ടൊറന്റോ: ഒന്റാറിയോ പ്രവിശ്യയിൽ വൻകുടലിലെ ക്യാൻസർ (കൊളോറെക്ടൽ ക്യാൻസർ) മുൻകൂട്ടി കണ്ടെത്തുന്നതിനുള്ള സൗജന്യ പരിശോധനാ പ്രായപരിധി 50-ൽ നിന്നും 45 ആയി കുറച്ചു. ജൂലൈ ഒന്നു മുതലാണ് പുതിയ ഭേദഗതി പ്രാബല്യത്തിൽ വന്നത്. ഇതോടെ 45 വയസ്സും അതിനുമുകളിലും പ്രായമുള്ള ഒന്റാറിയോ നിവാസികൾക്ക് മലത്തിൽ ഒളിഞ്ഞിരിക്കുന്ന രക്തത്തിന്റെ സാന്നിധ്യം കണ്ടെത്താനുള്ള ‘ഫിറ്റ്’ (FIT – Fecal Immunochemical Test) പരിശോധന ഇനി വീട്ടിലിരുന്ന് തന്നെ സൗജന്യമായി ചെയ്യാൻ സാധിക്കും.
പ്രിൻസ് എഡ്വേർഡ് ഐലൻഡിന് (P.E.I) ശേഷം ഈ മാതൃകാപരമായ തീരുമാനം കൈക്കൊള്ളുന്ന രണ്ടാമത്തെ പ്രവിശ്യയാണ് ഒന്റാറിയോ. പ്രിൻസ് എഡ്വേർഡ് ഐലൻഡ് കഴിഞ്ഞ വർഷം മാർച്ചിലാണ് പ്രായപരിധി 45 ആയി കുറച്ചത്. യുവതലമുറയിൽ വൻകുടലിലെ ക്യാൻസർ നിരക്ക് വർധിച്ചുവരുന്ന പശ്ചാത്തലത്തിലാണ് ഈ നിർണായക നീക്കമെന്ന് കൊളോറെക്ടൽ ക്യാൻസർ കാനഡ പ്രസിഡന്റ് ബാരി സ്റ്റീൻ വ്യക്തമാക്കി. വൻകുടലിലോ മലാശയത്തിലോ ഉണ്ടാകുന്ന ചെറിയ മുഴകൾ (പോളിപ്സ്) ക്യാൻസറായി മാറുന്നതിന് മുൻപ് തന്നെ കണ്ടെത്തി നീക്കം ചെയ്താൽ രോഗം പൂർണ്ണമായും തടയാനാകും.
ക്യാൻസർ കെയർ ഒന്റാറിയോയുടെ കണക്കുകൾ പ്രകാരം, പ്രാരംഭ ഘട്ടത്തിൽ തന്നെ രോഗം തിരിച്ചറിഞ്ഞാൽ 10-ൽ 9 പേർക്കും പൂർണ്ണ രോഗമുക്തി സാധ്യമാണ്. മറ്റ് പ്രവിശ്യകളും ടെറിട്ടറികളും ഈ മാതൃക പിന്തുടരണമെന്ന് കാനഡ ക്യാൻസർ സൊസൈറ്റിയും ബാരി സ്റ്റീനും സംയുക്തമായി ആവശ്യപ്പെട്ടു. ഇത് രോഗികളുടെ ജീവൻ രക്ഷിക്കുന്നതിനൊപ്പം ആരോഗ്യരംഗത്തെ ഭാരിച്ച ചികിത്സാച്ചെലവ് കുറയ്ക്കാനും സഹായിക്കും.
