ന്യൂയോർക്ക്∙ അമേരിക്കയിലെ പ്രശസ്തമായ സെൻട്രൽ പാർക്കിൽ വിനോദസഞ്ചാരത്തിനെത്തിയ ഇന്ത്യൻ കുടുംബം സഞ്ചരിച്ച കുതിരവണ്ടി അപകടത്തിൽപ്പെട്ട് കൗമാരക്കാരൻ മരിച്ചു. 18കാരനായ രോമാഞ്ച് മഹാജൻ ആണ് മരിച്ചത്. നിയന്ത്രണംവിട്ടു പാഞ്ഞ കുതിരവണ്ടിയിൽനിന്ന് റോഡിലേക്ക് തെറിച്ചുവീണ അമ്മയെ രക്ഷിക്കാൻ ശ്രമിക്കുന്നതിനിടെയാണ് രോമാഞ്ച് അപകടത്തിൽപ്പെട്ടത്.
ബുധനാഴ്ച ഉച്ചയ്ക്ക് മൂന്ന് മണിയോടെയായിരുന്നു സംഭവം. മാതാപിതാക്കൾക്കും ഇളയ സഹോദരനുമൊപ്പം ആദ്യമായി ന്യൂയോർക്ക് സന്ദർശിക്കാനെത്തിയതായിരുന്നു രോമാഞ്ച്. പാർക്കിൽ വച്ച് കുടുംബചിത്രം പകർത്താൻ കുതിരവണ്ടി നിർത്തി ഡ്രൈവർ പുറത്തിറങ്ങിയ സമയത്താണ് ‘സാംസൺ’ എന്ന പേരുള്ള കുതിര അപ്രതീക്ഷിതമായി ഭയന്നോടിയത്. കുതിരയെ നിയന്ത്രിക്കാൻ ഡ്രൈവർ പിന്നാലെ ഓടിയെങ്കിലും സാധിച്ചില്ല.
നിയന്ത്രണംവിട്ട വണ്ടിയിൽനിന്ന് രോമാഞ്ചിന്റെ അമ്മ പ്രിയാ മഹാജൻ റോഡിലേക്ക് തെറിച്ചുവീണു. അമ്മയെ രക്ഷപ്പെടുത്തുക എന്ന ലക്ഷ്യത്തോടെ രോമാഞ്ച് വണ്ടിയിൽനിന്ന് താഴേക്ക് ചാടുകയായിരുന്നു. ഈ വീഴ്ചയിൽ തലയ്ക്ക് ഗുരുതരമായി പരിക്കേറ്റ രോമാഞ്ചിനെ ഉടൻ തന്നെ ന്യൂയോർക്ക്-പ്രെസ്ബിറ്റീരിയൻ വെയ്ൽ കോർണൽ മെഡിക്കൽ സെന്ററിൽ എത്തിച്ചെങ്കിലും രാത്രിയോടെ മരണം സംഭവിച്ചു.
പിന്നീട് നിയന്ത്രണംവിട്ട വണ്ടി മറ്റൊരു കുതിരവണ്ടിയുമായി കൂട്ടിയിടിച്ച് പൂർണമായും തകർന്നു. അപകടത്തിൽ രോമാഞ്ചിന്റെ പിതാവ് ദീപക് മഹാജനും ഇളയ സഹോദരനും നിസ്സാര പരിക്കുകളോടെ അത്ഭുതകരമായി രക്ഷപ്പെട്ടു. സുരക്ഷാ മാനദണ്ഡങ്ങൾ ലംഘിച്ച് കുതിരയെ സുരക്ഷിതമാക്കാതെ ഫോട്ടോ എടുക്കാൻ പോയ ഡ്രൈവറെ അധികൃതർ അന്വേഷണവിധേയമായി സസ്പെൻഡ് ചെയ്തു. അപകടമുണ്ടാക്കിയ കുതിരയെ നിലവിൽ സർവീസിൽനിന്ന് മാറ്റി നിർത്തിയിരിക്കുകയാണ്. കഴിഞ്ഞ ഒരു വർഷത്തിനിടെ സെൻട്രൽ പാർക്കിൽ നടക്കുന്ന എട്ടാമത്തെ കുതിരവണ്ടി അപകടമാണിത്. ഇതിനെത്തുടർന്ന് നഗരത്തിൽ കുതിരവണ്ടികൾ പൂർണമായി നിരോധിക്കണമെന്ന ആവശ്യം വീണ്ടും ശക്തമായിരിക്കുകയാണ്.
An Indian teen tragically died in Central Park, New York
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
