റായ്പൂർ: ഛത്തീസ്ഗഢിലെ ബലോഡബസാർ ജില്ലയിൽ നാല് മാസത്തിനിടെ എട്ട് പേരെ വിഷം നൽകി കൊലപ്പെടുത്തിയ സംഭവത്തിൽ കടയുടമ പിടിയിൽ. ഖർവെ ഗ്രാമത്തിൽ ചായക്കട നടത്തുന്ന രാം സഹായ് ജയ്സ്വാൾ (46) എന്നയാളാണ് പിടിയിലായത്. ഈ വർഷം ഫെബ്രുവരി മുതൽ മെയ് വരെയുള്ള കാലയളവിലാണ് ഇയാൾ തുടർച്ചയായ കൊലപാതകങ്ങൾ നടത്തിയത്. മദ്യത്തിൽ ബോറാക്സ് പൗഡർ (ഒരു തരം രാസവസ്തു) കലർത്തി നൽകിയാണ് ഇരകളെ കൊലപ്പെടുത്തിയതെന്ന് പോലീസ് അറിയിച്ചു.
തുടർച്ചയായുണ്ടായ മരണങ്ങളിൽ സംശയം തോന്നിയ ബന്ധുക്കളും നാട്ടുകാരും ഈ മാസം ആദ്യം പോലീസിൽ പരാതി നൽകിയതോടെയാണ് ക്രൂരമായ കൊലപാതകങ്ങളുടെ ചുരുളഴിഞ്ഞത്. അതുവരെ പല മരണങ്ങളും അസുഖം മൂലമുള്ള സ്വാഭാവിക മരണങ്ങളായാണ് നാട്ടുകാർ കരുതിയിരുന്നത്. എന്നാൽ മരണപ്പെട്ടവരെല്ലാം അവസാനമായി രാം സഹായുടെ കടയിൽ എത്തിയിരുന്നു എന്ന കണ്ടെത്തലാണ് പ്രതിയിലേക്ക് അന്വേഷണം എത്തിച്ചത്.
തുടർന്ന് പോലീസ് നടത്തിയ വിശദമായ അന്വേഷണത്തിൽ, മെയ് 14-ന് മരിച്ച മഹേതരു സാഹു എന്നയാളുടെ മൃതദേഹം ജൂൺ 13-ന് പുറത്തെടുത്ത് പരിശോധിച്ചു. ഇതിൽ വിഷാംശം കണ്ടെത്തിയതിനെ തുടർന്ന് മറ്റ് ആറ് പേരുടെ മൃതദേഹങ്ങൾ കൂടി പുറത്തെടുത്ത് റായ്പൂരിലെ മെഡിക്കൽ കോളേജിൽ പോസ്റ്റ്മോർട്ടത്തിന് അയക്കുകയായിരുന്നു. ഒരു ഇരയുടെ മൃതദേഹം നേരത്തെ സംസ്കരിച്ചതിനാൽ പോസ്റ്റ്മോർട്ടം ചെയ്യാനായില്ല.
എലികളെ കൊല്ലാനാണെന്ന് പറഞ്ഞാണ് പ്രതി ഒരു ഗ്രാമവാസിയിൽ നിന്ന് ബോറാക്സ് പൗഡർ വാങ്ങിയത്. ഈ വിഷം ആദ്യം ഒരു നായയിൽ പരീക്ഷിച്ച് മരണം ഉറപ്പാക്കിയ ശേഷമാണ് ഇയാൾ മനുഷ്യരിൽ പ്രയോഗിച്ചത്. മുൻവൈരാഗ്യം, ചെറിയ തർക്കങ്ങൾ, അന്ധവിശ്വാസം എന്നിവയാണ് കൊലപാതകങ്ങൾക്ക് കാരണമായി പോലീസ് പറയുന്നത്. തനിക്കെതിരെ സംശയം വരാതിരിക്കാൻ ഇരകളെ ആശുപത്രിയിലെത്തിക്കാൻ സഹായിക്കുകയും ശവസംസ്കാര ചടങ്ങുകളിൽ പങ്കെടുക്കുകയും ചെയ്ത് പ്രതി അതീവ ജാഗ്രത പുലർത്തിയിരുന്നു.
ചോദ്യം ചെയ്യലിന്റെ ആദ്യഘട്ടത്തിൽ കുറ്റം നിഷേധിച്ച പ്രതി, ശാസ്ത്രീയ തെളിവുകളുടെ അടിസ്ഥാനത്തിൽ നടത്തിയ ചോദ്യം ചെയ്യലിൽ ഒടുവിൽ കുറ്റം സമ്മതിക്കുകയായിരുന്നു. പ്രതിക്കെതിരെ നിലവിൽ എട്ട് കൊലപാതകക്കേസുകളും ഒരു വധശ്രമക്കേസും പോലീസ് രജിസ്റ്റർ ചെയ്തിട്ടുണ്ട്. കോടതിയിൽ ഹാജരാക്കിയ പ്രതിയെ കൂടുതൽ അന്വേഷണത്തിനായി റിമാൻഡ് ചെയ്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Trial on dogs, use on humans; Killer who terrorized Chhattisgarh finally caught
