ബാൻഫ് നാഷണൽ പാർക്കിൽ സന്ദർശകരുടെ തിരക്ക് വർധിക്കുന്നു; കാനഡ സ്ട്രോംഗ് പാസിനെതിരെ ആശങ്കയുമായി പ്രദേശവാസികൾ

ബാൻഫ്: ഫെഡറൽ സർക്കാരിന്റെ സൗജന്യ പ്രവേശന പദ്ധതിയായ ‘കാനഡ സ്ട്രോംഗ് പാസ്’ ഈ വർഷവും തുടരുന്ന പശ്ചാത്തലത്തിൽ, ആൽബർട്ടയിലെ പ്രശസ്തമായ ബാൻഫ് ദേശീയ പാർക്കിൽ സന്ദർശകരുടെ തിരക്കും ഗതാഗതക്കുരുക്കും അനിയന്ത്രിതമാകുമെന്ന് പ്രദേശവാസികൾ. കാനഡയിലെ പാർക്കുകളിലേക്കും ചരിത്ര സ്മാരകങ്ങളിലേക്കും ജനങ്ങൾക്ക് സൗജന്യമായി കടന്നുചെല്ലാൻ 2025-ൽ പ്രധാനമന്ത്രി മാർക്ക് കാർണി തുടങ്ങിയ പദ്ധതിയാണിത്. ഈ 2026 സീസണിലും പദ്ധതി നീട്ടിയതോടെ ബാൻഫ്, ജാസ്പർ തുടങ്ങിയ സ്ഥലങ്ങളിലേക്ക് ആളുകൾ ഒഴുകിയെത്തുമെന്നാണ് കരുതുന്നത്. നഗരത്തിൽ ഇപ്പോൾ തന്നെ വണ്ടികൾ പാർക്ക് ചെയ്യാൻ സ്ഥലമില്ലെന്നും ഇത്രയും വലിയ തിരക്ക് താങ്ങാൻ ബാൻഫിന് കഴിയില്ലെന്നും 24 വർഷമായി ഇവിടെ താമസിക്കുന്ന കൈൽ മിൽസ് പറയുന്നു.

എന്നാൽ, ഈ പദ്ധതി കാരണം വിനോദസഞ്ചാര മേഖലയ്ക്കും ബിസിനസുകൾക്കും വലിയ ലാഭമുണ്ടെന്നാണ് കടയുടമകൾ പറയുന്നത്. കൂടുതൽ ആളുകൾ വരുന്നത് വഴി നാട്ടിലെ കച്ചവടം കൂടിയെന്ന് ‘ബ്ലോക്ക് കിച്ചൻ + ബാർ’ എന്ന ഹോട്ടലിന്റെ ഉടമ സ്റ്റെഫാൻ പ്രെവോസ്റ്റ് പറഞ്ഞു. ഓസ്ട്രേലിയയിൽ നിന്ന് ആദ്യമായി കാനഡ കാണാൻ വന്ന സ്റ്റീവൻ സാംമർട്ട് ഉൾപ്പെടെയുള്ള വിദേശ സഞ്ചാരികളും ഈ സൗജന്യ പദ്ധതിയെ പുകഴ്ത്തി. അതേസമയം, ഈ നീക്കത്തെ ബാൻഫിലെ മുൻ മേയറും ഇപ്പോഴത്തെ സെനറ്ററുമായ കാരൻ സോറൻസൻ വിമർശിച്ചു. ഇപ്പോൾ തന്നെ ആളുകൾ ഒരുപാട് എത്തുന്ന സ്ഥലങ്ങളിലേക്ക് വീണ്ടും ആളുകളെ വിളിച്ചുകൂട്ടുമ്പോൾ പ്രശ്നങ്ങൾ കൂടുമെന്നും, അതിനുപകരം കാനഡയിൽ അധികമാരും അറിയാതെ കിടക്കുന്ന മറ്റ് നല്ല സ്ഥലങ്ങളിലേക്ക് സഞ്ചാരികളെ ആകർഷിക്കാനാണ് സർക്കാർ ശ്രമിക്കേണ്ടതെന്നും അവർ പറഞ്ഞു. ഈ വർഷത്തെ സൗജന്യ പാസ് പദ്ധതി സെപ്റ്റംബർ 7 വരെ ഉണ്ടായിരിക്കും.

തിരക്ക് നിയന്ത്രിക്കാൻ സന്ദർശകർ സ്വന്തം വണ്ടികൾ ഒഴിവാക്കി ബസ് പോലുള്ള പൊതുഗതാഗത സംവിധാനങ്ങൾ ഉപയോഗിക്കണമെന്ന് നഗരസഭ ആവശ്യപ്പെട്ടിട്ടുണ്ട്. കഴിഞ്ഞ വർഷം മാത്രം 70 ലക്ഷത്തോളം വണ്ടികളാണ് ബാൻഫിൽ എത്തിയത്. ഇതിൽ ജൂലൈ, ഓഗസ്റ്റ് മാസങ്ങളിൽ മാത്രം 18 ലക്ഷം വീതം വണ്ടികൾ ഉണ്ടായിരുന്നു. ഇവിടെ വണ്ടി പാർക്ക് ചെയ്യാൻ ഒരു മണിക്കൂറിന് 12 ഡോളർ ഫീസ് ആക്കിയിട്ടും തിരക്കിന് ഒരു കുറവുമില്ലെന്ന് മേയർ കോറി ഡിമാനോ പറഞ്ഞു. സ്ഥലം കിട്ടാതെ വണ്ടികൾ നഗരത്തിൽ ചുറ്റിക്കറങ്ങുന്നത് വലിയ ബ്ലോക്കിന് കാരണമാകുന്നുണ്ട്. എങ്കിലും, അധികൃതരുടെ നിർദേശങ്ങൾ പാലിച്ചുകൊണ്ട് കഴിഞ്ഞ ജൂണിനെ അപേക്ഷിച്ച് സ്വന്തം വണ്ടികളുമായി വന്നവരുടെ എണ്ണത്തിൽ 2 ശതമാനം കുറവ് വന്നിട്ടുണ്ടെന്നും, ബസ്സും മറ്റും ഉപയോഗിക്കുന്നവരുടെ എണ്ണം 28 ശതമാനം കൂടിയതായും നഗരസഭ അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Rising visitor crowds in Banff National Park; locals express concern over the 'Canada Strong' pass.