ഒന്റാരിയോ: കാനഡ ഫെഡറൽ സർക്കാരിന്റെ കുറഞ്ഞ ചെലവിലുള്ള ഡേകെയർ പദ്ധതിയുടെ ദീർഘകാല നിലനിൽപ്പ് പ്രതിസന്ധിയിലാണെന്ന് ഒന്റാരിയോ പ്രവിശ്യാ സർക്കാർ അറിയിച്ചു. പ്രതിദിനം 10 ഡോളർ നിരക്കിൽ ശിശുപരിപാലനം ഉറപ്പാക്കുന്ന ഈ പദ്ധതി ആരംഭിച്ച് അഞ്ച് വർഷം പിന്നിടുമ്പോഴാണ് ഫണ്ടിനെച്ചൊല്ലി ഇരു സർക്കാരുകളും തമ്മിൽ തർക്കം രൂക്ഷമാകുന്നത്. നിലവിലെ കരാർ പ്രകാരം ഒന്റാരിയോയിൽ താൽക്കാലികമായി ഡേകെയർ നിരക്കുകൾ പ്രതിദിനം ശരാശരി 19 ഡോളറായി കുറച്ചിട്ടുണ്ട്. എന്നാൽ ഫെഡറൽ ധനസഹായത്തിൽ കാര്യമായ വർദ്ധനവ് വരുത്തിയില്ലെങ്കിൽ പദ്ധതിയുടെ ദീർഘകാല വിജയം അപകടത്തിലാകുമെന്ന് ഒന്റാരിയോ വിദ്യാഭ്യാസ മന്ത്രി പോൾ കലാൻഡ്രയുടെ വക്താവ് എമ്മ ടെസ്താനി വ്യക്തമാക്കി. അതേസമയം, 2026-ന് ശേഷമുള്ള ദീർഘകാല പരിഹാരങ്ങൾക്കായി ഒന്നിച്ച് പ്രവർത്തിക്കുമെന്ന് ഫെഡറൽ എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് വക്താവ് ജെസീക്ക അറിയിച്ചു.
പദ്ധതി ആരംഭിച്ചതുമുതൽ 2027 വരെ ഒന്റാരിയോയ്ക്ക് മാത്രമായി ഫെഡറൽ സർക്കാർ 15.4 ബില്യൺ ഡോളർ നീക്കിവെച്ചിട്ടുണ്ടെന്ന് ജെസീക്ക ചൂണ്ടിക്കാട്ടി. ഈ വർഷം അവസാനത്തോടെ 86,000 പുതിയ ഡേകെയർ സീറ്റുകൾ നിർമ്മിക്കുകയെന്ന ലക്ഷ്യത്തിലേക്ക് പ്രവിശ്യാ സർക്കാർ നീങ്ങുകയാണ്. നിലവിൽ ജൂൺ മാസത്തെ കണക്കനുസരിച്ച് 41,000 പുതിയ സീറ്റുകൾ ഒന്റാരിയോയിൽ നിർമ്മിച്ചതായും അവർ അറിയിച്ചു. പ്രവിശ്യയിലെ ഡേകെയർ കാത്തിരിപ്പ് പട്ടികയിലുള്ളവരുടെ കൃത്യമായ കണക്കുകൾ ലഭ്യമാണോ എന്ന ചോദ്യത്തോട് ഒന്റാരിയോ സർക്കാർ പ്രതികരിച്ചിട്ടില്ല. എന്നാൽ വൻതോതിൽ സീറ്റുകൾ വർദ്ധിപ്പിച്ചാൽ മാത്രമേ നിലവിലെ നീണ്ട കാത്തിരിപ്പ് പട്ടിക ഒഴിവാക്കാൻ സാധിക്കുകയുള്ളൂ എന്ന് കമ്മ്യൂണിറ്റി സംഘടനകൾ വിലയിരുത്തുന്നു.
ഡേകെയർ ജീവനക്കാരുടെ (Early Childhood Educators – ECEs) രൂക്ഷമായ ക്ഷാമമാണ് ഒന്റാരിയോ നേരിടുന്ന പ്രധാന പ്രതിസദ്ധിയെന്ന് ഒന്റാരിയോ കോയലിഷൻ ഫോർ ബെറ്റർ ചൈൽഡ് കെയറിലെ കരോലിൻ ഫേൺസ് വ്യക്തമാക്കി. പല ഡേകെയറുകളിലും ആവശ്യത്തിന് മുറികളുണ്ടെങ്കിലും ജീവനക്കാരില്ലാത്തതിനാൽ അവ പ്രവർത്തിപ്പിക്കാൻ സാധിക്കുന്നില്ല. അധ്യാപകർക്ക് മെച്ചപ്പെട്ട ശമ്പളവും തൊഴിൽ സാഹചര്യങ്ങളും ഉറപ്പാക്കി കൂടുതൽ ജീവനക്കാരെ ആകർഷിക്കാൻ ഇരു സർക്കാരുകളും കൂടുതൽ വിഭവങ്ങൾ കണ്ടെത്തേണ്ടതുണ്ട്. ഈ പ്രതിസന്ധി പരിഹരിക്കുന്നതിനായി രജിസ്റ്റർ ചെയ്ത ചൈൽഡ് കെയർ ജീവനക്കാർക്കായി ഉയർന്ന വേതനവും കരിയർ വികസനവും ഉൾപ്പെടുന്ന സമഗ്രമായ തൊഴിൽ നയം പ്രവിശ്യാ സർക്കാർ ആരംഭിച്ചിട്ടുണ്ടെന്ന് എമ്മ ടെസ്താനി അറിയിച്ചു.
Canada’s daycare program under serious threat after 5 years; Ontario calls for increased funding
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
