ട്രംപിന്റെ നയങ്ങളോട് ‘നോ’; അമേരിക്കൻ യാത്രകൾ ബഹിഷ്കരിച്ച് കനേഡിയൻ ജനത, യാത്രാനിരക്കിൽ വൻ ഇടിവ്

ഒട്ടാവ: യുണൈറ്റഡ് സ്റ്റേറ്റ്സിലേക്കുള്ള (യു.എസ്) യാത്രാ ബഹിഷ്കരണം കനേഡിയൻ ജനത കൂടുതൽ ശക്തമാക്കുന്നതായി സൂചന. കഴിഞ്ഞ വർഷങ്ങള അപേക്ഷിച്ച് ഈ വർഷം മാർച്ചിൽ കാനഡയിൽ നിന്നും അമേരിക്കയിലേക്കുള്ള സന്ദർശകരുടെ എണ്ണത്തിൽ വൻ കുറവ് രേഖപ്പെടുത്തിയതായി ഔദ്യോഗിക കണക്കുകൾ വ്യക്തമാക്കുന്നു. സ്റ്റാറ്റിസ്റ്റിക്സ് കാനഡ വ്യാഴാഴ്ച പുറത്തുവിട്ട ഏറ്റവും പുതിയ റിപ്പോർട്ടിലാണ്, തുടർച്ചയായ 15-ാം മാസവും അമേരിക്കയിലേക്കുള്ള കനേഡിയൻമാരുടെ യാത്രകളിൽ വലിയ ഇടിവ് രേഖപ്പെടുത്തിയതായി വ്യക്തമാക്കുന്നത്.

കഴിഞ്ഞ മാർച്ചിൽ അമേരിക്കൻ സന്ദർശനം കഴിഞ്ഞ് തിരിച്ചെത്തിയ കനേഡിയൻമാരുടെ എണ്ണം 26 ലക്ഷമാണ്. മുൻവർഷത്തെ ഇതേ മാസത്തെ അപേക്ഷിച്ച് 6.4 ശതമാനത്തിന്റെ കുറവാണ് ഇതിലുണ്ടായിട്ടുള്ളത്. വിമാനമാർഗ്ഗമുള്ള യാത്രകളിലാണ് ഏറ്റവും വലിയ ഇടിവ് സംഭവിച്ചത്; ഇത് 10.8 ശതമാനം കുറഞ്ഞ് 9,34,100 ആയി. റോഡ് മാർഗ്ഗമുള്ള യാത്രകൾ 3.3 ശതമാനം കുറഞ്ഞ് 16 ലക്ഷത്തിലെത്തി. ഇതിൽ 63.7 ശതമാനം യാത്രകളും ഒരേദിവസം തന്നെ പോയി തിരിച്ചുവന്നവയാണ്. രണ്ട് വർഷം മുൻപത്തെ (2024 മാർച്ചിലെ) കണക്കുകളുമായി താരതമ്യം ചെയ്യുമ്പോൾ ആകെ യാത്രകളിൽ 28 ശതമാനത്തിന്റെ വൻ ഇടിവാണ് ദൃശ്യമാകുന്നത്.

അമേരിക്കൻ പ്രസിഡന്റ് ഡൊണാൾഡ് ട്രംപ് ഭരണകൂടം കാനഡയ്ക്കെതിരെ ഏർപ്പെടുത്തിയ വ്യാപാര നികുതികളും (താരിഫ്), കാനഡയെ അമേരിക്കയുടെ ’51-ാം സംസ്ഥാനം’ എന്ന് വിശേഷിപ്പിച്ചതുമടക്കമുള്ള രാഷ്ട്രീയ നീക്കങ്ങളാണ് കനേഡിയൻ ജനതയെ പ്രകോപിപ്പിച്ചതെന്നാണ് വിലയിരുത്തൽ. ഇതിനെതിരെയുള്ള പ്രതിഷേധത്തിന്റെ ഭാഗമായി ‘ബൈ കനേഡിയൻ’ (Buy Canadian) കാമ്പയിൻ ശക്തമാക്കുകയും അമേരിക്കൻ ഉൽപ്പന്നങ്ങളും യു.എസ് യാത്രകളും ജനങ്ങൾ ബോധപൂർവ്വം ബഹിഷ്കരിക്കാൻ ആരംഭിക്കുകയുമായിരുന്നു. 2025-ന്റെ തുടക്കം മുതൽ പ്രകടമായ ഈ ഇടിവ് 2026 മാർച്ചിലും കൂടുതൽ ശക്തമായി തുടരുകയാണ്.

അതേസമയം, കനേഡിയൻമാർ അമേരിക്കയെ കൈവിടുമ്പോഴും, അമേരിക്കൻ സ്വദേശികൾ കാനഡയിലേക്ക് നടത്തുന്ന യാത്രകളിൽ വർദ്ധനവുണ്ടാകുന്നത് ശ്രദ്ധേയമാണ്. മാർച്ചിൽ മാത്രം 13 ലക്ഷം അമേരിക്കക്കാരാണ് കാനഡ സന്ദർശിച്ചത്. 2025 മാർച്ചിലെ കണക്കുകളേക്കാൾ 4.4 ശതമാനം കൂടുതലാണിത്. റോഡ് മാർഗ്ഗമുള്ള യാത്രകൾ 4.7 ശതമാനം വർദ്ധിച്ചപ്പോൾ, വിമാനമാർഗ്ഗമുള്ള യാത്രകൾ മൂന്ന് ശതമാനം വർദ്ധിച്ചു. ഇരു രാജ്യങ്ങളും തമ്മിലുള്ള രാഷ്ട്രീയ തർക്കങ്ങൾ നിലനിൽക്കുമ്പോഴും കാനഡയുടെ ടൂറിസം മേഖലയ്ക്ക് അമേരിക്കൻ സഞ്ചാരികളുടെ വരവ് വലിയ ആശ്വാസമാണ് നൽകുന്നത്. വരും മാസങ്ങളിലും ഈ പ്രവണത തുടരുമോ എന്നാണ് സാമ്പത്തിക വിദഗ്ധർ ഉറ്റുനോക്കുന്നത്.

‘No’ to Trump’s policies; Canadians boycott American travel, huge drop in travel prices

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt