ന്യൂഡൽഹി: ഇൻസ്റ്റാഗ്രാമിൽ കുട്ടികളെ ലൈംഗികമായി ചൂഷണം ചെയ്യുന്നതും ദുരുപയോഗം ചെയ്യുന്നതുമായ ഉള്ളടക്കങ്ങൾ അടങ്ങിയ പരസ്യങ്ങൾ പ്രത്യക്ഷപ്പെട്ട സംഭവത്തിൽ പ്രമുഖ സമൂഹമാധ്യമ കമ്പനിയായ മെറ്റയ്ക്ക് കേന്ദ്ര സർക്കാർ കർശന നോട്ടീസ് അയച്ചു. ഇത്തരം നിയമവിരുദ്ധമായ പരസ്യങ്ങളും വിവരങ്ങളും അടിയന്തിരമായി നീക്കം ചെയ്യാൻ കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം ഇൻസ്റ്റാഗ്രാമിനോട് ആവശ്യപ്പെട്ടു. സംഭവത്തിൽ കമ്പനിയുടെ ഭാഗത്തുനിന്നുണ്ടായ വീഴ്ചകളെക്കുറിച്ച് വിശദമായ റിപ്പോർട്ട് ഏഴ് ദിവസത്തിനകം സമർപ്പിക്കണമെന്നും സർക്കാർ ഉത്തരവിട്ടിട്ടുണ്ട്.
കുട്ടികളെ ലൈംഗികമായി പീഡിപ്പിക്കുന്ന ദൃശ്യങ്ങളിലേക്ക് ഉപയോക്താക്കളെ നയിക്കുന്ന പണമടച്ചുള്ള പരസ്യങ്ങൾ ഇൻസ്റ്റാഗ്രാം പ്രദർശിപ്പിക്കുന്നതായി ബിബിസി നടത്തിയ പ്രത്യേക അന്വേഷണത്തിൽ കണ്ടെത്തിയിരുന്നു. വളരെ കുറഞ്ഞ തുകയ്ക്ക് ഇത്തരം ദൃശ്യങ്ങൾ വിൽക്കുന്ന ടെലിഗ്രാം ലിങ്കുകളിലേക്കാണ് ഈ പരസ്യങ്ങൾ ആളുകളെ എത്തിച്ചിരുന്നത്. ഇൻസ്റ്റാഗ്രാമിന്റെ സുരക്ഷാ പരിശോധനകൾ മറികടന്നാണ് ഈ പരസ്യങ്ങൾ പ്ലാറ്റ്ഫോമിൽ പ്രത്യക്ഷപ്പെട്ടത്. ഒരു അപരനാമത്തിൽ അക്കൗണ്ട് തുടങ്ങി നടത്തിയ പരീക്ഷണത്തിലാണ്, കുട്ടികളെ മോശമായി ചിത്രീകരിക്കുന്ന മുപ്പതോളം പരസ്യങ്ങൾ ഇൻസ്റ്റാഗ്രാം തനിയെ ഉപയോക്താക്കൾക്ക് ശുപാർശ ചെയ്യുന്നതായി കണ്ടെത്തിയത്.
വിഷയം പുറത്തുവന്നതിനെ തുടർന്ന് കുറ്റക്കാരായ പരസ്യദാതാക്കളുടെ അക്കൗണ്ടുകൾ സസ്പെൻഡ് ചെയ്തതായും പരസ്യങ്ങൾ നീക്കം ചെയ്തതായും മെറ്റാ അറിയിച്ചു. സാങ്കേതിക സംവിധാനങ്ങളിലെ പിഴവുകൾ കാരണമാണ് ഇവ പ്ലാറ്റ്ഫോമിൽ വന്നതെന്നും, ഇത്തരം ഉള്ളടക്കങ്ങൾ തടയാൻ കർശന നടപടികൾ തുടരുമെന്നും മെറ്റാ വ്യക്തമാക്കി. ഡിജിറ്റൽ പ്ലാറ്റ്ഫോമുകൾ വഴി കുട്ടികൾക്കെതിരെയുള്ള അതിക്രമങ്ങൾ പ്രചരിപ്പിക്കുന്നത് തടയുന്നതിനുള്ള കേന്ദ്ര സർക്കാരിന്റെ ശക്തമായ നടപടികളുടെ ഭാഗമായാണ് ഇപ്പോൾ മെറ്റയ്ക്ക് നോട്ടീസ് നൽകിയിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Reply required within seven days; India grants Meta time to remove controversial advertisements.
