ചേർത്തുപിടിക്കേണ്ട കൈകൾ തന്നെ ജീവനെടുത്തു; കാനഡയെ നടുക്കി ദാരുണ സംഭവം; പിഞ്ചുകുട്ടികളെ കൊലപ്പെടുത്തിയ ശേഷം പിതാവ് ജീവനൊടുക്കി

ഒട്ടാവ: ഒട്ടാവയിൽ രണ്ട് പിഞ്ചുകുട്ടികളെ കൊലപ്പെടുത്തിയ ശേഷം പിതാവ് ജീവനൊടുക്കിയ നിലയിൽ. ഒട്ടാവയിലെ ഫിൻഡ്‌ലി ക്രീക്ക് മേഖലയിലെ മന്തിവില്ല ക്രസന്റിലുള്ള വസതിയിലാണ് ഏഴും പന്ത്രണ്ടും വയസ്സുള്ള ആൺകുട്ടികളെ മരിച്ച നിലയിൽ കണ്ടെത്തിയത്. പിതാവിന്റെ മൃതദേഹം വസതിയിൽ നിന്നും കിലോമീറ്ററുകൾ അകലെ ഹൈവേ 416-ന് സമീപമുള്ള കാർപൂൾ പാർക്കിങ് കേന്ദ്രത്തിൽ കത്തിനശിച്ച കാറിനുള്ളിലാണ് കണ്ടെത്തിയത്.

ഒട്ടാവ പൊലീസിന്റെ പ്രാഥമിക അന്വേഷണത്തിലാണ് ഇതൊരു കൊലപാതകവും തുടർന്നുണ്ടായ ആത്മഹത്യയുമാണെന്ന് സ്ഥിരീകരിച്ചത്. തിങ്കളാഴ്ച രാവിലെ പത്ത് മണിയോടെ വീട്ടിലുള്ളവരുടെ സുരക്ഷിതത്വം ഉറപ്പാക്കാനായി നടത്തിയ പരിശോധനയിലാണ് (Wellness check) രണ്ട് ആൺകുട്ടികളുടെയും മൃതദേഹം പൊലീസ് കണ്ടെത്തുന്നത്. തുടർന്ന് നടത്തിയ തിരച്ചിലിലാണ് കുട്ടികളുടെ പിതാവിനെ കെംപ്റ്റ്‌വില്ലിന് സമീപം ഹൈവേയിലെ വണ്ടിക്കുള്ളിൽ മരിച്ച നിലയിൽ കണ്ടെത്തിയത്.

സംഭവവുമായി ബന്ധപ്പെട്ട് കിഴക്കൻ ഒന്റാറിയോയിലെ ഇറോക്വോയിസിലുള്ള ഒരു സ്ഥാപനത്തിലുണ്ടായ തീപിടിത്തത്തെക്കുറിച്ചും ഒന്റാറിയോ പ്രവിശ്യാ പൊലീസ് അന്വേഷിക്കുന്നുണ്ട്. ഈ മൂന്ന് സംഭവങ്ങളും തമ്മിൽ പരസ്പരം ബന്ധമുണ്ടെന്നാണ് പൊലീസിന്റെ നിഗമനം. നിലവിൽ പൊതുജനങ്ങൾക്ക് മറ്റ് സുരക്ഷാ ഭീഷണികളൊന്നുമില്ലെന്ന് ഒട്ടാവ പൊലീസ് അറിയിച്ചു. സംഭവസ്ഥലങ്ങൾ പൂർണ്ണമായും പൊലീസിന്റെ നിയന്ത്രണത്തിലാണ്.

കാനഡയിലെ പ്രവാസി മലയാളി കുടുംബങ്ങൾ ഉൾപ്പെടെയുള്ളവർ താമസിക്കുന്ന ഫിൻഡ്‌ലി ക്രീക്ക് പ്രദേശത്തുണ്ടായ ഈ ദാരുണ സംഭവം പ്രാദേശിക സമൂഹത്തെയാകെ വലിയ ഞെട്ടലിലാഴ്ത്തിയിട്ടുണ്ട്. കൗൺസിലർ സ്റ്റീവ് ഡെസ്റോച്ചസ് ഉൾപ്പെടെയുള്ള പ്രമുഖർ സംഭവത്തിൽ അനുശോചനം രേഖപ്പെടുത്തി.

അങ്ങേയറ്റം സങ്കീർണ്ണമായ ഈ കേസിൽ അന്വേഷണം പുരോഗമിക്കുകയാണെന്ന് ഒട്ടാവ പൊലീസ് ഹോമിസൈഡ് വിഭാഗം വ്യക്തമാക്കി. സംഭവത്തെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ ഒട്ടാവ പൊലീസ് ഹോമിസൈഡ് യൂണിറ്റുമായി (613-236-1222, ext. 5943) ബന്ധപ്പെടണമെന്ന് അധികൃതർ അഭ്യർത്ഥിച്ചിട്ടുണ്ട്.

മാനസിക ബുദ്ധിമുട്ടുകൾ അനുഭവിക്കുന്നവർക്കായി കാനഡയിലെ സഹായ കേന്ദ്രങ്ങൾ:

കാനഡ സൂയിസൈഡ് ക്രൈസിസ് ഹെൽപ്പ് ലൈൻ: 988 (വിളിക്കുകയോ സന്ദേശമയക്കുകയോ ചെയ്യാം)
ക്രൈസിസ് സർവീസസ് കാനഡ: 1-833-456-4566
കിഡ്‌സ് ഹെൽപ്പ് ഫോൺ: 1-800-668-6868
അടിയന്തര സഹായങ്ങൾക്ക് 911 എന്ന നമ്പറിലോ തൊട്ടടുത്തുള്ള ആശുപത്രിയിലോ ബന്ധപ്പെടുക.

2-children-found-dead-in-ottawa-home-in-murder-suicide

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt