വാഷിംഗ്ടൺ: ആഭ്യന്തര നിക്ഷേപങ്ങൾ പ്രോത്സാഹിപ്പിക്കുന്നതിനും സമ്പദ്വ്യവസ്ഥയുടെ പ്രധാന മേഖലകളെ പിന്തുണയ്ക്കുന്നതിനുമായി താരിഫ് (ഇറക്കുമതി നികുതി) നിരക്കുകളിൽ വൻ ഇളവ് പ്രഖ്യാപിച്ച് യുഎസ് പ്രസിഡന്റ് ഡൊണാൾഡ് ട്രംപ്. മിഡിൽ ഈസ്റ്റ് സംഘർഷങ്ങൾക്കിടയിൽ വന്നിട്ടുള്ള ഈ അപ്രതീക്ഷിത പ്രഖ്യാപനം ആഗോള വിപണിയെ ഒന്നടങ്കം ഞെട്ടിച്ചിരിക്കുകയാണ്. തിരഞ്ഞെടുത്ത ചില കാർഷിക ഉൽപ്പന്നങ്ങൾക്കും വ്യാവസായിക ഉപകരണങ്ങൾക്കുമാണ് യുഎസ് താരിഫുകളിൽ കുറവ് വരുത്തിയിട്ടുള്ളത്. ഇതുവരെ ഈ ഉൽപ്പന്നങ്ങൾക്ക് 25 ശതമാനം താരിഫ് ഏർപ്പെടുത്തിയിരുന്ന സ്ഥാനത്ത്, ഇനി മുതൽ അത് 15 ശതമാനമായി കുറയ്ക്കുമെന്നാണ് വൈറ്റ് ഹൗസ് വ്യക്തമാക്കിയത്. ട്രംപ് ഭരണകൂടത്തിന്റെ ഈ താൽക്കാലിക താരിഫ് ഇളവ് 2027 ഡിസംബർ വരെ പ്രാബല്യത്തിലുണ്ടാകും.
ബിസിനസ് മേഖലകളിലെ ചെലവ് കുറയ്ക്കുന്നതിനൊപ്പം ആഭ്യന്തര ഉൽപ്പാദനവും കാർഷിക മേഖലയും ശക്തിപ്പെടുത്തുക എന്നതാണ് ഈ നീക്കത്തിലൂടെ അമേരിക്ക ലക്ഷ്യമിടുന്നത്. കമ്പൈനുകൾ, കൊയ്ത്തുയന്ത്രങ്ങൾ എന്നിവയുൾപ്പെടെയുള്ള കാർഷിക യന്ത്രങ്ങൾക്കും ബുൾഡോസറുകൾ, ഫോർക്ക് ലിഫ്റ്റുകൾ തുടങ്ങിയ വ്യാവസായിക ഉപകരണങ്ങൾക്കും ഈ ഇളവ് ബാധകമാകും. കുറഞ്ഞ താരിഫ് നിരക്കുകൾക്ക് അർഹതയുള്ള യന്ത്രങ്ങളുടെ പട്ടിക ട്രംപ് ഭരണകൂടം വിപുലീകരിച്ചിട്ടുണ്ട്. കുറഞ്ഞ നിരക്കുകൾ കർഷകർക്കും ഉൽപ്പാദകർക്കും കുറഞ്ഞ ചെലവിൽ പുതിയ അത്യാധുനിക ഉപകരണങ്ങൾ വാങ്ങാൻ സഹായകരമാകും. കൃഷി, ഭവന നിർമ്മാണം, ഉൽപ്പാദനം തുടങ്ങിയ മേഖലകളിൽ കൂടുതൽ നിക്ഷേപം നടത്താൻ കമ്പനികളെ പ്രോത്സാഹിപ്പിക്കുന്നതിനാണ് ഈ താൽക്കാലിക ഇളവുകൾ രൂപകൽപ്പന ചെയ്തിരിക്കുന്നത്.
അമേരിക്കയുമായി നിലവിൽ വ്യാപാര കരാറുകളുള്ള രാജ്യങ്ങളിൽ നിന്ന് ഇറക്കുമതി ചെയ്യുന്ന ഉൽപ്പന്നങ്ങൾക്ക് മാത്രമായിരിക്കും ഈ നികുതിയിളവ് ലഭിക്കുക. യുഎസുമായി ഇതുവരെ വ്യാപാര കരാർ അന്തിമമായിട്ടില്ലാത്തതിനാൽ ഇന്ത്യയ്ക്ക് ഈ പുതിയ പ്രഖ്യാപനത്തിന്റെ പ്രയോജനം തൽക്കാലം ലഭിക്കില്ല. ഇതോടൊപ്പം ആഭ്യന്തരമായി ഉൽപ്പാദിപ്പിക്കുന്ന സ്റ്റീലിനും അലുമിനിയത്തിനും ആവശ്യം വർദ്ധിപ്പിക്കുന്നതിനായി ഒരു അധിക ആനുകൂല്യ പദ്ധതിയും ട്രംപ് പ്രഖ്യാപിച്ചിട്ടുണ്ട്. വിദേശ നിർമ്മാതാക്കൾ ഇറക്കുമതി ചെയ്യുന്ന വൻകിട യന്ത്രങ്ങളിലെ സ്റ്റീലിന്റെയോ അലുമിനിയത്തിന്റെയോ ആകെ ഭാരത്തിന്റെ കുറഞ്ഞത് 85 ശതമാനമെങ്കിലും അമേരിക്കൻ നിർമ്മിതമാണെങ്കിൽ, അവർക്ക് താരിഫ് നിരക്ക് വീണ്ടും കുറച്ച് വെറും 10 ശതമാനം മാത്രമാക്കുമെന്നും വൈറ്റ് ഹൗസ് അറിയിച്ചു.
America announces huge tariff reduction; Trump’s unexpected move shocks the world
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
