ഒന്റാറിയോ: ഒന്റാറിയോയിലെ മാപ്പിൾടൺ ടൗൺഷിപ്പിൽ വാനും സ്പോർട് യൂട്ടിലിറ്റി വെഹിക്കിളും (SUV) കൂട്ടിയിടിച്ചുണ്ടായ അപകടത്തിൽ അഞ്ച് കുട്ടികൾ കൊല്ലപ്പെട്ടു. വെള്ളിയാഴ്ച രാത്രി 7:30-ഓടെ ഫോർത്ത് ലൈൻ, വെല്ലിംഗ്ടൺ റോഡ് 12-ൽ ആയിരുന്നു അപകടം. വാനിലുണ്ടായിരുന്ന പത്ത് പേരും എസ്യുവി ഡ്രൈവറും ഉൾപ്പെടെ 11 പേരാണ് അപകടത്തിൽപ്പെട്ടതെന്ന് ഒന്റാറിയോ പ്രൊവിൻഷ്യൽ പോലീസ് (OPP) വെസ്റ്റ് റീജിയൺ കമാൻഡർ ഡ്വൈറ്റ് തിബ് വാർത്താ സമ്മേളനത്തിൽ അറിയിച്ചു.
അപകടത്തിൽ മരിച്ചവരിൽ നാല് പെൺകുട്ടികളും ഒരു ആൺകുട്ടിയുമാണുള്ളത്. നാല്, ആറ്, എട്ട്, പത്ത്, പന്ത്രണ്ട് വയസ് പ്രായമുള്ള ഈ കുട്ടികൾ ബന്ധുക്കളാണെന്ന് പോലീസ് സ്ഥിരീകരിച്ചു. അപകടത്തിൽപ്പെട്ട കുടുംബം എൽമിറ സ്വദേശികളാണ്. വാനിലുണ്ടായിരുന്ന നാല് മുതിർന്നവർക്കും ഒരു കുട്ടിക്കും പുറമെ എസ്യുവി ഡ്രൈവർക്കും ഗുരുതരമായി പരിക്കേറ്റിട്ടുണ്ട്. പരിക്കേറ്റവരെ വിവിധ ട്രോമ സെന്ററുകളിലും പ്രാദേശിക ആശുപത്രികളിലും പ്രവേശിപ്പിച്ചു.
ഒപ്പീ ട്രാഫിക് ഇൻസിഡന്റ് മാനേജ്മെന്റ് എൻഫോഴ്സ്മെന്റ് ടീം സംഭവസ്ഥലത്തെത്തി അന്വേഷണം ആരംഭിച്ചു. അപകടത്തെത്തുടർന്ന് റോഡ് അടച്ചിടുകയും ഗതാഗതം വഴിതിരിച്ചുവിടുകയും ചെയ്തു. സംഭവത്തിൽ അനുശോചനം രേഖപ്പെടുത്തിയ ഒന്റാറിയോ പ്രീമിയർ ഡഗ് ഫോർഡ്, ഇതൊരു ഹൃദയഭേദകമായ നഷ്ടമാണെന്ന് സോഷ്യൽ മീഡിയയിൽ കുറിച്ചു. അന്വേഷണം പുരോഗമിക്കുന്നതിനാൽ കൂടുതൽ വിവരങ്ങൾ പുറത്തുവിടാൻ പോലീസ് തയ്യാറായിട്ടില്ല.
Car accident in Ontario: Five children tragically die, six seriously injured
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
