ഒട്ടാവ: കാനഡയിലെ അറ്റ്ലാന്റിക് പ്രവിശ്യകളിൽ സ്ഥിരതാമസം (PR) ആഗ്രഹിക്കുന്ന ഉദ്യോഗാർത്ഥികൾക്ക് വലിയ ആശ്വാസം പകർന്ന് അറ്റ്ലാന്റിക് ഇമിഗ്രേഷൻ പ്രോഗ്രാം (AIP) പ്രൊസസിങ് സമയത്തിൽ വൻ കുറവ്. പുതിയ അപേക്ഷകളിൽ തീരുമാനമെടുക്കാനുള്ള കാത്തിരിപ്പ് കാലാവധിയിൽ ഒരു വർഷത്തിന്റെ കുറവാണ് ഇമിഗ്രേഷൻ വകുപ്പ് വരുത്തിയിരിക്കുന്നത്. ജൂൺ എട്ടിലെ ഏറ്റവും പുതിയ കണക്കുകൾ പ്രകാരം പ്രൊസസിങ് സമയം 26 മാസമായി കുറഞ്ഞു. തൊട്ടുമുമ്പത്തെ മാസമായ മേയിൽ ഇത് 38 മാസമായിരുന്നു.
2025 ഒക്ടോബറിന് ശേഷം ഇമിഗ്രേഷൻ വകുപ്പ് പുറത്തുവിടുന്ന ഏറ്റവും കുറഞ്ഞ പ്രൊസസിങ് സമയമാണിത്. കഴിഞ്ഞ വർഷം സെപ്റ്റംബറിൽ 13 മാസമായിരുന്ന കാത്തിരിപ്പ് കാലാവധി ഒറ്റയടിക്ക് 37 മാസമായി ഉയരുകയായിരുന്നു. 184.6 ശതമാനത്തിന്റെ വർദ്ധനവാണ് അന്ന് രേഖപ്പെടുത്തിയത്. അതിനുശേഷം ഇപ്പോഴാണ് അപേക്ഷകർക്ക് ആശ്വാസകരമായ രീതിയിൽ പ്രൊസസിങ് സമയം താഴേക്ക് വരുന്നത്. എന്നാൽ ഇമിഗ്രേഷൻ വകുപ്പിന്റെ ഔദ്യോഗിക സർവീസ് സ്റ്റാൻഡേർഡ് ആയ 11 മാസ പരിധിയിലേക്ക് എത്താൻ ഇനിയും സമയമെടുക്കും.
കഴിഞ്ഞ മാസങ്ങളിലെ പ്രൊസസിങ് സമയം (മാസങ്ങളിൽ)
സെപ്റ്റംബർ 2025: 13 മാസം
ഒക്ടോബർ 2025: 37 മാസം
നവംബർ – ഡിസംബർ 2025: 37 മാസം
ജനുവരി – മാർച്ച് 2026: 33 മാസം
ഏപ്രിൽ 2026: 40 മാസം
മേയ് 2026: 38 മാസം
ജൂൺ 2026: 26 മാസം
കഴിഞ്ഞ വർഷമുണ്ടായ അപ്രതീക്ഷിത സമയവർദ്ധനവ് കാനഡയ്ക്കുള്ളിൽ നിന്ന് അപേക്ഷിച്ച പലരുടെയും ജോലി ചെയ്യാനുള്ള അനുമതി (Work Authorization) പ്രതിസന്ധിയിലാക്കിയിരുന്നു. എഐപി വഴി അപേക്ഷിക്കുന്നവർക്ക് ലേബർ മാർക്കറ്റ് ഇംപാക്ട് അസസ്മെന്റ് (LMIA) ഇല്ലാതെ തന്നെ പ്രത്യേക വർക്ക് പെർമിറ്റ് ലഭിക്കുമെങ്കിലും, ഇതിന്റെ കാലാവധി പരമാവധി രണ്ട് വർഷമാണ്. മാത്രമല്ല, ഇത് പുതുക്കാനും സാധിക്കില്ല. മറ്റ് പിആർ പ്രോഗ്രാമുകളിലെ അപേക്ഷകർക്ക് ലഭിക്കുന്ന ബ്രിഡ്ജിങ് ഓപ്പൺ വർക്ക് പെർമിറ്റിനും എഐപി അപേക്ഷകർക്ക് അർഹതയില്ലായിരുന്നു.
വർക്ക് പെർമിറ്റ് കാലാവധി രണ്ട് വർഷവും പിആർ പ്രൊസസിങ് സമയം മൂന്ന് വർഷത്തിലധികവുമായി മാറിയതോടെ പലർക്കും ജോലി നഷ്ടമാകുന്ന സാഹചര്യമുണ്ടായി. ഇതിനെത്തുടർന്ന് അറ്റ്ലാന്റിക് പ്രവിശ്യകൾ ഇടപെടുകയും വർക്ക് പെർമിറ്റ് കാലാവധി തീരാറായ അപേക്ഷകർക്ക് സപ്പോർട്ട് ലെറ്ററുകൾ ലഭ്യമാക്കുകയും ചെയ്തു. ഇത് ഉപയോഗിച്ച് ‘സി18 ക്ലോസ്ഡ് വർക്ക് പെർമിറ്റിന്’ അപേക്ഷിക്കാനും പിആർ അപേക്ഷയിൽ തീരുമാനമാകും വരെ കാനഡയിൽ തുടർന്ന് ജോലി ചെയ്യാനും ഇവർക്ക് വഴിതുറന്നു.
തൊഴിലുടമ കേന്ദ്രീകൃതമായ ഒരു കുടിയേറ്റ പദ്ധതിയാണ് അറ്റ്ലാന്റിക് ഇമിഗ്രേഷൻ പ്രോഗ്രാം (AIP). കാനഡയിലെ ന്യൂ ബ്രൺസ്വിക്, ന്യൂഫൗണ്ട്ലാൻഡ് ആൻഡ് ലാബ്രഡോർ, നോവ സ്കോഷ്യാ, പ്രിൻസ് എഡ്വേർഡ് ഐലൻഡ് എന്നീ പ്രവിശ്യകളിലെ അംഗീകൃത തൊഴിലുടമകളിൽ നിന്നുള്ള ജോബ് ഓഫർ ഉള്ളവർക്കാണ് ഈ പദ്ധതി വഴി അപേക്ഷിക്കാനാകുക. ഭാഷാ വൈദഗ്ധ്യം, തൊഴിൽ പരിചയം, വിദ്യാഭ്യാസം, കാനഡയിൽ താമസമാക്കാനാവശ്യമായ ഫണ്ട് എന്നിവയാണ് ഇതിന്റെ മറ്റ് യോഗ്യതകൾ. നിലവിൽ (2026 ജൂൺ 8 വരെയുള്ള കണക്ക് പ്രകാരം) ഇമിഗ്രേഷൻ വകുപ്പിന്റെ പക്കൽ 12,900 എഐപി അപേക്ഷകളാണ് പ്രൊസസിങ്ങിനായി കാത്തിരിക്കുന്നത്.
Canada speeds up Atlantic immigration processing, easing concerns about job losses
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
