ടൊറന്റോ: ആഗോള ഫുട്ബോൾ മാമാങ്കത്തിന് കാനഡയിൽ പന്തുരുണ്ടതോടെ ടൊറന്റോ നഗരം പൂർണ്ണമായും ലോകകപ്പ് ആവേശത്തിലേക്ക് വഴിമാറി. ചരിത്രത്തിലാദ്യമായി ടൊറന്റോ ആതിഥേയത്വം വഹിക്കുന്ന പുരുഷ ലോകകപ്പ് മത്സരങ്ങൾ നേരിൽ കാണാൻ ലോകത്തിന്റെ വിവിധ കോണുകളിൽ നിന്നായി പതിനായിരക്കണക്കിന് ആരാധകരാണ് നഗരത്തിലേക്ക് ഒഴുകിയെത്തുന്നത്. ഇതോടെ ഡൗൺടൗൺ മേഖലയിലെ ഫാൻ സോണുകളും പബ്ബുകളും റസ്റ്റോറന്റുകളും ജനസാഗരമായി മാറി. കാനഡയ്ക്കും ടൊറന്റോയ്ക്കും വലിയ സാമ്പത്തിക നേട്ടമുണ്ടാക്കുമെന്ന പ്രഖ്യാപനത്തോടെയെത്തിയ ലോകകപ്പ്, പ്രാദേശിക ബിസിനസുകൾക്ക് എത്രത്തോളം ഗുണം ചെയ്യുമെന്നതിന്റെ ആദ്യചിത്രങ്ങളാണ് ഇപ്പോൾ പുറത്തുവരുന്നത്.
നഗരത്തിലെമ്പാടും വൻ ജനത്തിരക്ക് ദൃശ്യമാണെങ്കിലും, ടൊറന്റോയിലെ ഹോട്ടൽ മേഖലയിൽ പ്രതീക്ഷിച്ചത്ര വലിയ കുതിച്ചുചാട്ടം ഇതുവരെ പ്രകടമായിട്ടില്ലെന്നാണ് റിപ്പോർട്ടുകൾ. ജൂൺ മാസത്തിലെ ഹോട്ടൽ മുറികളുടെ ബുക്കിംഗിൽ വലിയ രീതിയിലുള്ള കുറവ് നേരിടുന്നതായി ഗ്രേറ്റർ ടൊറന്റോ ഹോട്ടൽ അസോസിയേഷൻ (GTHA) പ്രസിഡന്റും സിഇഒയുമായ സാറ ആംഗൽ വ്യക്തമാക്കി.
നിലവിലെ കണക്കനുസരിച്ച് ഈ മാസത്തെ ഹോട്ടൽ ബുക്കിംഗ് നിരക്ക് 65 ശതമാനത്തിനടുത്താണ്. ഇത് കഴിഞ്ഞ വർഷം ജൂണിൽ ലഭിച്ചതിനേക്കാൾ കുറവാണെന്നത് ശ്രദ്ധേയമാണ്. വാസ്തവത്തിൽ, ലോകകപ്പ് മത്സരങ്ങൾ ഇല്ലാത്ത സാധാരണ ജൂൺ മാസങ്ങളിൽ ടൊറന്റോയിൽ വിനോദസഞ്ചാരികളുടെ വലിയ തിരക്ക് അനുഭവപ്പെടാറുള്ളതാണ്. എന്നാൽ ലോകകപ്പ് വന്നതോടെ തിരക്ക് ഭയന്ന് സ്ഥിരം സഞ്ചാരികളിൽ പലരും ഇത്തവണ നഗരത്തിൽ നിന്നും മാറിനിന്നതാണ് ഈ കുറവിന് കാരണം.
കൂടാതെ, മത്സരത്തീയതികൾക്ക് തൊട്ടുമുമ്പ് ഫിഫ കൂടുതൽ ടിക്കറ്റുകൾ പുറത്തുവിട്ടതോടെ, മുൻകൂട്ടി റിസർവ് ചെയ്തിരുന്ന ചില ഹോട്ടൽ മുറികൾ റദ്ദാക്കപ്പെടുകയും ചെയ്തു. ജൂൺ 12 മുതൽ ജൂലൈ 2 വരെയുള്ള കാലയളവിൽ അഞ്ച് ഗ്രൂപ്പ് ഘട്ട മത്സരങ്ങളും ഒരു നോക്കൗട്ട് മത്സരവുമുൾപ്പെടെ ആറ് മത്സരങ്ങൾക്കാണ് ടൊറന്റോ വേദിയാകുന്നത്. ജൂണിൽ നേരിയ കുറവുണ്ടായാലും ജൂലൈ, ആഗസ്റ്റ് മാസങ്ങളിൽ വലിയ ബിസിനസ്സ് നടക്കുമെന്ന പ്രതീക്ഷയിലാണ് ഹോട്ടൽ ഉടമകൾ. അതേസമയം, നഗരത്തിലെ റസ്റ്റോറന്റുകൾക്കും കഫേകൾക്കും ലോകകപ്പ് വലിയ രീതിയിൽ തുണയാകുന്നുണ്ട്. മത്സരങ്ങൾ തുടങ്ങുന്നതിന് മണിക്കൂറുകൾക്ക് മുമ്പ് തന്നെ കഫേകൾക്ക് മുന്നിൽ നീണ്ട ക്യൂ പ്രത്യക്ഷപ്പെടുന്നുണ്ടെന്ന് പ്രാദേശിക വ്യവസായികൾ പറയുന്നു.
കൺവെൻഷൻ സെന്റർ മുതൽ ഫ്രണ്ട് സ്ട്രീറ്റ് വരെയുള്ള തെരുവുകളിലെയും പ്രമുഖ ഹോട്ടൽ ലോബികളിലെയും റസ്റ്റോറന്റുകൾ കളിദിവസങ്ങളിൽ ജനങ്ങളാൽ നിറയുകയാണ്. ലോകകപ്പ് ടൊറന്റോയെ ആഗോള ശ്രദ്ധാകേന്ദ്രമാക്കി മാറ്റിയെന്നും ലോകം മുഴുവൻ ഇപ്പോൾ നഗരത്തിലേക്ക് ഉറ്റുനോക്കുകയാണെന്നും മേയർ ഒലിവിയ ചൗ പ്രതികരിച്ചു. സംഘാടകരും സർക്കാരും വാഗ്ദാനം ചെയ്ത സാമ്പത്തിക നേട്ടം പൂർണ്ണമായി ലഭിക്കുമോ എന്ന് അറിയാൻ ടൂർണമെന്റിന്റെ അവസാന വിസിൽ മുഴങ്ങുന്നത് വരെ കാത്തിരിക്കേണ്ടി വരും.
Fans flock to Toronto; Will the economic benefits promised by the World Cup come true?
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
