ഒട്ടാവ: കാനഡയിലെ താൽക്കാലിക വിദേശ തൊഴിലാളി പ്രോഗ്രാമിൽ (TFW) നിയമലംഘനങ്ങൾ നടത്തിയ തൊഴിലുടമകൾക്കെതിരെ കടുത്ത നടപടികളുമായി സർക്കാർ. കഴിഞ്ഞ വർഷത്തെ അപേക്ഷിച്ച് പിഴത്തുക ഇരട്ടിയാക്കി വർധിപ്പിച്ചുകൊണ്ടാണ് അധികൃതർ കർശന നിലപാട് സ്വീകരിച്ചിരിക്കുന്നത്. 2025 ഏപ്രിൽ 1 മുതൽ 2026 മാർച്ച് 31 വരെയുള്ള കാലയളവിൽ ചട്ടങ്ങൾ ലംഘിച്ച തൊഴിലുടമകളിൽ നിന്ന് 10.2 ദശലക്ഷം ഡോളറിലധികം പിഴ ഈടാക്കി. കഴിഞ്ഞ വർഷം ഇത് 4.5 ദശലക്ഷം ഡോളറായിരുന്നു.
ആകെ 1,488 പരിശോധനകൾ നടത്തിയതിൽ 12 ശതമാനം തൊഴിലുടമകളും ചട്ടങ്ങൾ പാലിക്കുന്നില്ലെന്ന് കണ്ടെത്തി. ഗുരുതരമായ നിയമലംഘനം നടത്തിയ 30 തൊഴിലുടമകളെ പ്രോഗ്രാമിൽ നിന്ന് താൽക്കാലികമായി വിലക്കി. ട്രക്കിംഗ്, കൺസൾട്ടിംഗ്, റസ്റ്റോറന്റ് മേഖലയിലുള്ളവർക്ക് 5 വർഷം വരെ വിലക്കും 240,000 ഡോളർ വരെ പിഴയും ഇതിനോടകം ലഭിച്ചിട്ടുണ്ട്.
കുറഞ്ഞ വേതനമുള്ള തൊഴിലുകൾക്കായി അപേക്ഷിക്കുന്നതിന് മുൻപ് എട്ട് ആഴ്ച തുടർച്ചയായി പരസ്യം ചെയ്യണമെന്നും കനേഡിയൻ യുവാക്കൾക്ക് തൊഴിൽ നൽകാൻ മുൻഗണന നൽകണമെന്നും സർക്കാർ പുതിയ നിബന്ധനകൾ ഏർപ്പെടുത്തിയിട്ടുണ്ട്. വിദേശ തൊഴിലാളികളെ നിയമിക്കുന്നത് അവസാന മാർഗ്ഗമായി മാത്രം കാണണമെന്നും കനേഡിയൻ പൗരന്മാർക്കും സ്ഥിര താമസക്കാർക്കും തൊഴിലവസരങ്ങളിൽ മുൻഗണന ലഭിക്കണമെന്നും സർക്കാർ വ്യക്തമാക്കുന്നു. അത്യാധുനിക അനലിറ്റിക്സ് ഉപയോഗിച്ച് നിയമലംഘനങ്ങൾ കണ്ടെത്താൻ സർക്കാർ സംവിധാനങ്ങൾ കൂടുതൽ സജ്ജമായിട്ടുണ്ട്. ചട്ടങ്ങൾ പാലിക്കാത്ത തൊഴിലുടമകളെ പരസ്യമായി പുറത്തുവിടാനും കനത്ത പിഴയും വിലക്കും ഏർപ്പെടുത്താനും സർക്കാർ മടിക്കില്ലെന്ന് അധികൃതർ മുന്നറിയിപ്പ് നൽകുന്നു.
Canada Reports Record Penalties for Temporary Foreign Worker (TFW) Program Violations
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
