ഒട്ടാവ: കാനഡയിൽ ജൂൺ മാസത്തിൽ 18,000 പുതിയ തൊഴിലവസരങ്ങൾ സൃഷ്ടിക്കപ്പെടുകയും രാജ്യത്തെ തൊഴിലില്ലായ്മ നിരക്ക് 6.5 ശതമാനമായി കുറയുകയും ചെയ്തു. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ റിപ്പോർട്ടിലാണ് ഇക്കാര്യമുള്ളത്. ജൂണിൽ വെറും പതിനായിരം ജോലികൾ മാത്രമേ പുതുതായി ഉണ്ടാകൂ എന്നായിരുന്നു സാമ്പത്തിക വിദഗ്ധരുടെ കണക്കുകൂട്ടൽ. എന്നാൽ, ആ പ്രതീക്ഷകളെ മറികടക്കുന്ന മികച്ച വളർച്ചയാണ് ഇപ്പോൾ രാജ്യത്തുണ്ടായിരിക്കുന്നത്. മേയ് മാസത്തിൽ 87,800 പേർക്ക് പുതുതായി ജോലി ലഭിച്ചതിന് പിന്നാലെയാണ് ജൂണിലും കാനഡയിലെ തൊഴിൽ വിപണി ഈ മികച്ച നേട്ടം നിലനിർത്തിയത്.
ഹോട്ടൽ-ഭക്ഷണ ശാലകൾ, മൊത്ത-ചില്ലറ കച്ചവട സ്ഥാപനങ്ങൾ, പാർട്ട് ടൈം ജോലികൾ എന്നിവടങ്ങളിലാണ് ജൂൺ മാസത്തിൽ കൂടുതൽ ആളുകൾക്ക് ജോലി ലഭിച്ചത്. ഫിഫ ലോകകപ്പുമായി ബന്ധപ്പെട്ടുണ്ടായ താൽക്കാലിക ജോലികളും ഈ വർദ്ധനവിന് കാരണമായിട്ടുണ്ട്. അതേസമയം, അമേരിക്കൻ നികുതി നിയന്ത്രണങ്ങൾ കാരണം നിർമ്മാണ മേഖലയിൽ പതിനേഴായിരത്തോളം ജോലികൾ നഷ്ടപ്പെടുകയും ചെയ്തു. ഏറെക്കാലമായി ജോലി കിട്ടാൻ ബുദ്ധിമുട്ടിയിരുന്ന 15 നും 24 നും ഇടയിൽ പ്രായമുള്ള യുവാക്കൾക്ക് ഈ മാസം വലിയ ആശ്വാസമായി. യുവാക്കൾക്കായി 33,000 പുതിയ അവസരങ്ങൾ വന്നതോടെ അവരുടെ തൊഴിലില്ലായ്മ നിരക്ക് 12.7 ശതമാനമായി കുറഞ്ഞു. പഠനത്തോടൊപ്പം വേനൽക്കാല അവധിക്ക് ജോലി നോക്കുന്ന വിദ്യാർത്ഥികൾക്കും റീട്ടെയിൽ, വിനോദ മേഖലകളിൽ കൂടുതൽ അവസരങ്ങൾ ലഭിച്ചിട്ടുണ്ട്.
രാജ്യത്തെ സ്ഥിരം ജീവനക്കാരുടെ മണിക്കൂർ വേതനത്തിൽ (മണിക്കൂറിലുള്ള ശമ്പളം) ജൂണിൽ 3.7 ശതമാനം വർദ്ധനവുണ്ടായി. മേയ് മാസത്തെക്കാൾ (3.2%) ഉയർന്ന നിരക്കാണിത്. രാജ്യത്തെ പണപ്പെരുപ്പം വിലയിരുത്താൻ കേന്ദ്ര ബാങ്കായ ‘ബാങ്ക് ഓഫ് കാനഡ’ ശ്രദ്ധിക്കുന്ന പ്രധാന കാര്യങ്ങളിലൊന്നാണിത്. 2026-ന്റെ ആദ്യ നാല് മാസങ്ങളിൽ രാജ്യത്ത് വലിയ തോതിൽ തൊഴിൽ നഷ്ടം നേരിട്ടിരുന്നെങ്കിലും, മേയ്, ജൂൺ മാസങ്ങളിലെ ഈ തിരിച്ചുവരവ് കാനഡയുടെ സാമ്പത്തിക സ്ഥിതി മെച്ചപ്പെടുത്തുമെന്നാണ് കരുതുന്നത്. വരാനിരിക്കുന്ന ബുധനാഴ്ച ബാങ്ക് ഓഫ് കാനഡ പ്രഖ്യാപിക്കാനിരിക്കുന്ന പുതിയ പലിശനിരക്ക് തീരുമാനങ്ങളെ ഈ റിപ്പോർട്ട് വലിയ രീതിയിൽ സ്വാധീനിക്കാൻ സാധ്യതയില്ലെന്നും വിദഗ്ധർ വിലയിരുത്തുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Calculations proved wrong! Canada sees a massive surge for the second consecutive month; 18,000 new opportunities in June alone.