സാധാരണ രോഗസാധ്യതയുള്ളവർക്കായി മറ്റ് പ്രവിശ്യകളിൽ നിലവിൽ 50 മുതൽ 74 വയസ്സുവരെയുള്ളവർക്കാണ് ഫിറ്റ് (FIT) പരിശോധന നിർദ്ദേശിക്കുന്നത്. എന്നാൽ കുടുംബത്തിൽ ആർക്കെങ്കിലും (മാതാപിതാക്കൾ, സഹോദരങ്ങൾ അല്ലെങ്കിൽ മക്കൾ) 60 വയസ്സിന് മുൻപോ, അല്ലെങ്കിൽ ഒന്നിലധികം കുടുംബാംഗങ്ങൾക്കോ വൻകുടലിലെ ക്യാൻസർ വന്നിട്ടുണ്ടെങ്കിൽ അവർ ഉയർന്ന രോഗസാധ്യതയുള്ളവരായി (Higher Risk) കണക്കാക്കപ്പെടും. ഇങ്ങനെയുള്ളവർക്ക് ഫിറ്റ് പരിശോധനയ്ക്ക് പകരം 40 വയസ്സ് മുതലോ, അല്ലെങ്കിൽ കുടുംബാംഗത്തിന് രോഗം സ്ഥിരീകരിച്ച പ്രായത്തിന് 10 വർഷം മുൻപോ നേരിട്ട് കൊളോണോസ്കോപ്പി പരിശോധന നടത്തേണ്ടതുണ്ട്.
അതേസമയം, മലത്തിൽ പ്രകടമായ രക്തം കാണപ്പെടുക, മലാശയത്തിൽ നിന്നുള്ള രക്തസ്രാവം, മലവിസർജ്ജന രീതികളിലെ മാറ്റം, വിളർച്ച (Anemia) തുടങ്ങിയ രോഗലക്ഷണങ്ങൾ ഉള്ളവർ ഫിറ്റ് പരിശോധനയ്ക്ക് കാത്തുനിൽക്കാതെ നേരിട്ട് വിദഗ്ദ്ധ ചികിത്സ തേടേണ്ടതാണ്. ക്യാൻസർ മുൻകൂട്ടി കണ്ടെത്തുന്നതിന്റെ പ്രാധാന്യത്തിന് അടിവരയിടുന്നതാണ് ഒട്ടാവ സ്വദേശിയായ തൃഷ റൈലി എന്ന 55-കാരിയുടെ അനുഭവം.
51-ാം വയസ്സിൽ അപ്രതീക്ഷിതമായി നടത്തിയ കൊളോണോസ്കോപ്പിയിലാണ് തനിക്ക് മൂന്നാം ഘട്ട വൻകുടൽ ക്യാൻസർ ആണെന്ന് തൃഷ തിരിച്ചറിഞ്ഞത്. രോഗം മറ്റ് ലിംഫ് നോഡുകളിലേക്ക് പടർന്നതിനാൽ ശസ്ത്രക്രിയയ്ക്കും മാസങ്ങൾ നീണ്ട കഠിനമായ കീമോതെറാപ്പിക്കും അവർക്ക് വിധേയയാകേണ്ടി വന്നു. വൻകുടലിലെ സാധാരണ മുഴകൾ ക്യാൻസറായി മാറാൻ ഏകദേശം 10 വർഷമെടുക്കുമെന്നിരിക്കെ, 45-ാം വയസ്സിൽ തന്നെ ഈ പരിശോധനാ സൗകര്യം ലഭ്യമായിരുന്നെങ്കിൽ രോഗം ഇത്രയും സങ്കീർണ്ണമാകുമായിരുന്നില്ലെന്ന് തൃഷ ഓർക്കുന്നു. ഒന്റാറിയോയുടെ പുതിയ തീരുമാനം തന്നെപ്പോലെയുള്ള ഒട്ടനവധി മനുഷ്യരുടെ ജീവൻ രക്ഷിക്കുമെന്ന പ്രത്യാശയിലാണ് നിലവിൽ ക്യാൻസർ വിമുക്തയായ തൃഷ റൈലി.
Complete recovery if detected early; Ontario introduces a crucial change in cancer screening.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
