ബ്രസൽസ്: ചെടികളിൽ നിന്നും ധാന്യങ്ങളിൽ നിന്നും ഉണ്ടാക്കുന്ന സസ്യാഹാരങ്ങൾക്ക് (Plant-based foods) ‘സ്റ്റേക്ക്’, ‘ബേക്കൺ’, ‘ചിക്കൻ’ തുടങ്ങിയ ഇറച്ചികളുടെപ്പേരുകൾ നൽകുന്നത് നിരോധിക്കാൻ യൂറോപ്യൻ യൂണിയൻ പാർലമെന്റ് തീരുമാനിച്ചു. ഇത്തരം പേരുകൾ കണ്ട് ഉപഭോക്താക്കൾക്ക് മാറിപ്പോകാതിരിക്കാനും കന്നുകാലി വളർത്തൽ മേഖലയെ സംരക്ഷിക്കാനും വേണ്ടിയാണ് ഈ പുതിയ മാറ്റം. ഫ്രാൻസിൽ നിന്നുള്ള പാർലമെന്റ് അംഗം സെലിൻ ഇമാർട്ട് കൊണ്ടുവന്ന ഈ നിർദേശത്തിന് യൂറോപ്യൻ യൂണിയൻ രാജ്യങ്ങളുടെ അന്തിമ അനുമതി കൂടി ലഭിച്ചാൽ നിയമം പൂർണ്ണമായി നിലവിൽ വരും. അതേസമയം, ആളുകൾ സാധാരണ ഉപയോഗിക്കുന്ന ‘വെജി ബർഗർ’, ‘വെജി സോസേജ്’ എന്നീ പേരുകൾക്ക് ഇപ്പോൾ വിലക്കില്ല.
പുതിയ നിയമം അനുസരിച്ച് യഥാർത്ഥ മൃഗങ്ങളുടെ ഇറച്ചിയെ മാത്രമേ ‘മാംസം’ എന്ന് വിളിക്കാൻ പാടുള്ളൂ. അതുകൊണ്ട് ഇനി മുതൽ സസ്യ ഉൽപ്പന്നങ്ങളുടെ പാക്കറ്റുകളിൽ ‘മീറ്റ്’, ‘ചിക്കൻ’, ‘പോർക്ക്’ തുടങ്ങിയ വാക്കുകൾ ഉപയോഗിക്കാൻ കഴിയില്ല. എന്നാൽ ബർഗർ, സോസേജ് എന്നീ പൊതുവായ പേരുകൾക്ക് മുൻപ് തന്നെ ഇളവ് നൽകിയതുകൊണ്ട് ‘പ്ലാന്റ്-ബേസ്ഡ് സോസേജ്’ പോലുള്ളവയ്ക്ക് വിപണിയിൽ തടസ്സമുണ്ടാകില്ല. ഈ തീരുമാനത്തെ കർഷകർ വലിയ വിജയമായി കാണുമ്പോൾ, പരിസ്ഥിതി പ്രവർത്തകരും യൂറോപ്പിലെ വലിയ സസ്യഭക്ഷണ മാർക്കറ്റായ ജർമ്മനിയിലെ വ്യാപാരികളും ഇതിനെ എതിർക്കുന്നുണ്ട്. പ്രശസ്ത സംഗീതജ്ഞൻ പോൾ മക്കാർട്ട്നി ഉൾപ്പെടെയുള്ള പ്രമുഖരും സസ്യ ഉൽപ്പന്നങ്ങളെ പിന്തുണച്ച് രംഗത്തെത്തിയിരുന്നു.
ആരോഗ്യകാര്യങ്ങളും പരിസ്ഥിതി സംരക്ഷണവും മുൻനിർത്തി 2011-ന് ശേഷം യൂറോപ്പിൽ സസ്യഭക്ഷണങ്ങളുടെ ഉപയോഗം അഞ്ചിരട്ടിയായി വർധിച്ചിട്ടുണ്ടെന്നാണ് കണക്കുകൾ. അതുകൊണ്ട് തന്നെ പേരിനെച്ചൊല്ലിയുള്ള ഈ തർക്കങ്ങൾ ഇതോടെ തീരുന്നില്ല. പുതിയ നിയമം താല്ക്കാലികമായി അടുത്ത വർഷം അവസാനം വരെ മാത്രമായിരിക്കും നടപ്പിലാക്കുക. അതിനുശേഷം യൂറോപ്യൻ യൂണിയന്റെ പ്രധാന കാർഷിക സബ്സിഡി പദ്ധതിയായ ‘സി.എ.പി’ (CAP)-യുടെ യോഗത്തിൽ ഈ വിഷയം വീണ്ടും ചർച്ച ചെയ്ത് അന്തിമ തീരുമാനമെടുക്കുമെന്നാണ് അധികൃതർ അറിയിച്ചിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
European Union bans names like 'steak' and 'chicken' on vegetarian packages; new law
