വടക്കേ അമേരിക്കയിലെ ഏറ്റവും സുരക്ഷിതമായ നഗരങ്ങൾ: ആദ്യ അഞ്ചും കാനഡയിൽ

ഒട്ടാവ: വടക്കേ അമേരിക്കയിലെ ഏറ്റവും സുരക്ഷിതമായ നഗരങ്ങളെ കണ്ടെത്താൻ നടത്തിയ പഠനത്തിൽ കാനഡയുടെ അവിശ്വസനീയമായ മുന്നേറ്റം. നൂംബിയോയുടെ ഏറ്റവും പുതിയ സേഫ്റ്റി ഇൻഡക്സ് പ്രകാരം വടക്കേ അമേരിക്കയിലെ ഏറ്റവും സുരക്ഷിതമായ ആദ്യ അഞ്ച് നഗരങ്ങളും കാനഡയിലാണ് സ്ഥിതി ചെയ്യുന്നത്. ക്യൂബെക്ക്, ഒന്റാറിയോ എന്നീ പ്രവിശ്യകളിലായി വ്യാപിച്ചുകിടക്കുന്ന ഈ നഗരങ്ങൾ സുരക്ഷയുടെ കാര്യത്തിൽ ലോകോത്തര നിലവാരമാണ് പുലർത്തുന്നതെന്ന് കണക്കുകൾ വ്യക്തമാക്കുന്നു. പട്ടികയിലെ ആദ്യ പത്ത് നഗരങ്ങളിൽ ആറെണ്ണവും കാനഡയിൽ നിന്നുള്ളതാണ് എന്നതും രാജ്യത്തിന്റെ സുരക്ഷാ സംവിധാനങ്ങളുടെ മികവിനെയാണ് സൂചിപ്പിക്കുന്നത്.

ക്യൂബെക്ക് സിറ്റിയാണ് പട്ടികയിൽ ഒന്നാമതെത്തിയത്. തൊട്ടുപിന്നാലെ ബർലിംഗ്ടൺ, ഒട്ടാവ, മോൺട്രിയൽ, ഗ്വെൽഫ് എന്നീ നഗരങ്ങൾ സ്ഥാനം പിടിച്ചു. വടക്കേ അമേരിക്കയിലെ മൊത്തം 79 നഗരങ്ങളെ ഉൾപ്പെടുത്തി നടത്തിയ ഈ പഠനത്തിൽ 33 കനേഡിയൻ നഗരങ്ങൾ ഇടംപിടിച്ചത് വലിയൊരു നേട്ടമാണ്. പൗരന്മാരുടെ സുരക്ഷാബോധം, കുറ്റകൃത്യങ്ങളെക്കുറിച്ചുള്ള ആശങ്കകൾ, പകലും രാത്രിയും അനുഭവപ്പെടുന്ന സുരക്ഷ, മോഷണം, ആക്രമണം തുടങ്ങിയ നിരവധി ഘടകങ്ങൾ അടിസ്ഥാനമാക്കിയാണ് ഈ സൂചിക തയ്യാറാക്കിയിരിക്കുന്നത്.

കാനഡയിലെ ഈ പ്രധാന നഗരങ്ങളെല്ലാം ഉയർന്ന സുരക്ഷാ സൂചികയുള്ളവയായിട്ടാണ് (High Safety Index) വിലയിരുത്തപ്പെടുന്നത്. കുറ്റകൃത്യങ്ങളുടെ തോത് വളരെ കുറവാണെന്നതും ഈ നഗരങ്ങളുടെ പ്രത്യേകതയാണ്. വാൻകൂവർ ഒഴികെയുള്ള കാനഡയിലെ മിക്ക നഗരങ്ങളും കുറഞ്ഞ കുറ്റകൃത്യ നിരക്ക് (Low Crime Index) രേഖപ്പെടുത്തുന്നു. വാൻകൂവർ മാത്രമാണ് ഈ പട്ടികയിൽ മിതമായ (Moderate) കുറ്റകൃത്യ നിരക്ക് വിഭാഗത്തിൽ ഉൾപ്പെട്ടിരിക്കുന്നത്. ഒന്റാറിയോ പ്രവിശ്യയ്ക്കാണ് ഏറ്റവും കൂടുതൽ നഗരങ്ങളെ പട്ടികയിൽ ഉൾപ്പെടുത്താൻ സാധിച്ചത് എന്നത് ശ്രദ്ധേയമാണ്. ഇതിനുപുറമെ ക്യൂബെക്ക്, ബ്രിട്ടീഷ് കൊളംബിയ, ആൽബെർട്ട, നോവ സ്കോഷ്യ എന്നീ പ്രവിശ്യകളും പട്ടികയിൽ ഇടംപിടിച്ചിട്ടുണ്ട്.

കഴിഞ്ഞ അഞ്ച് വർഷത്തെ വിവരങ്ങൾ ശേഖരിച്ചാണ് നൂംബിയോ ഈ സൂചിക തയ്യാറാക്കുന്നത്. താമസക്കാരുടെ അനുഭവങ്ങളും അവർക്ക് നഗരങ്ങളിലുള്ള സുരക്ഷാബോധവുമാണ് ഇതിന്റെ അടിസ്ഥാനം. പൊതുജനങ്ങളുടെ അഭിപ്രായങ്ങൾക്കൊപ്പം വസ്തുതാപരമായ കുറ്റകൃത്യങ്ങളുടെ കണക്കുകളും ഇതിനായി വിശകലനം ചെയ്യുന്നു. സമാധാനപരമായ ജീവിതവും സുരക്ഷിതമായ ചുറ്റുപാടും ആഗ്രഹിക്കുന്നവർക്ക് കാനഡയിലെ ഈ നഗരങ്ങൾ മികച്ചൊരു തിരഞ്ഞെടുപ്പായി മാറുന്നുവെന്നത് വ്യക്തമാണ്. ഏതായാലും വടക്കേ അമേരിക്കൻ ഭൂഖണ്ഡത്തിൽ സുരക്ഷയുടെ കാര്യത്തിൽ കാനഡയുടെ ഈ ആധിപത്യം തുടരുകയാന്ന്.

Five Canadian cities take top spots in international safety rankings

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla