ന്യൂഡൽഹി: ഇന്ത്യയും ബ്രിട്ടനും തമ്മിലുള്ള ചരിത്രപരമായ സ്വതന്ത്ര വ്യാപാര കരാർ (എഫ്.ടി.എ) വരും മാസത്തിൽ ജൂലൈ 15 മുതൽ പ്രാബല്യത്തിൽ വരും. ലണ്ടനിലെ സ്റ്റീൽ താരിഫ് വ്യവസ്ഥകളുമായി ബന്ധപ്പെട്ട് ഇരുരാജ്യങ്ങളും തമ്മിലുണ്ടായിരുന്ന തർക്കങ്ങൾ പരിഹരിച്ചതിനെത്തുടർന്നാണ് ദീർഘകാലമായി കാത്തിരുന്ന കരാർ യാഥാർത്ഥ്യമാകുന്നതെന്ന് യുകെ സർക്കാർ ഔദ്യോഗികമായി അറിയിച്ചു. ബ്രെക്സിറ്റിന് ശേഷം യുകെ ഒപ്പുവെക്കുന്ന ഏറ്റവും വലിയ ഉഭയകക്ഷി വ്യാപാര കരാറാണിത്. ഇന്ത്യ ഇതുവരെ ഒപ്പുവെച്ചിട്ടുള്ളതിൽ വെച്ച് ഏറ്റവും സമഗ്രമായ വ്യാപാര വ്യവസ്ഥകൾ ഉൾക്കൊള്ളുന്നതാണ് ഈ പുതിയ കരാർ.
പുതിയ നികുതി ഇളവുകൾ നിലവിൽ വരുന്നതോടെ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരത്തിലും വിപണിയിലും വലിയ മാറ്റങ്ങൾ ഉണ്ടാകും. ബ്രിട്ടനിൽ നിന്ന് ഇന്ത്യയിലേക്ക് ഇറക്കുമതി ചെയ്യുന്ന പ്രശസ്തമായ സ്കോച്ച് വിസ്കിയുടെ നികുതി 150 ശതമാനത്തിൽ നിന്നും 40 ശതമാനമായി കുറയും. യുകെ നിർമ്മിത കാറുകളുടെ നികുതി 100 ശതമാനത്തിൽ നിന്നും പത്ത് ശതമാനമായാണ് കുറയുന്നത്. കൂടാതെ സൗന്ദര്യവർദ്ധക വസ്തുക്കൾക്ക് ചുമത്തിയിരുന്ന 22 ശതമാനം വരെയുള്ള നികുതികൾ പൂർണ്ണമായും ഒഴിവാക്കാനും കരാറിൽ വ്യവസ്ഥയുണ്ട്. ഈ പരിഷ്കാരത്തിലൂടെ ദീർഘകാലാടിസ്ഥാനത്തിൽ യുകെയുടെ ജിഡിപിയിൽ 4.8 ബില്യൺ പൗണ്ടിന്റെയും ഇരുരാജ്യങ്ങളും തമ്മിലുള്ള വ്യാപാരത്തിൽ 25.5 ബില്യൺ പൗണ്ടിന്റെയും വർദ്ധനവ് ഉണ്ടാകുമെന്നാണ് കണക്കാക്കുന്നത്.
അതേസമയം, ഇന്ത്യയിൽ നിന്നുള്ള 99 ശതമാനം ഉൽപ്പന്നങ്ങൾക്കും യാതൊരുവിധ നികുതിയും കൂടാതെ യുകെ വിപണിയിൽ പ്രവേശിക്കാൻ സാധിക്കുമെന്നത് രാജ്യത്തിന് വലിയ നേട്ടമാകും. പ്രധാനമായും ഇന്ത്യയിലെ വസ്ത്രങ്ങൾ, പാദരക്ഷകൾ, കാർഷിക ഉൽപ്പന്നങ്ങൾ, ടെക്സ്റ്റൈൽസ് തുടങ്ങിയ മേഖലകളിലെ കയറ്റുമതിക്കാർക്ക് പുതിയ കരാർ വലിയ വിപണി സാധ്യതകളാണ് തുറന്നുനൽകുന്നത്. വ്യാപാര പങ്കാളികൾക്ക് നിലവിലെ നികുതി വ്യവസ്ഥകളിൽ നിന്നും പുതിയ രീതിയിലേക്ക് മാറുന്നതിനായി 28 ദിവസത്തെ സമയം അനുവദിച്ചിട്ടുണ്ട്. ജൂലൈ 15 മുതൽ പുതിയ താരിഫ് നിരക്കുകൾ വിപണിയിൽ പൂർണ്ണമായി നിലവിൽ വരും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
The long wait is over; India-UK Free Trade Agreement comes into effect from July 15
