ബെംഗളൂരു: കർണാടക മുഖ്യമന്ത്രി സ്ഥാനത്തുനിന്ന് ഒഴിയുന്നതിന് പകരമായി കോൺഗ്രസ് ഹൈക്കമാൻഡ് മുന്നോട്ടുവെച്ച രാജ്യസഭാ സീറ്റ് സിദ്ധരാമയ്യ നിരസിച്ചതായി റിപ്പോർട്ട്. ദേശീയ രാഷ്ട്രീയത്തിലേക്ക് മാറാൻ തനിക്ക് താൽപ്പര്യമില്ലെന്നും സംസ്ഥാന രാഷ്ട്രീയത്തിൽ തന്നെ തുടരാനാണ് ആഗ്രഹമെന്നും അദ്ദേഹം പാർട്ടി നേതൃത്വത്തെ അറിയിച്ചു. 2023-ലെ നിയമസഭാ തിരഞ്ഞെടുപ്പ് വിജയത്തിന് ശേഷം മൂന്ന് വർഷമായി കർണാടക മുഖ്യമന്ത്രിയായി തുടരുന്ന സിദ്ധരാമയ്യ, ഹൈക്കമാൻഡ് നിർദ്ദേശപ്രകാരം സ്ഥാനം രാജിവെക്കാൻ സന്നദ്ധത പ്രകടിപ്പിച്ചിട്ടുണ്ട്. കോൺഗ്രസ് അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി എന്നിവരുമായി ദില്ലിയിൽ നടത്തിയ നിർണായക ചർച്ചകൾക്ക് ശേഷമാണ് രാജിക്കാര്യത്തിൽ തീരുമാനമായത്. ഉടൻ തന്നെ കോൺഗ്രസ് നിയമസഭാ കക്ഷി യോഗം വിളിച്ചുചേർക്കുമെന്നും, അതിൽ സിദ്ധരാമയ്യ തന്റെ രാജിക്കാര്യം ഔദ്യോഗികമായി പ്രഖ്യാപിക്കുമെന്നുമാണ് വിവരം.
നിലവിലെ ഉപമുഖ്യമന്ത്രിയായ ഡി.കെ. ശിവകുമാറിന് മുഖ്യമന്ത്രി സ്ഥാനം കൈമാറുന്നതിന്റെ ഭാഗമായാണ് സിദ്ധരാമയ്യയുടെ ഈ അടിയന്തര നീക്കം. കർണാടകയിൽ ഏറ്റവും കൂടുതൽ കാലം മുഖ്യമന്ത്രിയായിരുന്ന ഡി. ദേവരാജ് അരശിന്റെ റെക്കോർഡ് അടുത്തിടെ മറികടന്ന സിദ്ധരാമയ്യയ്ക്ക്, മുഖ്യമന്ത്രി പദവി ഒഴിയുന്നതോടെ അർഹമായ മറ്റൊരു പദവി നൽകി സംസ്ഥാനത്ത് തന്നെ നിലനിർത്താനാകും ഇനി കോൺഗ്രസ് ശ്രമിക്കുക. അതേസമയം, ദക്ഷിണേന്ത്യയിലെ കോൺഗ്രസിന്റെ ഏറ്റവും ശക്തനായ മുഖമായ ഡി.കെ. ശിവകുമാറിലേക്ക് അധികാരം കൈമാറുന്നതോടെ കർണാടക രാഷ്ട്രീയത്തിൽ പുതിയൊരു അധ്യായത്തിനാണ് തുടക്കമാകുന്നത്. വരും ദിവസങ്ങളിൽ തന്നെ കനകപുരയിൽ നിന്നുള്ള ഈ കരുത്തൻ കർണാടകയുടെ അമരക്കാരനായി ചുമതലയേൽക്കുമെന്നാണ് രാഷ്ട്രീയ കേന്ദ്രങ്ങൾ നൽകുന്ന സൂചന.
Siddaramaiah to step down as CM; rejects high command’s offer of Rajya Sabha seat
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
