ഒട്ടാവ: കാനഡ സർക്കാർ പുതിയ യുദ്ധവിമാനങ്ങൾ വാങ്ങുന്ന കാര്യത്തിൽ പുനഃപരിശോധന നടത്തിവരുന്നതിനിടെ, ഔദ്യോഗിക നിയമങ്ങൾ ലംഘിച്ച് അമേരിക്കൻ നിർമ്മിത എഫ്-35 യുദ്ധവിമാനങ്ങളുടെ ചിത്രമുള്ള ബിസിനസ് കാർഡ് വിതരണം ചെയ്ത ഉദ്യോഗസ്ഥയ്ക്ക് കടുത്ത ശാസനം. ഒട്ടാവയിൽ നടന്ന ഒരു സൈനിക പ്രദർശനത്തിനിടെയാണ് പ്രതിരോധ വകുപ്പിലെ ഉയർന്ന ഉദ്യോഗസ്ഥയായ ക്രിസ്റ്റാ-ലിൻ ഫെർഗൂസൺ ചട്ടവിരുദ്ധമായി ഈ കാർഡുകൾ വിതരണം ചെയ്തത്. സർക്കാർ നിയമപ്രകാരം ഉദ്യോഗസ്ഥരുടെ കാർഡുകളിൽ കാനഡയുടെ ദേശീയ പതാക മാത്രമേ ചിത്രമായി വെയ്ക്കാൻ പാടുള്ളൂ. എന്നാൽ ഫെർഗൂസൺ തന്റെ കാർഡിൽ അമേരിക്കയുടെ എഫ്-35 വിമാനങ്ങളുടെ ചിത്രങ്ങൾ ഉൾപ്പെടുത്തുകയായിരുന്നു. സംഭവം വിവാദമായതോടെ ഈ കാർഡിന്റെ ഉപയോഗം ഉടൻ നിർത്താൻ പ്രതിരോധ വകുപ്പ് വക്താവ് കെന്നെഡ് സദിക്കു ഉത്തരവിട്ടു.
കാനഡ ഏത് വിമാനം വാങ്ങണം എന്നതിനെക്കുറിച്ച് വലിയ ചർച്ചകൾ നടക്കുന്ന സമയത്ത്, ഒരു പ്രത്യേക അമേരിക്കൻ വിമാനത്തിന് പരസ്യം നൽകുന്ന രീതിയിൽ കാർഡ് ഇറക്കിയത് വലിയ വീഴ്ചയാണെന്ന് രാഷ്ട്രീയ നിരീക്ഷകർ ചൂണ്ടിക്കാണിക്കുന്നു. സർക്കാർ ഉദ്യോഗസ്ഥർ എപ്പോഴും നിഷ്പക്ഷത പാലിക്കണമെന്നും ഇവർ ഓർമ്മിപ്പിച്ചു. എന്നാൽ, തന്റെ ഔദ്യോഗിക ജോലിയുടെ ഭാഗമായി മാത്രമാണ് ഫെർഗൂസൺ ഈ ചിത്രങ്ങൾ കാർഡിൽ വെച്ചതെന്നും, സർക്കാരിന്റെ തീരുമാനങ്ങളെ സ്വാധീനിക്കാൻ ശ്രമിച്ചിട്ടില്ലെന്നുമാണ് പ്രതിരോധ വകുപ്പിന്റെ വിശദീകരണം. സൈന്യത്തിന്റെ അഭിമാനം കാണിക്കാൻ ചെയ്ത ഒരു സാധാരണ കാര്യം മാത്രമാണിതെന്ന അഭിപ്രായവും ചില സൈനിക വിദഗ്ധർക്കുണ്ട്.
88 യുദ്ധവിമാനങ്ങൾ വാങ്ങാനായി 2023-ലാണ് കാനഡ എഫ്-35 പദ്ധതി തുടങ്ങിയത്. ആദ്യഘട്ടമായി 16 വിമാനങ്ങൾക്കായുള്ള കരാർ ഒപ്പിട്ടെങ്കിലും, അമേരിക്കയുമായുള്ള ചില വ്യാപാര തർക്കങ്ങൾ കാരണം 2025 മാർച്ചിൽ കാനഡ ഈ പദ്ധതി വീണ്ടും പരിശോധിക്കാൻ തുടങ്ങി. അമേരിക്കൻ വിമാനങ്ങൾക്ക് പകരം സ്വീഡൻ കമ്പനിയുടെ ഗ്രിപ്പൻ യുദ്ധവിമാനങ്ങൾ കൂടി വാങ്ങുന്ന കാര്യം ഇപ്പോൾ കാനഡ സർക്കാരിന്റെ പരിഗണനയിലാണ്. എന്നാൽ കനേഡിയൻ വ്യോമസേനയ്ക്ക് എഫ്-35 വിമാനങ്ങളോടാണ് താല്പര്യം. സർക്കാരും പ്രതിരോധ വകുപ്പും തമ്മിലുള്ള ഈ അഭിപ്രായവ്യത്യാസമാണ് പുതിയ വിവാദത്തിന് പിന്നിലെന്നാണ് വിലയിരുത്തൽ. ഇതേത്തുടർന്ന്, ഔദ്യോഗിക നിയമങ്ങൾ എല്ലാവരും കർശനമായി പാലിക്കണമെന്ന് പ്രതിരോധ വകുപ്പ് ജീവനക്കാർക്ക് വീണ്ടും നിർദ്ദേശം നൽകിയിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canadian official reprimanded by DND for distributing cards featuring F-35 fighter jets.
