ഒട്ടാവ: ആർട്ടിഫിഷ്യൽ ഇന്റലിജൻസ് അഥവാ എഐയുടെ സഹായത്തോടെ തയ്യാറാക്കുന്ന വ്യാജ നിയമരേഖകൾ കാനഡയിലെ കോടതികളിൽ വർദ്ധിച്ചുവരുന്നതായി റിപ്പോർട്ട്. അഭിഭാഷകർക്കും സ്വയം വാദിക്കുന്നവർക്കും ഒരുപോലെ വിനയാകുന്ന ഈ പ്രവണത വലിയ ആശങ്കയാണ് ഉയർത്തുന്നത്. ഒറ്റനോട്ടത്തിൽ യഥാർത്ഥമെന്ന് തോന്നുന്ന വിധത്തിൽ എഐ നിർമ്മിക്കുന്ന കൃത്രിമമായ കേസ് വിവരങ്ങളും ഉദ്ധരണികളും കോടതിയിൽ സമർപ്പിക്കുന്നത് ഇപ്പോൾ പതിവാകുകയാണ്. അടുത്തിടെ ഇത്തരത്തിൽ വ്യാജ പരാമർശങ്ങൾ സമർപ്പിച്ചതിന് ഒരു അഭിഭാഷകന് 31,150 ഡോളർ പിഴ ചുമത്തിയിരുന്നു. ഇത്തരം കേസുകളിൽ കാനഡയിൽ നൽകുന്ന ഏറ്റവും വലിയ പിഴയാണിത്.
കോർട്ട് റെഡി എന്ന സംഘടനയുടെ കണക്കുപ്രകാരം, 2024-ൽ ഏഴ് കേസുകൾ മാത്രമായിരുന്നെങ്കിൽ 2025-ൽ ഇത് 87 ആയി ഉയർന്നു. 2026-ന്റെ ആദ്യ പകുതിയിൽ മാത്രം 74 കേസുകളാണ് റിപ്പോർട്ട് ചെയ്യപ്പെട്ടത്. കോടതി നടപടികൾ വൈകിപ്പിക്കുന്നതിനും നീതിനിർവ്വഹണത്തെ തെറ്റായ രീതിയിൽ സ്വാധീനിക്കുന്നതിനും ഈ എഐ നിർമ്മിത തെറ്റായ വിവരങ്ങൾ കാരണമാകുന്നുണ്ട്. എഐ നിയമമേഖലയിൽ വലിയ മാറ്റങ്ങൾ കൊണ്ടുവരുമെങ്കിലും, കൃത്യത ഉറപ്പാക്കാനുള്ള ഉത്തരവാദിത്തം മനുഷ്യർക്കാണെന്ന് പ്രമുഖ അഭിഭാഷകൻ നൈനേഷ് കോടക് ഓർമ്മിപ്പിക്കുന്നു.
എഐയെ സഹായിയായി ഉപയോഗിക്കാം, എന്നാൽ അത് സമർപ്പിക്കുന്ന രേഖകൾ പരിശോധിക്കാതെ കോടതിയിൽ നൽകുന്നത് ഗുരുതരമായ കൃത്യവിലോപമാണെന്ന് അദ്ദേഹം വ്യക്തമാക്കി. കോടതികളിൽ സമർപ്പിക്കുന്ന എല്ലാ രേഖകളും എഐ സഹായത്തോടെയാണോ തയ്യാറാക്കിയതെന്ന് വെളിപ്പെടുത്തണമെന്നും, അഭിഭാഷകർ ഓരോ രേഖയും നേരിട്ട് പരിശോധിച്ച് സാക്ഷ്യപ്പെടുത്തണമെന്നും വിദഗ്ദ്ധർ ആവശ്യപ്പെടുന്നു. സാങ്കേതികവിദ്യയെ ഉത്തരവാദിത്തത്തോടെ ഉപയോഗിക്കണമെന്ന വലിയ പാഠമാണ് ഈ സംഭവങ്ങൾ നൽകുന്നത്.
AI-fabricated legal citations in Canadian courts ‘tip of the iceberg,’ expert warns
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
