഗം യു.എസിൽ പോയി മടങ്ങിയെത്തിയ കനേഡിയൻ യാത്രികരുടെ എണ്ണത്തിൽ 3.8 ശതമാനം കുറവ് രേഖപ്പെടുത്തിയിട്ടുണ്ട്. യു.എസ് പ്രസിഡന്റ് ഡൊണാൾഡ് ട്രംപിന്റെ വ്യാപാര യുദ്ധ ഭീഷണികളെയും കൂട്ടിച്ചേർക്കൽ നടപടികളെയും തുടർന്ന് 2024-ൽ ഉടലെടുത്ത ഉഭയകക്ഷി അസ്വാരസ്യങ്ങൾക്ക് മുൻപുള്ള സാഹചര്യവുമായി താരതമ്യം ചെയ്യുമ്പോൾ, യാത്രികരുടെ എണ്ണത്തിൽ ഇപ്പോഴും 28.7 ശതമാനത്തിന്റെ വലിയ കുറവുണ്ടെന്ന് അധികൃതർ ചൂണ്ടിക്കാണിക്കുന്നു.

വാണിജ്യ പരസ്യ കാമ്പെയ്‌നുകൾ, കനേഡിയൻ യാത്രികർക്കായി യു.എസ് ടൂറിസം മേഖല പ്രഖ്യാപിച്ച 15 ശതമാനം ഇളവുകൾ ഉൾപ്പെടെയുള്ള പ്രത്യേക പാക്കേജുകൾ, വിമാന ഇന്ധന വിലവർധനവ് മൂലം വിമാന ടിക്കറ്റ് നിരക്കിലുണ്ടായ വർധന, നിലവിൽ നടക്കുന്ന ഫിഫ ലോകകപ്പ് മത്സരങ്ങൾ എന്നിവയാണ് റോഡ് മാർഗമുള്ള കനേഡിയൻ യാത്രികരുടെ ഈ വർധനവിന് കാരണമായി ടൂറിസം രംഗത്തെ വിദഗ്ധർ വിലയിരുത്തുന്നത്. എന്നാൽ ദുർബലമായ കനേഡിയൻ ഡോളറിന്റെ മൂല്യവും മാറിയ യാത്രാ ശീലങ്ങളും ടൂറിസം മേഖലയ്ക്ക് ഇപ്പോഴും വെല്ലുവിളിയാണെന്നും, കാർ മാർഗമുള്ള ഹ്രസ്വകാല യാത്രകൾ യു.എസ് ടൂറിസം ബിസിനസിന് വലിയ തോതിൽ ഗുണം ചെയ്യില്ലെന്നും ടൊറന്റോ മെട്രോപൊളിറ്റൻ യൂണിവേഴ്സിറ്റിയിലെ ഇൻസ്റ്റിറ്റ്യൂട്ട് ഫോർ ഹോസ്പിറ്റാലിറ്റി ആൻഡ് ടൂറിസം റിസർച്ച് ഡയറക്ടർ വെയ്ൻ സ്മിത്ത് വ്യക്തമാക്കി.

Canadian travelers cross the border again; number of visitors to the US increases slightly

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla